“എന്നെ പഞ്ഞിക്കിടാനല്ലേ..!” ബൗൾ ചെയ്യുന്ന വീഡിയോക്ക് കമന്റിട്ട സഞ്ജുവിന് രസകരമായ മറുപടിയുമായി ചാക്കോച്ചൻ

പ്രേക്ഷകരിൽ നിന്നും മികച്ച പ്രതികരണങ്ങൾ നേടിയ ചിത്രങ്ങളുമായി ഇപ്പോൾ മലയാള സിനിമയിൽ നിറഞ്ഞു നിൽക്കുന്ന താരമാണ് കുഞ്ചാക്കോ ബോബൻ. നായാട്ട്, നിഴൽ എന്നിങ്ങനെ അവസാനം പ്രേക്ഷകരിലേക്ക് എത്തിയ സിനിമകൾക്ക് ഗംഭീര അഭിപ്രായമാണ് ലഭിച്ചത്. തന്റെ വിശേഷങ്ങൾ എല്ലാം തന്നെ സോഷ്യൽ മീഡിയയിലൂടെ പ്രേക്ഷകരുമായി പങ്ക് വെക്കാറുള്ള ചാക്കോച്ചൻ ബൗൾ ചെയ്യുന്ന ഒരു വീഡിയോ ഇൻസ്റ്റാഗ്രാമിൽ പങ്ക് വെച്ചിട്ടുണ്ട്.നല്ല ദിനങ്ങൾ വരുമെന്ന പ്രതീക്ഷ പങ്ക് വെച്ചാണ് ചാക്കോച്ചൻ വീഡിയോ പങ്ക് വെച്ചിരിക്കുന്നത്.

നിരവധി സെലിബ്രിറ്റികൾ വീഡിയോയിൽ കമന്റുകളുമായി വന്നിട്ടുണ്ട്. അതിൽ ഏറെ ശ്രദ്ധേയമായ ഒന്നാണ് ഇന്ത്യൻ ക്രിക്കറ്റ് താരം സഞ്ജു സാംസൺ കുറിച്ച കമന്റ്. ഒരു ബാറ്റ്സ്മാന്റെ ആവശ്യം ഉണ്ടെന്ന് തോന്നുന്നുവെന്നാണ് സഞ്ജു കുറിച്ചത്. ‘എന്നെ പഞ്ഞിക്കിടാൻ അല്ലേ’ എന്നാണ് ചാക്കോച്ചൻ അതിന് മറുപടി നൽകിയത്. നിലവിൽ ഐപിഎലിൽ രാജസ്ഥാൻ റോയൽസിന്റെ ക്യാപ്റ്റനാണ് സഞ്ജു. കോവിഡ് മൂലം നിർത്തിവെച്ചിരിക്കുന്ന ഐപിഎൽ UAEയിൽ തുടരുമെന്നാണ് അറിയുവാൻ കഴിയുന്നത്. ക്യാപ്റ്റൻ എന്ന നിലയിൽ ടീമിന് വേണ്ടി മികച്ച നേട്ടങ്ങൾ കൈവരിക്കുവാൻ സഞ്ജുവിന് കഴിയുമെന്ന് തന്നെയാണ് ഏവരുടെയും വിശ്വാസം.