“ഏതൊരു നടിക്കും ജീവിതത്തിൽ ഒരിക്കൽ മാത്രം ലഭിക്കുന്ന റോളാണിത്” ജൂണിനെക്കുറിച്ച് രജീഷ

രജിഷ വിജയൻ നായികാ വേഷത്തിൽ എത്തിയ ജൂൺ ഗംഭീര അഭിപ്രായവുമായി പ്രദർശനം തുടരുകയാണ്. നവാഗതനായ അഹമ്മദ് കബീർ സംവിധാനം നിർവഹിച്ച ചിത്രം ജൂൺ എന്ന പെൺകുട്ടിയുടെ 16 വയസ്സ് മുതൽ വിവാഹം വരെയുള്ള കഥയാണ് പറയുന്നത്. ഇങ്ങനെയൊരു പ്രമേയം മലയാളസിനിമയിൽ അധികം പരീക്ഷിച്ചിട്ടില്ലാത്തതിനാൽ തന്നെ പ്രേക്ഷകർക്കും വേറിട്ടൊരു അനുഭവമായി തീർന്നിരിക്കുകയാണ് ജൂൺ.
തന്റെ റോളിനെ കുറിച്ച് രജിഷ മനസ്സ് തുറക്കുന്നു.

ജൂൺ തികച്ചും വ്യത്യസ്തമായ ഒരു ചിത്രമാണ്. ഏതൊരു നടിക്കും കരിയറിൽ ഒരിക്കൽ മാത്രം കിട്ടുന്ന ഒരു ചിത്രമാണിത്. അത് കൊണ്ട് തന്നെ ഇത് നഷ്ടപ്പെടുത്താൻ ഞാൻ ആഗ്രഹിച്ചില്ല. നൂറ് ശതമാനം ഈ ചിത്രത്തിനായി വർക്കും ചെയ്തു.

ജൂൺ എന്ന കഥാപാത്രത്തിനായി രജീഷ 9 കിലോ തൂക്കം കുറക്കുകയും മുടി മുറിച്ചു കളയുകയും ചെയ്തിരുന്നു. വ്യത്യസ്ത കാലഘട്ടങ്ങളിൽ വേറിട്ട ലുക്കുകളിലാണ് രജിഷയുടെ കഥാപാത്രം എത്തുന്നത്.

ഞാൻ പൂർണമായും ഒരു ഡയറ്റീഷ്യന്റെ നിരീക്ഷണത്തിൽ ആയിരുന്നു. കൂടാതെ നന്നായി വർക്ക് ഔട്ട് ചെയ്തു. പച്ചക്കറികൾ മാത്രമേ കഴിച്ചിരുന്നുള്ളൂ. സത്യം പറഞ്ഞാൽ ദിവസവും 4 മണിക്കൂറോളം വർക്ക് ഔട്ട് ചെയ്യുന്നത് കൂടാതെ ഞാൻ ജീവിതത്തിൽ ഒരിക്കലും കഴിക്കില്ലെന്ന് കരുതിയിരുന്ന ഭക്ഷണ സാധനങ്ങൾ വരെ കഴിച്ചു.”