‘വിനായകനെ കണ്ടപ്പോള്‍ ഇലത്താളം കൊട്ടിയതാണ്, തെരഞ്ഞെടുപ്പിന്റെ കാര്യം പോലും അറിഞ്ഞില്ല’; വെറുതെ വിടണമെന്ന് ജോജു ജോര്‍ജ്

കൊച്ചി: ഇടതുമുന്നണിയുടെ ഉപതെരഞ്ഞെടുപ്പ് വിജയം ആഘോഷിച്ചെന്ന ആരോപണം നിഷേധിച്ച് നടൻ ജോജു ജോർജ്. തെരഞ്ഞെടുപ്പിന്റെ കാര്യം പോലും താൻ അറിഞ്ഞില്ലായിരുന്നെന്നും തന്നെ വെറുതെ വിടണമെന്നും നടൻ പറഞ്ഞു. ഒരു ജാഥയും താൻ നയിച്ചിട്ടില്ല. അനാവശ്യമായ കാര്യങ്ങളിലേക്ക് തന്നെ തള്ളിയിടുകയാണ്. വിനായകൻ അടുത്ത സുഹൃത്താണ്. അദ്ദേഹത്തെ കണ്ടപ്പോൾ അദ്ദേഹത്തിനൊപ്പം കുറച്ചു നേരം ഇലത്താളം കൊട്ടുക മാത്രമാണ് ചെയ്തതെന്നും ജോജു വ്യക്തമാക്കി. സംഭവവുമായി ബന്ധപ്പെട്ട് റിപ്പോർട്ടർ ടിവിയോട് പ്രതികരിക്കുമ്പോൾ ആയിരുന്നു താരം ഇങ്ങനെ പറഞ്ഞത്.

ഇങ്ങനെയൊരു തെരഞ്ഞെടുപ്പ് നടന്ന കാര്യം പോലും താൻ അറിഞ്ഞിട്ടില്ല. ആവശ്യമില്ലാത്ത ഓരോ കാര്യങ്ങളിലേക്ക് വെറുതെ തന്നെ തള്ളി വിടുകയാണ്. ഈ വിഷയത്തിൽ കൂടി ഇനിയും ശത്രുക്കളെ ഉണ്ടാക്കാൻ താൽപര്യമില്ലെന്നും ജോജു വ്യക്തമാക്കി. താൻ ഓൺലൈനുകളിൽ പോലും ഇല്ലെന്നും ഒരു കാര്യവുമില്ലാതെ തന്നെ ഓരോന്നിലേക്ക് പിടിച്ച് ഇടുകയാണെന്നും അദ്ദേഹം പറഞ്ഞു. കുറേ കൂടി ശത്രുക്കളെ ഉണ്ടാക്കാമെന്നല്ലാതെ എന്ത് കാര്യമാണെന്നും വീണ്ടും കുറച്ചു പേർ തെറിവിളി തുടങ്ങുകയാണെന്നും ജോജു വ്യക്തമാക്കി.

‘എന്തെങ്കിലും തരത്തിലൊരു സ്വാതന്ത്ര്യം എനിക്ക് വേണ്ടേ, പൊതുപരിപാടികളിലും ഓൺലൈനിലും ഇപ്പോൾ ഞാൻ ഇല്ല. എങ്ങനെയാണ് ഇതിൽ കൂടുതൽ ഞാൻ ഒതുങ്ങേണ്ടത്. വെറുതെ വിട്ടു കൂടേ.’ – ജോജു ചോദിച്ചു. നടൻ വിനായകന്റെ വീട് ഉൾപ്പെടുന്ന ഡിവിഷനിൽ ഇന്ന് നടന്ന ഉപതെരഞ്ഞെടുപ്പിൽ എൽ ഡി എഫ് വിജയിച്ചിരുന്നു. ഇതിനെ തുടർന്ന് വിനായകന്റെ നേതൃത്വത്തിൽ ആഘോഷപരിപാടികൾ നടന്നിരുന്നു. ഈ ആഘോഷ പരിപാടിയിലാണ് ജോജു ഇലത്താളം കൊട്ടിയത്. ഇത് സാമൂഹ്യമാധ്യമങ്ങളിൽ വൈറലായിരുന്നു. ഇതിന് പിന്നാലെയാണ് ജോജുവിന്റെ പ്രതികരണം. നേരത്തെ, പെട്രോൾ വില വർദ്ധനവിന് എതിരെ യു ഡി എഫ് നടത്തിയ റോഡ് ഉപരോധ സമരത്തിനെതിരെ ജോജു പരസ്യമായി പ്രതികരിച്ചത് സാമൂഹ്യമാധ്യമങ്ങളിൽ വൈറലായിരുന്നു. ജോജുവിനെതിരെ സൈബർ ആക്രമണവും ഇതിനെ തുടർന്ന് നടന്നു. തുടർന്ന് എല്ലാ സോഷ്യൽ മീഡിയകളിൽ നിന്നും ജോജു പിൻവാങ്ങിയിരുന്നു. കോൺഗ്രസ് ജോജുവിനെതിരെ ശക്തമായി രംഗത്ത് എത്തുകയും ചെയ്തു. ഇതിനു പിന്നാലെയാണ് ഇപ്പോൾ ജോജു എൽ ഡി എഫ് വിജയാഘോഷത്തിൽ പങ്കെടുത്തത് വൈറലായിരിക്കുന്നത്.