‘കല്യാണം കഴിഞ്ഞിട്ട് 10 – 20 കൊല്ലമായില്ലേ, ഇനിയിപ്പോ എന്താ ഒരുപാട് സംസാരിക്കാനുള്ളേ’ – പ്രതീക്ഷകൾ വാനോളമുയർത്തി ‘കാതൽ’ ട്രയിലർ എത്തി

പുതുസംവിധായകരിലേക്കും പുതുവഴികളിലേക്കും സഞ്ചരിച്ചു കൊണ്ടിരിക്കുന്ന നടനാണ് മമ്മൂട്ടി. സംവിധായകൻ ജിയോ ബേബി മമ്മൂട്ടിയെ നായകനായി ഒരുക്കുന്ന ‘കാതൽ ദ കോർ’ സിനിമയുടെ ട്രയിലർ എത്തി. കുടുംബജീവിതത്തിന്റെ പശ്ചാത്തലത്തിൽ ഒരു ഇമോഷണൽ ‍ഡ്രാമയാണ് സിനിമയെന്നാണ് ട്രയിലർ നൽകുന്ന സൂചന. ജ്യോതികയാണ് ചിത്രത്തിൽ മമ്മൂട്ടിയുടെ നായിക. മാത്യ ദേവസി എന്ന കഥാപാത്രമായാണ് മമ്മൂട്ടി ചിത്രത്തിൽ എത്തുന്നത്. മമ്മൂട്ടി കമ്പനിയുടെ ബാനറിൽ നിർമിച്ച സിനിമ നവംബർ 23ന് തിയറ്ററുകളിൽ എത്തും. ദുൽഖർ സൽമാന്റെ ഉടമസ്ഥതയിലുള്ള വേഫെറർ ഫിലിംസ് ആണ് ചിത്രം കേരളത്തിൽ വിതരണത്തിന് എത്തിക്കുന്നത്.

ആരാധകർ ഇരുകൈയും നീട്ടിയാണ് ട്രയിലർ സ്വീകരിച്ചിരിക്കുന്നത്. കണ്ണൂർ സ്ക്വാഡിന് ശേഷം മമ്മൂട്ടിയുടെ അടുത്ത ഹിറ്റായിരിക്കും കാതൽ എന്നാണ് കമന്റ് ബോക്സുകൾ പറയുന്നത്. പുതുമകൾ തേടുന്ന മമ്മൂട്ടിയുടെ കരിയറിൽ കാതൽ ഒരു പൊൻതൂവലാകട്ടെ എന്ന് ആശംസിക്കുന്നവരും ഉണ്ട്. നീണ്ട ഇടവേളയ്ക്ക് ശേഷം മലയാളത്തിലേക്കുള്ള തന്റെ തിരിച്ചു വരവ് ജ്യോതിക ഈ ചിത്രത്തിലൂടെ ഗംഭീരമാക്കുമെന്നാണ് ട്രയിലർ നൽകുന്ന സൂചന. 2009-ൽ പുറത്തിറങ്ങിയ ‘സീതാകല്യാണം’ ആണ് ജ്യോതിക ഒടുവിലായി അഭിനയിച്ച മലയാള ചിത്രം.

സാലു കെ തോമസ് ഛായാഗ്രാഹണം നിർവഹിക്കുന്ന ചിത്രത്തിൽ മുത്തുമണി, ചിന്നു ചാന്ദിനി, സുധി കോഴിക്കോട്, അലിസ്റ്റർ അലക്സ്, അനഘ അക്കു, ജോസി സിജോ, ആദർശ് സുകുമാരൻ തുടങ്ങിയവരാണ് മറ്റ് പ്രധാന വേഷങ്ങളിലെത്തുന്നത്. ‘കണ്ണൂർ സ്‌ക്വാഡ്’ന്റെ വൻ വിജയത്തിന് ശേഷം മമ്മൂട്ടി കമ്പനിയുടെ ബാനറിൽ എത്തുന്ന ഈ ചിത്രം പ്രേക്ഷകർക്ക് വ്യത്യസ്തമായൊരു കാഴ്ചാനുഭവം സമ്മാനിക്കും എന്ന് നിർമ്മാതാക്കൾ അവകാശപ്പെടുന്നു. ആദർശ് സുകുമാരനും പോൾസൺ സക്കറിയയും ചേർന്ന് തിരക്കഥ ഒരുക്കിയ കാതലിന്റെ പ്രമേയം തന്നെ ആകർഷിച്ച ഒന്നാണെന്ന് തെന്നിന്ത്യൻ താരവും ജ്യോതികയുടെ ഭർത്താവുമായ സൂര്യ നേരത്തെ പറഞ്ഞിരുന്നു. എക്സിക്യൂട്ടീവ് പ്രൊഡ്യൂസർ: എസ്. ജോർജ്, എഡിറ്റിംങ്: ഫ്രാൻസിസ് ലൂയിസ്, സംഗീതം: മാത്യൂസ് പുളിക്കൻ, ഗാനരചന: അൻവർ അലി, ജാക്വിലിൻ മാത്യു, കലാസംവിധാനം: ഷാജി നടുവിൽ, ലൈൻ പ്രൊഡ്യൂസർ: സുനിൽ സിംഗ്, പ്രൊഡക്ഷൻ കൺട്രോളർ: ഡിക്സൺ പൊടുത്താസ്, സൗണ്ട് ഡിസൈൻ: ടോണി ബാബു, വസ്ത്രാലങ്കാരം: സമീറാ സനീഷ്, മേക്കപ്പ്: അമൽ ചന്ദ്രൻ, കോ ഡയറക്ടർ: അഖിൽ ആനന്ദൻ, ചീഫ് അസോസിയേറ്റ് ഡയറക്ടർ: മാർട്ടിൻ എൻ. ജോസഫ്, കുഞ്ഞില മാസിലാമണി, പ്രൊഡക്ഷൻ എക്സിക്യുട്ടീവ്: അസ്ലാം പുല്ലേപ്പടി, സ്റ്റിൽസ്: ലെബിസൺ ഗോപി, ഓവർസീസ് വിതരണം ട്രൂത്ത് ഗ്ലോബൽ ഫിലിംസ്, ഡിജിറ്റൽ മാർക്കറ്റിംഗ് വിഷ്ണു സുഗതൻ, പബ്ലിസിറ്റി ഡിസൈനർ: ആന്റണി സ്റ്റീഫൻ, പിആർഒ: ശബരി.