വർഷങ്ങൾക്ക് മുൻപ് ജോഷി ചിത്രത്തിൽ സഹനടൻ; ഇന്ന് നായകൻ…! ഇത് കാലം അംഗീകരിച്ച കഴിവ്

ജോജു ജോർജ് എന്ന പേര് ആദ്യമൊക്കെ ഒരു വില്ലൻ ഇമേജ് ആയിരുന്നു പ്രേക്ഷകർക്ക് സമ്മാനിച്ചിരുന്നത്. എന്നാൽ കാലം കടന്നു പോയപ്പോൾ ജോജുവിന് കോമഡി വേഷങ്ങളും നന്നായി ഇണങ്ങുമെന്ന് പ്രേക്ഷകർ മനസ്സിലാക്കി. രാജാധിരാജ, പുള്ളിപ്പുലികളും ആട്ടിൻകുട്ടിയും, ആക്ഷൻ ഹീറോ ബിജു തുടങ്ങിയ ചിത്രങ്ങളിലെ അഭിനയവും പ്രേക്ഷകരുടെ മനസ്സിൽ ജോജുവിന് നേടിക്കൊടുത്തത് മറ്റൊരു സ്ഥാനമാണ്. പക്ഷേ ജോജുവിലെ യഥാർത്ഥ പ്രതിഭയെ മനസ്സിലാക്കുവാൻ ജോസഫ് തന്നെ വേണ്ടി വന്നു. ജൂനിയർ ആർട്ടിസ്റ്റായി തുടങ്ങി വളരെയേറെ ബുദ്ധിമുട്ടി തന്നെയാണ് അദ്ദേഹം ഈ നിലയിൽ എത്തിയത്. ആ ഒരു കഷ്ടപ്പാട് ഓരോ അഭിനയമോഹിക്കും ഒരു പാഠപുസ്തകം കൂടിയാണ്. ജോസഫിന്റെ വിജയത്തോടെ നായകനിരയിലേക്ക് ഉയർത്തപ്പെട്ട ജോജു ജോർജിന് ഇപ്പോൾ അവസരങ്ങൾ ഏറെയാണ്.

ഒരു ഇടവേളക്ക് ശേഷം ഹിറ്റ് മേക്കർ ജോഷി അണിയിച്ചൊരുക്കുന്ന പുതിയ ചിത്രത്തിൽ ജോജു ജോർജാണ് നായകൻ. 2012ൽ പുറത്തിറങ്ങിയ റൺ ബേബി റണിൽ സഹനടനായിരുന്ന ജോജു ഏഴ് വർഷങ്ങൾക്കിപ്പുറം മറ്റൊരു ജോഷി ചിത്രത്തിൽ നായകനാകുന്ന എന്നത് തന്നെയാണ് ഏറെ ശ്രദ്ധേയമായ കാര്യം. പൊറിഞ്ചു മറിയം ജോസ് എന്ന് പേരിട്ടിരിക്കുന്ന ചിത്രത്തിൽ മഞ്ജു വാര്യരെയാണ് നായികയായി തീരുമാനിച്ചിരുന്നത്. എന്നാൽ തമിഴിൽ ധനുഷിന്റെ നായികയായി അസുരനിൽ അഭിനയിക്കേണ്ടി വരുന്നതിനാൽ മഞ്ജു വാര്യർക്ക് പകരം നൈല ഉഷ ജോജുവിന്റെ നായികയാകും. ഡേവിഡ് കാച്ചപ്പിള്ളിയാണ് നിർമാണം. തൃശൂർ കേന്ദ്രീകരിച്ച് ക്രിസ്തീയ പശ്ചാത്തലത്തിൽ ഒരുങ്ങുന്ന ഈ ഫാമിലി ത്രില്ലറിൽ ചെമ്പൻ വിനോദ്, ഇന്നസെന്റ് എന്നിവരും വേഷമിടുന്നു. അഭിലാഷ് എൻ ചന്ദ്രൻ തിരക്കഥയും ക്വീൻ, രണം എന്നീ ചിത്രങ്ങളുടെ പിന്നിൽ പ്രവർത്തിച്ച ജേക്സ് ബിജോയ് സംഗീതവും നിർവഹിക്കുന്നു. ഫെബ്രുവരി 11ന് തൃശൂരിൽ ചിത്രീകരണം ആരംഭിക്കും.