‘ദിലീപേട്ടന് എല്ലാവിധ പിന്തുണയും’ – നേരം ഇന്ന് കൊണ്ട് ഇരുട്ടി വെളുക്കില്ലെന്ന് ജീവൻ ഗോപാൽ

നടി ആക്രമിക്കപ്പെട്ട കേസുമായി ബന്ധപ്പെട്ട് നടൻ ദിലീപിന് എതിരെ കൂടുതൽ അന്വേഷണം നടക്കുന്ന പശ്ചാത്തലത്തിൽ താരത്തിന് പിന്തുണയുമായി എത്തിയിരിക്കുകയാണ് സിനിമയിലെ ചില സഹപ്രവർത്തകർ. അവസാനമായി നടൻ ജീവൻ ഗോപാൽ ആണ് ദിലീപിന് പിന്തുണ പ്രഖ്യാപിച്ചിരിക്കുന്നത്. മൈ ബോസ് എന്ന ചിത്രത്തിൽ ദിലീപിന്റെ പെങ്ങളുടെ മകൻ ആയിട്ട് ജീവൻ അഭിനയിച്ചിരുന്നു. കഷ്ടപ്പാടുകൾക്ക് ഇടയിൽ നിന്ന് സ്വപ്രയത്നത്തിലൂടെ ഉന്നതങ്ങളിൽ എത്തിയ ദിലീപേട്ടന് എന്റെ എല്ലാ പിന്തുണയും എന്ന് ജീവൻ സോഷ്യൽ മീഡിയയിൽ കുറിച്ചു.

‘കഷ്ടപ്പാടുകൾക്ക് ഇടയിൽ നിന്ന് സ്വപ്രയത്നത്തിലൂടെ ഉന്നതങ്ങളിൽ എത്തിയ ദിലീപേട്ടന് എന്റെ എല്ലാ പിന്തുണയും… സത്യം കോടതിയിൽ തെളിയട്ടെ. ചാനലുകളിൽ വന്നിരുന്ന് ദിലീപേട്ടനെതിരെ കവലപ്രസംഗം നടത്തി പിന്നിൽ നിന്ന് കുത്തുന്ന, കൂടെനിന്ന് എല്ലാം നേടിയവർ ഒരു കാര്യം ഓർക്കുക, നേരം ഇന്ന് കൊണ്ട് ഇരുട്ടി വെളുക്കില്ല….. ഒന്ന് ആത്‍മപരിശോധന നടത്തിയാൽ നന്ന്’ – ജീവൻ ഗോപാൽ തന്റെ ഫേസ്ബുക്കിൽ കുറിച്ചു.

മൈ ബോസ് സിനിമയിൽ ജീവനും ദിലീപും ഒരുമിച്ചുള്ള ഒരു സീനിന്റെ ചിത്രവും ദിലീപിന്റെ ഒരു ചിത്രവും പങ്കുവെച്ചാണ് ജീവൻ ഇങ്ങനെ കുറിച്ചത്. അതേസമയം, നടി ആക്രമിക്കപ്പെട്ട കേസിൽ അന്വേഷണ ഉദ്യോഗസ്ഥരെ അപായപ്പെടുത്തുന്നത് ഉൾപ്പെടെയുള്ള കാര്യങ്ങളിൽ പങ്കുണ്ടെന്ന ബാലചന്ദ്രകുമാറിന്റെ വെളിപ്പെടുത്തലിനെ തുടർന്ന് ദിലീപിന് എതിരെ വീണ്ടും കേസെടുത്ത് അന്വേഷണം ആരംഭിച്ചു.