ഹൃദയാഘാതം: നടൻ പുനീത് രാജ്കുമാർ അന്തരിച്ചു; ഞെട്ടലിൽ കന്നഡ സിനിമാലോകം

ബംഗളൂരു: ഹൃദയാഘാതത്തെ തുടർന്ന് കന്നഡ സൂപ്പർസ്റ്റാർ പുനീത് രാജ്കുമാർ അന്തരിച്ചു. നടൻ റഹ്മാൻ സോഷ്യൽ മീഡിയയിലൂടെ പുനിതിന്റെ വേർപാടിൽ അനുശോചനം രേഖപ്പെടുത്തി. ഇന്ന് രാവിലെയാണ് ഹൃദയാഘാതത്തെ തുടർന്ന് പുനീത് രാജ്കുമാറിനെ ബംഗളൂരുവിലെ വിക്രം ആശുപത്രിയിൽ പ്രവേശിപ്പിച്ചത്. വിവരം അറിഞ്ഞ് നിരവധി ആരാധകരാണ് ആശുപത്രിയിലേക്ക് ഇരച്ചെത്തിയത്. വിക്രം ആശുപത്രിയുടെ മുമ്പിൽ ആരാധകർ നിറഞ്ഞുകവിഞ്ഞിരിക്കുകയാണ്.

‘പ്രിയപ്പെട്ടവനേ സമാധാനത്തിൽ വിശ്രമിക്കൂ. അങ്ങിനെയുള്ള ഒരു മനുഷ്യാത്മാവ്, നിങ്ങൾ ഇപ്പോഴും എന്നെപ്പോലുള്ള ആരാധകരുടെ മനസ്സിൽ ഉണ്ടാകും. ഈ ലോകത്ത് നിങ്ങളുടെ അഭാവത്തിൽ ഞാൻ വളരെ ദുഃഖിക്കുന്നു. നായകനായുള്ള നിങ്ങളുടെ ആദ്യ അരങ്ങേറ്റത്തിൽ ഒരിക്കൽ ഞാൻ നിങ്ങളെ കണ്ടുമുട്ടിയെങ്കിലും മറ്റ് മാർഗങ്ങളിലൂടെ നിങ്ങളെ എപ്പോഴും നിരീക്ഷിച്ചു. എന്റെ ഹൃദയം തളരുന്നു. ഇന്നാലില്ലാഹി വ ഇന്നാ ഇലൈഹി രാജിഊൻ. കുടുംബത്തിന് എന്റെ അനുശോചനം.’ – റഹ്മാൻ സോഷ്യൽ മീഡിയയിൽ കുറിച്ചു.

ഇതിഹാസ നടൻ രാജ്‍കുമാറിന്റെ മകനാണ് പുനീത് രാജ്‍കുമാര്‍. കന്നഡ ചലച്ചിത്ര ലോകത്ത് എന്ന് ഏറ്റവും തിരക്കുള്ള നായകനായിരുന്നു പുനീത്. 1975ലാണ് പുനീത് ജനിച്ചത്. ബെട്ടാഡ ഹൂവുവിലെ അപ്പു എന്ന കഥാപാത്രം പുനീതിന് മികച്ച ബാലതാരത്തിനുള്ള ദേശീയ അവാർഡിന് അർഹനാക്കി. 2002 ലെ അപ്പു (2002) എന്ന ചിത്രത്തിലാണ് പുനീത് ആദ്യമായി പ്രധാന കഥാപാത്രമായി അഭിനയിക്കുന്നത്. അഭി (2003), വീര കന്നഡിഗ (2004), മൌര്യ (2004), ആകാശ് (2005), ആരസു (2007), മിലാന (2007), വംശി (2008), റാം (2009), ജാക്കീ (2010), ഹുഡുഗരു (2011), രാജകുമാര (2017) തുടങ്ങിയ വാണിജ്യാടിസ്ഥാനത്തിൽ വിജയകരമായ നിരവധി ചിത്രങ്ങളിൽ അഭിനയിക്കുകയുണ്ടായി. കന്നഡ സിനിമയിലെ ഏറ്റവും ജനപ്രീതിയുള്ള താരവും ഏറ്റവും പ്രതിഫലം വാങ്ങുന്നയാളുമാണ് അദ്ദേഹം.