സിനിമാമേഖലയിൽ നിന്നും ആകെ വിളിച്ച മൂന്നുപേരിൽ ആദ്യത്തെ മനുഷ്യൻ..! അജു വർഗീസിന് നന്ദി പറഞ്ഞ് കാർത്തിക് ശങ്കർ

ചുരുക്കം ചില സിനിമകളിലൂടെ തന്നെ മലയാള സിനിമാ ഇൻഡസ്ട്രിയിൽ ശ്രദ്ധേയമായ സ്ഥാനം നേടിയെടുത്ത പ്രൊഡക്ഷൻ കമ്പനിയാണ് ഫന്റാസ്റ്റിക്ക് ഫിലിംസ്. അജു വർഗീസ്, ധ്യാൻ ശ്രീനിവാസൻ, വിശാഖ് സുബ്രമണ്യം എന്നിവരാണ് ഫന്റാസ്റ്റിക്ക് ഫിലിംസിന്റെ സാരഥികൾ .നിവിൻ പോളി നായകനായെത്തിയ ലൗ ആക്ഷൻ ഡ്രാമ നിർമിച്ചു കൊണ്ടായിരുന്നു ഫന്റാസ്റ്റിക്ക് ഫിലിംസ് സിനിമാ ലോകത്തേക്ക് പ്രവേശിക്കുന്നത്. പിന്നീട് ഹെലൻ, ഗൗതമന്റെ രഥം എന്നീ ചിത്രങ്ങൾ വിതരണത്തിന് എത്തിച്ചും തങ്ങളുടെ സാന്നിധ്യം വീണ്ടും ഉറപ്പിക്കാൻ ഫന്റാസ്റ്റിക്ക് ഫിലിംസിന് സാധിച്ചു. ഇപ്പോൾ പുതിയൊരു ഉദ്യമത്തിന് തുടക്കം കുറിച്ചിരിക്കുകയാണ് ഫന്റാസ്റ്റിക്ക് ഫിലിംസ്.

യൂട്യൂബിൽ ചുരുങ്ങിയ കാലം കൊണ്ട് തന്നെ ശ്രദ്ധേയനായ യൂട്യൂബർ ആണ് കാർത്തിക്ക് ശങ്കർ. ഈ ലോക്ക് ഡൗണ് കാലത്ത് തന്റെ അമ്മയോട് ചേർന്ന് ഒരു കോമഡി സീരീസ് കാർത്തിക്ക് ശങ്കർ ഒരുക്കിയിരുന്നു. വലിയ ഹിറ്റായി മാറിയ ഈ സീരിസിന് ജനപ്രീതി വർദ്ധിച്ചതോടെ ഇതിനോടകം എട്ട് ഭാഗങ്ങൾ അദ്ദേഹം ഒരുക്കുകയും ചെയ്തു. ഇപ്പോൾ ഈ സീരിസിന്റെ ഒമ്പതാം ഭാഗം ഇന്ന് പുറത്തിറങ്ങിയിരിക്കുകയാണ്. ഇത്തവണ പതിവിന് വിപരീതമായി ഫന്റാസ്റ്റിക്ക് ഫിലിംസിന്റെ യുട്യൂബ് ചാനൽ വഴിയാണ് വീഡിയോ പുറത്ത് വിട്ടിട്ടുള്ളത്. വളർന്ന് വരുന്ന ഒരു ചെറുപ്പക്കാരന്റെ പരിശ്രമങ്ങളെ ഉയർത്തികൊണ്ടുവരാൻ വേണ്ടിയാണ് ഫന്റാസ്റ്റിക്ക് ഫിലിംസ് ഈ വീഡിയോ നിർമിക്കുന്നത് എന്ന് സാരഥികൾ അറിയിച്ചു. ഇപ്പോഴിതാ നിർമാതാക്കളായ ഫന്റാസ്റ്റിക്ക് ഫിലിംസിനും അജു വർഗീസിനും നന്ദി അറിയിച്ചിരിക്കുകയാണ് കാർത്തിക് ശങ്കർ.

എന്നെ സ്നേഹിക്കുന്നവർ ഈ പോസ്റ്റ് വായിക്കണം…
അമ്മയും മകനും പാർട്ട് 9 എനിക്ക് ഒരു inspiration ആണ്…. ഒപ്പം ഒരുപാട് പ്രത്യേകതകളും പ്രതീക്ഷകളും… കാരണം … ചെറുപ്പം മുതലേ സ്വപ്നം സിനിമ മാത്രം…. ചെയ്തിരുന്ന ജോലി രാജിവെപ്പിച്ചാണ് ‘അമ്മ എന്നെ ഷോർട്ട് ഫിലിം പിടിക്കാൻ പറഞ്ഞു വിടുന്നത് … അന്നും എന്റെ കഴിവിൽ എന്നെക്കാൾ വിശ്വാസം അമ്മക്കായിരുന്നു… നീണ്ട 8 വർഷങ്ങൾ …സംവിധാന സഹായി ആയി നിന്ന ദിവസങ്ങൾ….കോടമ്പാക്കത്തെ കൈപ്പേറിയ സിനിമ ദിനങ്ങൾ…… .25 ൽ പരം ഷോർട്ട് ഫിലിമുകൾ ചെറുതും വലുതുമായി 30 ന് മുകളിൽ ചെറു വീഡിയോകൾ .. എല്ലാം അത്യാവശ്യം ജനശ്രദ്ധ നേടിയിട്ടുണ്ടെന്ന് വിശ്വസിക്കുന്നു… അപ്പോഴും സിനിമ എന്ന സ്വപ്നം വിദൂരമായിരുന്നു….. പക്ഷെ ഒരിക്കൽ പോലും സിനിമ എന്ന മേഖല വിട്ട് മറ്റൊന്നിലേക്ക് പോകാൻ ആഗ്രഹിച്ചിരുന്നില്ല …. മനുഷ്യരാശിക്ക് ഭീഷണിയായി വന്ന കൊറോണ – Lockdown.. അമ്മയും മോനും സീരീസ് തുടങ്ങി… സീരീസ് ആയിട്ടല്ല തുടങ്ങിയതെങ്കിലും എന്റെ പ്രേക്ഷകർ നൽകിയ സ്നേഹം….അത് സീരീസ് ആയിമാറി… അങ്ങനെ ഇരിക്കുമ്പോൾ വിശാഖ് സുബ്രഹ്മണ്യം വിളിക്കുന്നു…. ഞാൻ ഗുരുതുല്യനായി കാണുന്ന ഒരാളുടെ മുഖത്ത് ക്യാമറ വെക്കാൻ അവസരം….” അജു വർഗ്ഗീസ് “. ഈ മനുഷ്യനെ മനസ്സിന്റെ ഒരു പ്രധാന കോണിൽ പ്രതിഷ്ഠിക്കാൻ തുടങ്ങിയത് കുറച്ചു വര്ഷം മുൻപാണ് . ഇത്രയും ഷോർട്ട് ഫിലിം ചെയ്തിട്ടും സിനിമാമേഖലയിൽ നിന്നും ആകെ വിളിച്ച മൂന്നുപേരിൽ ആദ്യത്തെ മനുഷ്യൻ…. “നമ്മുടെ സ്വന്തം സ്വർഗ്ഗം ” എന്ന ഷോർട്ട് ഫിലിം ഇറങ്ങിയ ദിവസം ഒരു കാൾ.. “മോനെ ഞാൻ അജു വർഗ്ഗീസ് ആണ്.. ഷോർട്ട് ഫിലിം കണ്ടു നന്നായിട്ടുണ്ട്… ” അതിൽ അഭിനയിച്ച മറ്റുള്ളവരെയും അദ്ദേഹം വിളിച്ചു അഭിനന്ദിച്ചു.. (എത്രപേർ ചെയ്യും…അറിയില്ല…) ….അന്നുമുതൽ ഒരു ഗുരുവിനെപോലെ അദ്ദേഹം മനസ്സിലുണ്ട്… ഇന്ന് ആദ്യമായി ഒരു സെലിബ്രിറ്റിയുടെ മുഖത്തു ക്യാമറ വെച്ചത് അതേ അജുച്ചേട്ടന്റെ മുഖത്തും….. എല്ലാം ദൈവാനുഗ്രഹവും നിങ്ങളുടെ പിന്തുണയും ഒപ്പം മാതാപിതാക്കളുടെയും ഗുരുക്കന്മാരുടെയും പ്രാർത്ഥനയും അനുഗ്രഹവും ….!! എന്നെപോലെ പൂജ്യത്തിൽ നിന്ന് തുടങ്ങിയ ഒരാൾക്ക് ഇവിടംവരെ എത്താൻകഴിഞ്ഞത് സ്വപ്നതുല്യമാ…. അതുകൊണ്ട് ഒന്ന് ഉറപ്പിച്ചോ… കളങ്കമില്ലാത്ത അങ്ങ് ആഗ്രഹിക്കുക…. ഗുരുത്വം വിട്ടു കളിക്കാതിരിക്കുക… എല്ലാം ആഗ്രഹിക്കുംപോലെ വരും…. ഈ അവസരത്തിൽ ഒരാൾക്കുകൂടി നന്ദി പറയണം… എന്നെ വിശാഖിന് നിർദ്ദേശിച്ച അദ്വൈത ശ്രീകാന്ത്…!! എന്റെ ഒപ്പം നിസ്വാർത്ഥമായി ജോലി ചെയ്ത എല്ലാ കലാകാരന്മാരേയും ഈ അവസരത്തിൽ ഓർക്കുന്നു … എല്ലാം മുരുകൻ തുണൈ…!