കേരളം ജന്മം നൽകിയത് വിസ്‌മയിപ്പിക്കുന്ന അഭിനയപ്രതിഭകൾക്ക്..! ജൂനിയർ എൻ ടി ആറിന്റെ വാക്കുകൾ

അനന്തപുരിയെ ആവേശത്തിലാഴ്ത്തി ആർ ആർ ആർ ചിത്രത്തിന്റെ സംവിധായകൻ എസ് എസ് രാജമൗലിയും തെലുങ്കിലെ സൂപ്പർ താരങ്ങളായ രാംചരണും ജൂനിയർ എൻ ടി ആറും. ആർ ആർ ആർ ചിത്രത്തിന്റെ പ്രമോഷന്റെ പ്രചാരണാർത്ഥമാണ് തിരുവനന്തപുരത്ത് എത്തിയത്. പ്രചാരണ പരിപാടിയിൽ ടോവിനോ തോമസും അതിഥിതാരമായി എത്തിയിരുന്നു. ആരാധകർ ആവേശത്തോടെയാണ് ടോവിനോയെ വരവേറ്റത്. ആർ ആർ ആർ സംവിധായകൻ രാജമൗലിയും പ്രമോഷന്റെ ഭാഗമായി എത്തിയിട്ടുണ്ടായിരുന്നു. മിന്നൽ മുരളി ചിത്രത്തെ പ്രകീർത്തിച്ച രാജമൗലി ടോവിനോയെ ചേർത്തു നിർത്തി ആലിംഗനം ചെയ്യാനും മറന്നില്ല.

മലയാളത്തിലാണ് രാജമൗലി സദസിനെ അഭിസംബോധന ചെയ്തത്. രാം ചരണിനെയും ജൂനിയർ എൻ ടി ആറിനെയും നിറഞ്ഞ കൈയടിയോടെയാണ് സദസ് സ്വീകരിച്ചത്. അന്യഭാഷാ ചിത്രങ്ങളെ ഇരുകൈയും നീട്ടി സ്വീകരിക്കുന്ന മലയാളി പ്രേക്ഷകർ ബാഹുബലിക്ക് നൽകിയ പിന്തുണ ആർ ആർ ആറിനും നൽകണമെന്നും രാജമൗലി അഭ്യർത്ഥിച്ചു. കേരളത്തിലെ ഷൂട്ടിംഗ് അനുഭവങ്ങൾ പങ്കുവെച്ച അദ്ദേഹം കലാകാരൻമാരെ പിന്തുണയ്ക്കുന്ന നാടാണ് കേരളമെന്നും പറഞ്ഞു.

തങ്ങളോട് കാണിക്കുന്ന സ്നേഹത്തിന് നന്ദിയുണ്ടെന്ന് താരങ്ങളും പറഞ്ഞു. ജനുവരി ഏഴിനാണ് ആർ ആർ ആർ തിയറ്ററുകളിലേക്ക് എത്തുന്നത്. 400 കോടി മുടക്കിയാണ് ചിത്രം നിർമിച്ചിരിക്കുന്നത്. സ്വാതന്ത്ര്യ സമര കാലഘട്ടത്തിലെ കഥ പറയുന്ന ചിത്രത്തിൽ ആലിയ ഭട്ടാണ് നായിക. ചിത്രത്തിൽ ബോളിവുഡ് താരം അജയ് ദേവ്ഗണും പ്രധാന വേഷത്തിൽ എത്തുന്നുണ്ട്.

ജൂനിയർ എൻ ടി ആർ മലയാള സിനിമയെ കുറിച്ച് പറഞ്ഞ വാക്കുകളും ഇപ്പോൾ സോഷ്യൽ മീഡിയയിൽ സൂപ്പർ ഹിറ്റാണ്. മോഹൻലാൽ, മമ്മൂട്ടി, ദുൽഖർ സൽമാൻ, ഫഹദ് ഫാസിൽ, ടോവിനോ തോമസ് എന്നിവരുടെ പേരെടുത്തു പറഞ്ഞ അദ്ദേഹം കേരളം എന്ന മണ്ണ് വിസ്മയിപ്പിക്കുന്ന അഭിനയ പ്രതിഭകൾക്കാണ് ജന്മം നൽകിയിരിക്കുന്നത് എന്നും കൂട്ടി ചേർത്തു. മലയാളത്തിന്റെ മഹാനടൻ കംപ്ലീറ്റ് ആക്ടർ മോഹൻലാലിന്റെ കടുത്ത ആരാധകനാണ് താനെന്നു തുറന്നു പറഞ്ഞിട്ടുള്ള താരമാണ് ജൂനിയർ എൻ ടി ആർ. കൊരടാല ശിവ ഒരുക്കിയ ജനത ഗാരേജ് എന്ന ചിത്രത്തിൽ മോഹൻലാൽ – ജൂനിയർ എൻ ടി ആർ ടീം ഒന്നിച്ചു അഭിനയിച്ചിരുന്നു.