‘പിണറായിയെക്കുറിച്ച് പറഞ്ഞത് തന്നെയാണ്, പേടിയില്ല’ – ആ തിരുവാതിര അനാവശ്യമായിരുന്നെന്നും കലാഭവൻ അൻസാർ

കഴിഞ്ഞ ദിവസം തിരുവനന്തപുരത്ത് സി പി എം സംഘടിപ്പിച്ച മെഗാ തിരുവാതിരയ്ക്ക് എതിരെ വലിയ തരത്തിലുള്ള വിമർശനമാണ് സോഷ്യൽ മീഡിയയിൽ ഉയർന്നത്. പാർട്ടിക്കുള്ളിൽ തന്നെ വലിയ എതിർസ്വരങ്ങൾ ഉയർന്നതിനെ തുടർന്ന് പാർട്ടി ഒടുവിൽ വീഴ്ച സമ്മതിക്കുകയും ചെയ്തു. കോവിഡ്, ഒമിക്രോൺ ഭീതിയിൽ നിയന്ത്രണങ്ങൾ കർശനമാക്കിയപ്പോൾ ഇത്തരത്തിൽ ഒരു പരിപാടി സംഘടിപ്പിച്ചതും ധീരജിന്റെ ചിതയൊടുങ്ങും മുമ്പ് ഇത്തരത്തിലൊരു പരിപാടി നടത്തിയതുമാണ് പരിഹാസങ്ങൾക്കും വിമർശനങ്ങൾക്കും വിധേയമായത്.

ഈ മെഗാതിരുവാതിരയെ പരിഹസിക്കുന്ന തരത്തിലുള്ള കലാഭലൻ അൻസാറിന്റെ വീഡിയോ ആണ് ഇപ്പോൾ സോഷ്യൽ മീഡിയയിൽ തരംഗമായിരിക്കുന്നത്. അതേസമയം, താൻ ആ വീഡിയോ വൈറലാകാൻ വേണ്ടി ചെയ്തതല്ലെന്നും രാവിലെ നടക്കാൻ പോയ സമയത്ത് ഇക്കാര്യം സംസാരവിഷയമായപ്പോൾ വെറുതെ കാണിച്ചതായിരുന്നെന്നും അൻസാർ വ്യക്തമാക്കുന്നു. മനോരമ ന്യൂസിന് നൽകിയ അഭിമുഖത്തിലാണ് അൻസാർ ഇക്കാര്യം വ്യക്തമാക്കിയത്.

‘രാവിലെ കലൂർ സ്റ്റേഡിയത്തിൽ നടക്കാൻ പോയപ്പോൾ സംസാരത്തിന്റെ ഇടയിൽ തിരുവാതിര വിഷയം വന്നു. ഈ കൊറോണ സമയത്ത് ഇതിന്റെ വല്ല കാര്യവുമുണ്ടോ എന്ന് ചോദിച്ച് വെറുതെ കാണിച്ചതാ. കൂട്ടത്തിലുള്ള എന്റെ സുഹൃത്ത് അത് വീഡിയോ എടുത്ത് വാട്ട്സാപ്പ് ഗ്രൂപ്പിലിട്ടു. അത് പല ഗ്രൂപ്പിലും പ്രചരിക്കുന്നുണ്ട്.’ – അൻസാർ പറഞ്ഞു. തനിക്ക് കക്ഷിരാഷ്ട്രീയമില്ല. സർക്കാരിനെയോ പിണറായി വിജയനെയോ ഒന്നും പറഞ്ഞിട്ടില്ല. തിരുവാതിര നടത്താൻ പാടില്ലായിരുന്നെന്നും അനവസരത്തിൽ ആണ് അത് നടന്നതെന്നും ആ നിലപാടിൽ ഉറച്ചു നിൽക്കുകയാണെന്നും അൻസാർ വ്യക്തമാക്കി. ഉമ്മൻ ചാണ്ടി ആയിരുന്നു മുഖ്യമന്ത്രിയെങ്കിലും താൻ ഇങ്ങനെ തന്നെ പ്രതികരിക്കുമായിരുന്നു എന്നും അദ്ദേഹം പറഞ്ഞു.