“തെറ്റിദ്ധരിപ്പിക്കപ്പെട്ടതു കൊണ്ടും മുൻവിധികൊണ്ടും ഞാൻ കാണാതിരുന്ന ഒരു സിനിമ..!” എന്റെ മെഴുതിരി അത്താഴങ്ങൾക്ക് പ്രശംസയുമായി ജീത്തു ജോസഫ്

മലയാളികളെ അത്ഭുതപ്പെടുത്തുന്ന ചിത്രങ്ങൾ ഒരുക്കി കൈയ്യടി നേടുന്ന സംവിധായകനാണ് ജീത്തു ജോസഫ്. ദൃശ്യം, മെമ്മറീസ് തുടങ്ങിയ ചിത്രങ്ങൾ ഇന്നും പ്രേക്ഷകരുടെ പ്രിയ ചിത്രങ്ങളാണ്. ഇപ്പോൾ ദൃശ്യം രണ്ടാം ഭാഗത്തിന്റെ തിരക്കുകളിലാണ് അദ്ദേഹം. അതിനിടയിൽ അനൂപ് മേനോന്റെ എന്റെ മെഴുതിരി അത്താഴങ്ങൾ എന്ന ചിത്രം കാണുവാൻ സാധിച്ച ജീത്തു ജോസഫ് ചിത്രത്തിനെ കുറിച്ച് സോഷ്യൽ മീഡിയയിൽ പങ്ക് വെച്ച കുറിപ്പ് ശ്രദ്ധേയമാകുകയാണ്.

നമ്മുടെയൊക്കെ ജീവിതത്തിൽ ചില മുൻ വിധികൾ കൊണ്ട് ചിലതിനെതിരെ നമ്മൾ മുഖം തിരിക്കും. പിന്നീട് നമുക്ക് തെറ്റി എന്നറിയുമ്പോളുള്ള ജാള്യത …. അങ്ങിനെ ഒരു മാനസിക വസ്ഥയിലാണ് ഞാനിപ്പോൾ… തെറ്റിദ്ധരിപ്പിക്കപ്പെട്ടതു കൊണ്ടും മുൻവിധികൊണ്ടും ഞാൻ കാണാതിരുന്ന ഒരു സിനിമ ” എന്റെ മെഴുകുതിരി അത്താഴങ്ങൾ “. ഒരു മനോഹരമായ പ്രണയചിത്രം

സഞ്ജയ് ലോക പ്രസിദ്ധനായ ഒരു ഷെഫാണ്. രുചിഭേദങ്ങൾ തേടിയുള്ള അയാളുടെ യാത്രയിൽ ഊട്ടിയിൽ വെച്ച് മെഴുകുതിരികൾ ഡിസൈൻ ചെയ്യുന്ന അഞ്ജലിയെ സഞ്ജയ് കണ്ടുമുട്ടുന്നു. രസകരവും പ്രണയാർദ്രവുമായ അവരുടെ ആദ്യ കണ്ടുമുട്ടലിന് ശേഷം ഇരുവരും പ്രണയത്തിലാകുന്നു. ഇരുവരുടേയും വൈകാരിക തലങ്ങളിലൂടെയുള്ള ഒരു യാത്രയാണ് എന്റെ മെഴുതിരി അത്താഴങ്ങൾ എന്ന ചിത്രം. കവിത പോലെ മനോഹരമായ ഒരു ചിത്രം. എന്തുകൊണ്ട് ഇങ്ങനെയൊരു ടൈറ്റിൽ എന്ന സംശയത്തിനുള്ള മറുപടി തരുന്നത് ഇരുവരുടെയും പ്രൊഫഷനുകളാണ്. മെഴുതിരികൾ ഡിസൈൻ ചെയ്യുന്ന അഞ്ജലിയും അത്താഴങ്ങൾ ഒരുക്കുന്ന സഞ്ജയും ചേരുമ്പോൾ ഉരുത്തിരിയുന്ന ഒരു കെമിസ്ട്രി. അത് തന്നെയാണ് എന്റെ മെഴുതിരി അത്താഴങ്ങൾ എന്നെ ടൈറ്റിലിലൂടെ പ്രേക്ഷകർക്കായി ഒരുക്കിയിരിക്കുന്നത്. പ്രണയത്തോടൊപ്പം തന്നെ സൗഹൃദങ്ങളുടെ ഒരു ലോകം കൂടി ചിത്രം വരച്ചു കാണിക്കുന്നുണ്ട്.

അനൂപ് മേനോൻ, മിയ എന്നിവരുടെ സ്‌ക്രീൻ പ്രെസെൻസ് തന്നെയാണ് ചിത്രത്തിന്റെ ഏറ്റവും വലിയ ആകർഷണം. അത് ക്യാമറകൾക്ക് പോലുമറിയാം. ട്രിവാൻഡ്രം ലോഡ്‌ജ്‌, ബ്യൂട്ടിഫുൾ തുടങ്ങിയ ചിത്രങ്ങൾക്ക് തിരക്കഥയൊരുക്കിയ അനൂപ് മേനോൻ നാല് വർഷങ്ങൾക്ക് ശേഷമാണ് വീണ്ടും ഒരു തിരക്കഥയൊരുക്കുന്നത്. ഒരു തിരക്കഥാകൃത്തായും അഭിനേതാവായും മികച്ചൊരു പ്രകടനം തന്നെയാണ് അനൂപ് മേനോൻ പ്രേക്ഷകർക്കായി പങ്ക് വെച്ചിരിക്കുന്നത്. ആരെയും പ്രണയിപ്പിക്കാൻ പോകുന്ന ഒരു അഴകുമായി മിയയും തന്റെ റോൾ മനോഹരമാക്കി. ഇരുവരും തമ്മിൽ ഒരു നല്ല കെമിസ്ട്രി ചിത്രത്തിലുടനീളം ദൃശ്യമാണ്. ചിന്തിപ്പിച്ച് ചിരിപ്പിച്ച് അലൻസിയറും ബൈജുവും അത്താഴച്ചിരികൾക്ക് മാറ്റ് കൂട്ടി. ലാൽ ജോസ്, വി കെ പ്രകാശ്, ദിലീഷ് പോത്തൻ എന്നിവർ മനോഹരമായി അവരുടെ കാമിയോ റോൾസ് അവതരിപ്പിക്കുകയും ചെയ്തു. സൂരജ് ടോമാണ് സംവിധാനം. തിരക്കഥ അനൂപ് മേനോനും.