എൽഡിഎഫിന്റെ വിജയാഘോഷത്തിൽ ആടിത്തിമിർത്ത് ജോജു ജോർജും വിനായകനും; വീഡിയോ

തദ്ദേശ ഉപതിരഞ്ഞെടുപ്പിൽ കൊച്ചി കോർപറേഷനിൽ മികച്ച വിജയം എൽഡിഎഫ് നേടിയിരുന്നു. വിജയത്തിൽ ആഹ്ലാദപ്രകടനങ്ങളുമായി തെരുവിൽ ഇറങ്ങിയ എൽഡിഎഫ് പ്രവർത്തകർക്കൊപ്പം ജോജു ജോർജും വിനായകനും ആടിത്തിമിർക്കുന്ന വീഡിയോ ഇപ്പോൾ സോഷ്യൽ മീഡിയ കീഴടക്കുകയാണ്. കോൺഗ്രസിനെതിരെ ശബ്ദമുയർത്തി പലപ്പോഴും വാർത്തകളിൽ ഇടം പിടിച്ചിട്ടുള്ള വ്യക്തിയാണ് വിനായകൻ. വൈറ്റിലയിൽ റോഡ് തടഞ്ഞ് സമരം നടത്തിയ കോൺഗ്രസിനെതിരെ പ്രതികരിച്ച് ജോജു ജോർജും ഈ അടുത്ത് വാർത്തകളിൽ നിറഞ്ഞിരുന്നു.

കോര്‍പറേഷനിലെ 63-ാം ഡിവിഷനില്‍ എല്‍ഡിഎഫ് സ്ഥാനാര്‍ഥിയായ ബിന്ദു ശിവന്‍ 687 വോട്ടിന്‍റെ ഭൂരിപക്ഷത്തിലാണ് ജയിച്ചത്. എല്‍ഡിഎഫിന്‍റെ സിറ്റിംഗ് സീറ്റ് ആണിത്. പാര്‍ട്ടി കൊടികളും കൊട്ടും മേളവുമായി തെരുവിലേക്കിറങ്ങിയ പ്രവര്‍ത്തകര്‍ക്കൊപ്പം ചേര്‍ന്ന ജോജുവിന്‍റെയും വിനായകന്‍റെയും വീഡിയോ ദൃശ്യങ്ങള്‍ സോഷ്യല്‍ മീഡിയയില്‍ പ്രചരിക്കുന്നുണ്ട്. താളം പിടിക്കുന്ന ജോജുവിനെയും താളത്തിനൊപ്പം ചുവടുവെക്കുന്ന വിനായകനെയും വീഡിയോയില്‍ കാണാം.

സിപിഎം സ്ഥാനാര്‍ഥി ബിന്ദു ശിവന്‍ 2950 വോട്ടുകള്‍ നേടിയപ്പോള്‍ കോണ്‍ഗ്രസ് സ്ഥാനാര്‍ഥിക്ക് ലഭിച്ചത് 2263 വോട്ടുകളാണ്. കഴിഞ്ഞ തവണ ഉണ്ടായിരുന്ന 106ല്‍ എല്‍ഡിഎഫ് ഭൂരിപക്ഷം 687 ആക്കി ഉയര്‍ത്തിയത്. മുന്‍ തെരഞ്ഞെടുപ്പിനെ അപേക്ഷിച്ച് എന്‍ഡിഎയുടെയും വി ഫോര്‍ കൊച്ചിയുടെയും പ്രകടനം ദയനീയമായി. കഴിഞ്ഞ തവണ 397 വോട്ടുകള്‍ ലഭിച്ചിടത്ത് എന്‍ഡിഎ ഇക്കുറി നേടിയത് 195 ആണ്. 216 വോട്ടുകൾ ഉണ്ടായിരുന്ന വി ഫോര്‍ കൊച്ചി 30 വോട്ടിലേക്കും ഒതുങ്ങി. തിരുവനന്തപുരം, കൊച്ചി കോര്‍പറേഷനുകളിലടക്കം 16 ഇടങ്ങളിലാണ് എല്‍ഡിഎഫ് വിജയിച്ചിരിക്കുന്നത്. ആകെ തെരഞ്ഞെടുപ്പ് നടന്ന 32 വാര്‍ഡുകളില്‍ 16 എണ്ണം എല്‍ഡിഎഫും 13 എണ്ണം യുഡിഎഫും നേടിയപ്പോള്‍ ഒരിടത്ത് ബിജെപിയും വിജയിച്ചു.