മരക്കാരിനു കേരളത്തിലെ തീയേറ്ററുകൾ നൽകിയ അഡ്വാൻസ് തുക; മെഗാ ബ്ലോക്കബ്സ്റ്റർ ചിത്രങ്ങളുടെ ആഗോള കളക്ഷനും മുകളിൽ..!

മലയാളത്തിന്റെ മഹാനടൻ, കംപ്ലീറ്റ് ആക്ടർ മോഹൻലാൽ നായകനായി എത്തുന്ന ബ്രഹ്മാണ്ഡ ചിത്രമാണ് മരക്കാർ അറബിക്കടലിന്റെ സിംഹം. ഇന്ത്യയിലെ ഏറ്റവും മികച്ച ചിത്രത്തിനുള്ള ദേശീയ അവാർഡും നേടിയ ഈ ചിത്രം സംവിധാനം ചെയ്തത് പ്രിയദർശൻ ആണ്. ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ഈ ചിത്രം മലയാളം, തമിഴ്, ഹിന്ദി, കന്നഡ, തെലുങ്കു എന്നിങ്ങനെ അഞ്ചു ഭാഷകളിൽ ആയി അറുപതോളം ലോക രാജ്യങ്ങളിൽ റിലീസ് ചെയ്യാനിരിക്കുന്ന ചിത്രമാണ്. എന്നാൽ കോവിഡ് പ്രതിസന്ധി മൂലം ഏകദേശം രണ്ടു വർഷത്തോളമായി ചിത്രം റിലീസ് ചെയ്യാൻ കഴിയാതെ ഹോൾഡ് ചെയ്യുകയാണ് അണിയറ പ്രവർത്തകർ. അതിനെ തുടർന്ന് ഈ ചിത്രവും ഒടിടി റിലീസ് ആയേക്കാം എന്ന അഭ്യൂഹങ്ങൾ ഇപ്പോൾ ശക്തിപ്പെടുകയാണ്.

എന്നാൽ കേരളത്തിലെ തീയേറ്ററുകാർ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് മരക്കാർ. പ്രേക്ഷകരെ പഴയതു പോലെ തീയേറ്ററുകളിലേക്കു തിരിച്ചു കൊണ്ട് വരാൻ, ഒരു വമ്പൻ മോഹൻലാൽ ചിത്രം തന്നെ വേണമെന്നും അത്തരത്തിലുള്ള ഒരു ചിത്രമാണ് മരക്കാർ എന്നും അവർ പറയുന്നു. മാത്രമല്ല, ഈ ചിത്രം കിട്ടാനായി കേരളത്തിലെ മുന്നൂറോളം തീയേറ്ററുകൾ പത്തും ഇരുപതും മുപ്പതും ലക്ഷം രൂപ വെച്ച് അഡ്വാൻസ് നൽകിയിട്ടുണ്ട് എന്നും തീയേറ്റർ അസ്സോസ്സിയേഷൻ നേതൃത്വത്തിലുള്ള ലിബർട്ടി ബഷീർ പറയുന്നു. ഏകദേശം നാൽപ്പതു കോടിയോളം രൂപയാണ് ഈ ചിത്രത്തിന് കേരളത്തിലെ തീയേറ്ററുകൾ നൽകിയിരിക്കുന്ന അഡ്വാൻസ് എന്നാണ് ലിബർട്ടി ബഷീർ പറയുന്നത്.

മലയാളത്തിലെ ചില മെഗാ ബ്ലോക്കബ്സ്റ്റർ ചിത്രങ്ങൾ ആകെ നേടുന്ന ആഗോള ഗ്രോസിനു സമമോ അതിനു മുകളിലോ ആണ് ഈ അഡ്വാൻസ് തുക എന്നതാണ് ഞെട്ടിക്കുന്ന വസ്തുത. നാൽപതു കോടിക്ക് മുകളിൽ ആഗോള ഗ്രോസ് ഉള്ള മലയാള ചിത്രങ്ങളുടെ ലിസ്റ്റ് വളരെ ചെറുതാണ് എന്നതാണ് സത്യം. ആ ലിസ്റ്റിൽ ഉൾപ്പെട്ട ചിത്രങ്ങളിൽ ഭൂരിഭാഗവും മോഹൻലാൽ തന്നെ നായകനായ ചിത്രങ്ങളാണ് എന്നതാണ് ഇത്രയും തുക അഡ്വാൻസ് ആയി നല്കാൻ തീയേറ്ററുകാർക്കുള്ള ധൈര്യം. മലയാളത്തിലെ ആകെയുള്ള രണ്ടു നൂറു കോടി ഗ്രോസ് നേടിയ ചിത്രങ്ങളും മലയാളത്തിൽ ഏറ്റവും കൂടുതൽ അമ്പതു കോടി ഗ്രോസ് കടന്ന ചിത്രങ്ങളും മോഹൻലാലിന്റേതാണ്. ഏതായാലും ഇത്രയും വലിയ അഡ്വാൻസ് നൽകിയത് കൊണ്ട് തന്നെ മരക്കാർ തീയേറ്റർ റിലീസ് ആവുമെന്ന പ്രതീക്ഷയിലാണ് തീയേറ്റർ അസോസിയേഷനും.