യഷ് ഇന്ത്യയ്ക്ക് നഷ്ടമായ ക്ഷുഭിതയൗവനം; ബച്ചന്റെ പിൻഗാമിയെന്ന് കങ്കണ റണൗട്ട്

കന്നഡചിത്രമായ കെ ജി എഫിലൂടെ തെന്നിന്ത്യൻ സൂപ്പർസ്റ്റാർ ആയി കെ ജി എഫ് ചാപ്റ്റർ ടു എത്തിയപ്പോൾ ഇന്ത്യയുടെ തന്നെ സൂപ്പർസ്റ്റാറായി മാറിയിരിക്കുകയാണ് യഷ്. തെന്നിന്ത്യയിൽ നിന്ന് മാത്രമല്ല ബോളിവുഡിൽ നിന്നും താരങ്ങൾ യഷിനെ പ്രശംസകൊണ്ട് മൂടുകയാണ്. ഇപ്പോൾ ബോളിവുഡ് താരം കങ്കണ റണൗട്ട് ആണ് യഷിനെ പ്രകീർത്തിച്ച് എത്തിയിരിക്കുന്നത്. അമിതാഭ് ബച്ചനോട് ആണ് യഷിനെ കങ്കണ റണൗട്ട് ഉപമിച്ചിരിക്കുന്നത്.

ഏതാനും വർഷമായി ഇന്ത്യയ്ക്ക് നഷ്ടപ്പെട്ട ക്ഷുഭിതയൗവനം എന്നാണ് ഇൻസ്റ്റഗ്രാം സ്‌റ്റോറിയിൽ കങ്കണ കുറിച്ചത്. എഴുപതുകൾ മുതൽ അമിതാഭ് ബച്ചൻ ബാക്കിവെച്ച ശൂന്യത യഷ് നികത്തുന്നു, ഗംഭീം എന്നാണ് കങ്കണ കുറിച്ചത്. ഡോൺ, ദീവാർ, അഗ്നിപഥ്, ശക്തി തുടങ്ങിയ ചിത്രങ്ങളിലൂടെയാണ് ക്ഷുഭിതയൗവനം എന്ന പേര് അമിതാഭ് ബച്ചൻ സമ്പാദിച്ചത്. ഏതായാലും കെ ജി എഫ് ചാപ്റ്റർ 1, കെജിഎഫ് ചാപ്റ്റർ ടു എന്നീ ചിത്രങ്ങളിലൂടെ ഇന്ത്യ മുഴുവൻ ആരാധകരെ സ്വന്തമാക്കിയിരിക്കുകയാണ് താരം.

ഏപ്രിൽ 14നാണ് കെ ജി എഫ് ചാപ്റ്റർ ടു റിലീസ് ചെയ്തത്. തിയറ്ററുകളിൽ വൻ സ്വീകരണമാണ് ചിത്രത്തിന് ലഭിച്ചത്. ആർ ആർ ആറിനെയും മറികടക്കുന്ന നേട്ടമാണ് കെ ജി എഫ് ചാപ്റ്റർ ടു നേടിക്കൊണ്ടിരിക്കുന്നത്. ചിത്രത്തിന്റെ ഹിന്ദി പതിപ്പ് മാത്രം മൂന്നു ദിവസങ്ങളിൽ 143.64 കോടി രൂപ സ്വന്തമാക്കി. പ്രമുഖ ട്രേഡ് അനലിസ്റ്റ് ആയ തരൺ ആദർശ് ആണ് ഈ കണക്ക് പുറത്തുവിട്ടത്. ലോകമെമ്പാടുമായി 10000ത്തിലധികം തിയറ്ററുകളിലാണ് കെജിഎഫ് ചാപ്റ്റർ 2 റിലീസ് ചെയ്തത്. ഇന്ത്യയില്‍ 6500 തിയറ്ററുകളില്‍ ചിത്രം പ്രദര്‍ശിപ്പിക്കുന്നുണ്ട് എന്നാണ് പുറത്തുവരുന്ന റിപ്പോര്‍ട്ടുകള്‍. മികച്ച പ്രേക്ഷക പ്രതികരണമാണ് ചിത്രത്തിന് ലഭിച്ചിരിക്കുന്നത്. യാഷ് തന്നെയാണ് രണ്ടാം ഭാഗത്തിലും കേന്ദ്രകഥാപാത്രമായി എത്തുന്നത്. യാഷിന് പുറമേ സഞ്ജയ് ദത്ത്, ശ്രീനിധി ഷെട്ടി, രവീണ ടണ്ഠന്‍, മാളവിക, പ്രകാശ് രാജ് എന്നിവരും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു.