സൂപ്പർ ഹീറോ മിന്നൽ മുരളിയെ ചേർത്തുപിടിച്ച് രാജമൗലി; ആർപ്പു വിളിച്ച് ആരാധകർ

അനന്തപുരിയെ ആവേശത്തിലാഴ്ത്തി ആർ ആർ ആർ ചിത്രത്തിന്റെ സംവിധായകൻ എസ് എസ് രാജമൗലിയും തെലുങ്കിലെ സൂപ്പർ താരങ്ങളായ രാംചരണും ജൂനിയർ എൻ ടി ആറും. ആർ ആർ ആർ ചിത്രത്തിന്റെ പ്രമോഷന്റെ പ്രചാരണാർത്ഥമാണ് തിരുവനന്തപുരത്ത് എത്തിയത്. പ്രചാരണ പരിപാടിയിൽ ടോവിനോ തോമസും അതിഥിതാരമായി എത്തിയത്. ആരാധകർ ആവേശത്തോടെയാണ് ടോവിനോയെ വരവേറ്റത്. ആർ ആർ ആർ സംവിധായകൻ രാജമൗലിയും പ്രമോഷന്റെ ഭാഗമായി എത്തിയിട്ടുണ്ടായിരുന്നു. മിന്നൽ മുരളി ചിത്രത്തെ പ്രകീർത്തിച്ച രാജമൗലി ടോവിനോയെ ചേർത്തു നിർത്തി ആലിംഗനം ചെയ്യാനും മറന്നില്ല.

മലയാളത്തിലാണ് രാജമൗലി സദസിനെ അഭിസംബോധന ചെയ്തത്. രാം ചരണിനെയും ജൂനിയർ എൻ ടി ആറിനെയും നിറഞ്ഞ കൈയടിയോടെയാണ് സദസ് സ്വീകരിച്ചത്. അന്യഭാഷാ ചിത്രങ്ങളെ ഇരു കൈയും നീട്ടി സ്വീകരിക്കുന്ന മലയാളി പ്രേക്ഷകർ ബാഹുബലിക്ക് നൽകിയ പിന്തുണ ആർ ആർ ആറിനും നൽകണമെന്നും അദ്ദേഹം രാജമൗലി അഭ്യർത്ഥിച്ചു. കേരളത്തിലെ ഷൂട്ടിംഗ് അനുഭവങ്ങൾ പങ്കുവെച്ച അദ്ദേഹം കലാകാരൻമാരെ പിന്തുണയ്ക്കുന്ന നാടാണ് കേരളമെന്നും പറഞ്ഞു.

തങ്ങളോട് കാണിക്കുന്ന സ്നേഹത്തിന് നന്ദിയുണ്ടെന്ന് താരങ്ങളും പറഞ്ഞു. ജനുവരി ഏഴിനാണ് ആർ ആർ ആർ തിയറ്ററുകളിലേക്ക് എത്തുന്നത്. 400 കോടി മുടക്കിയാണ് ചിത്രം നിർമിച്ചിരിക്കുന്നത്. സ്വാതന്ത്ര്യ സമര കാലഘട്ടത്തിലെ കഥ പറയുന്ന ചിത്രത്തിൽ ആലിയ ഭട്ടാണ് നായിക. ചിത്രത്തിൽ ബോളിവുഡ് താരം അജയ് ദേവ്ഗണും പ്രധാന വേഷത്തിൽ എത്തുന്നുണ്ട്.