ഡ്യൂപ്പ് വേണ്ടേ വേണ്ട, ഒറിജിനൽ തീയുടെ നടുവിലൂടെ നടന്ന് മമ്മൂട്ടി, വൈറലായി കണ്ണൂർ സ്ക്വാ‍ഡ് ലൊക്കേഷൻ വീഡിയോ

മമ്മൂട്ടി നായകനായി എത്തിയ ചിത്രം കണ്ണൂർ സ്ക്വാഡ് തിയറ്ററുകളിൽ മികച്ച പ്രതികരണം സ്വന്തമാക്കി പ്രദർശനം തുടരുകയാണ്. ഇതിനിടയിൽ പുറത്തെത്തിയ ചിത്രത്തിന്റെ ലൊക്കേഷൻ വീഡിയോ ആണ് സോഷ്യൽ മീഡിയയിൽ ഇപ്പോൾ വൈറലായിരിക്കുന്നത്. തീയുടെ നടുവിലൂടെ മമ്മൂട്ടി നടക്കുന്ന വീഡിയോ ആണ് ഇപ്പോൾ വൈറലായിരിക്കുന്നത്. മലയാളസിനിമയുടെ പടത്തലവൻ എന്ന അടിക്കുറിപ്പോടെയാണ് വീഡിയോ പ്രചരിക്കുന്നത്.കോസ്റ്റ്യൂം ഡിസൈനർ ആയ അഭിജിത്ത് ആണ് കണ്ണൂർ സ്ക്വാ‍ഡ് സിനിമയുടെ ലൊക്കേഷൻ വീഡിയോ പോസ്റ്റ് ചെയ്തത്. സിനിമയുടെ തുടക്കത്തിലുള്ള ആക്ഷൻ രംഗങ്ങളാണ് ഇത്. കത്തുന്ന വീടിനുള്ളിലേക്ക് മമ്മൂട്ടി നടന്നുപോകുന്നതാണ് വീഡിയോയിൽ കാണുന്നത്.

വി എഫ് എക്സിന്റെയോ ഡ്യൂപ്പിന്റെയോ സഹായമില്ലാതെയാണ് മമ്മൂട്ടി അഭിനയിച്ചതെന്ന് വ്യക്തമാക്കുന്നതാണ് ഈ ലൊക്കേഷൻ വീഡിയോ. നിരവധി കമന്റുകളാണ് മമ്മൂട്ടിയെ അഭിനന്ദിച്ചു കൊണ്ട് എത്തുന്നത്. സംവിധായകൻ റോബി രാജിന്റെ ആദ്യചിത്രമാണ് ഇത്. ഗ്രേറ്റ് ഫാദർ, പുതിയ നിയമം എന്നീ ചിത്രങ്ങളുടെ ഛായാഗ്രാഹകൻ ആയിരുന്നു റോബി രാജ്. കിഷോർ കുമാർ, വിജയരാഘവൻ, അസീസ് നെടുമങ്ങാട്, ശബരീഷ്, റോണി ഡേവി‍ഡ്, മനോജ് കെ യു തുടങ്ങിയ താരങ്ങൾ പ്രധാന വേഷത്തിൽ എത്തുന്ന സിനിമ ഒരു ഇൻവെസ്റ്റിഗേഷൻ ത്രില്ലർ ആണ്. എസ് ജോർജാണ് ചിത്രത്തിന്റെ എക്സിക്യൂട്ടീവ് പ്രൊഡ്യൂസർ.

മുഹമ്മദ് ഷാഫിയുടേതാണ് ചിത്രത്തിന്റെ കഥ. നടൻ റോണി ഡേവിഡ് രാജും മുഹമ്മദ് ഷാഫിയും ചേർന്നാണ് തിരക്കഥ രചിച്ചിരിക്കുന്നത്. മുഹമ്മദ് റാഹിൽ ആണ് ഛായാഗ്രഹണം. ചിത്രത്തിന്റെ സംഗീതം സുഷിൻ ശ്യാമും എഡിറ്റർ പ്രവീൺ പ്രഭാകറുമാണ്. ദുൽഖർ സൽമാന്റെ ഉടമസ്ഥതയിലുള്ള വേഫേയർ ഫിലിംസ് ആണ് ചിത്രം കേരളത്തിൽ വിതരണം നിർവഹിക്കുന്നത്. പാലാ, കൊച്ചി, കണ്ണൂർ, വയനാട്,അതിരപള്ളി, പൂനെ, മുംബൈ എന്നീ സ്ഥലങ്ങളായിരുന്നു പ്രധാന ലൊക്കേഷനുകൾ.