കൊച്ചുണ്ണി വേട്ട തുടങ്ങി; റിലീസിന് മുന്നേ മുതൽമുടക്ക് തിരിച്ചുപിടിച്ച് നിവിൻ പോളിയുടെ ബ്രഹ്മാണ്ഡചിത്രം

ബിഗ് ബജറ്റ് ചിത്രങ്ങൾ സ്വപ്‌നം കാണാൻ പോലും സാധിക്കാതിരുന്ന മലയാള സിനിമ ലോകത്ത് ഇപ്പോൾ എല്ലാം ബിഗ് ബജറ്റ് ചിത്രങ്ങളാണ് ഒരുങ്ങുന്നത്. നിവിൻ പോളിയുടെ കരിയറിലെ ഏറ്റവും ചിലവേറിയ ചിത്രം കായംകുളം കൊച്ചുണ്ണി പ്രദർശനത്തിനൊരുങ്ങുകയാണ്. 45 കോടി മുതൽമുടക്കിൽ ശ്രീ ഗോകുലം മൂവീസ് നിർമിക്കുന്ന ചിത്രത്തിന്റെ സംവിധാനം റോഷൻ ആൻഡ്രൂസാണ്. പൂർണമായ പ്ലാനിങ്ങോട് കൂടി ചിത്രീകരിച്ച ചിത്രമായതിനാൽ ചിലവ് ചുരുക്കുന്നതിലും ചിത്രം വിജയം കണ്ടിട്ടുണ്ട്. ചിത്രത്തിന്റെ മുതൽമുടക്ക് ഏകദേശം പൂർണമായും റിലീസിന് മുന്നേ തിരിച്ചു പിടിച്ചതായാണ് റിപ്പോർട്ട്. സാറ്റലൈറ്റ്, ഡിജിറ്റല്‍ റൈറ്റ്സ്, ഓവർസീസ്‍, തിയറ്റർ അവകാശം, ഡബ്ബിങ് റൈറ്റ്സ് എന്നിങ്ങനെ വിവിധ മേഖലകളിൽ ചിത്രം വാരിക്കൂട്ടിയത് കോടികളാണ്.

സിനിമയുടെ ആഗോള ഡിജിറ്റൽ അവകാശം സ്വന്തമാക്കിയത് ഇറോസ് ഇന്റർനാഷണലാണ്. ഏകദേശം 25 കോടി രൂപയ്ക്കാണ് തമിഴ്, തെലുങ്ക്, മലയാളം റൈറ്റ്സ് ഇവർ നേടിയത്. മ്യൂസിക്ക് റൈറ്റ്സും ഓൾ ഇന്ത്യ തിയറ്റർ അവകാശവും ഇറോസിന്റേതാണ്. സിനിമയുടെ റിലീസിന് ശേഷം പിന്നീട് വരുന്ന ലാഭവിഹിതവും നിർമാതാവിനൊപ്പം പങ്കുവെയ്ക്കുന്ന രീതിയിലാണ് കരാർ. നാല് കോടി രൂപയ്ക്ക് ഫാര്‍സ് ഫിലിംസ് ആണ് കായംകുളം കൊച്ചുണ്ണിയുടെ ഓവര്‍സീസ് റൈറ്റ്‌സ് സ്വന്തമാക്കിയിരിക്കുന്നത്. ഇതിലും റിലീസ് ശേഷം വരുന്ന ലാഭവിഹിതം നിർമാതാവിനും ലഭിക്കും. കൂടാതെ ഹിന്ദി ഡബ്ബിങ് റൈറ്റ്സ് നാല് കോടി. സാറ്റലൈറ്റ് റൈറ്റ്സ് ഏകദേശം പത്ത് കോടിക്ക് മുകളിൽ ലഭിക്കുമെന്നാണ് പ്രതീക്ഷ. എന്തായാലും മലയാളത്തിലെ അടുത്ത നൂറ് കോടി ചിത്രത്തിനുള്ള സാദ്ധ്യതകൾ തള്ളിക്കളയാനാവില്ല. റോഷൻ ആൻഡ്രൂസ് എന്ന സംവിധായകൻ, നിവിൻ പോളി, മോഹൻലാൽ എന്നിവരുടെ സാന്നിദ്ധ്യം അതിന് കൂടുതൽ പ്രതീക്ഷ പകരുന്നു.