പ്രിയ ജോഫിൻ ഏറെ കൈപ്പുണ്യമുളള കയ്യാണ് നിനക്ക് കൈ തന്നിരിക്കുന്നത്; തുടക്കം പൊന്നാകട്ടെ!!! ദി പ്രീസ്റ്റ് സംവിധായകന് ആശംസയുമായി ലാൽ ജോസ്

പുതുമുഖ സംവിധായകർക്ക് ഏറെ പ്രോത്സാഹനവും ഉയർന്നുവരുവാൻ എല്ലാ സാഹചര്യങ്ങളും പകർന്നു നൽകുന്ന ഒരു വലിയ വ്യക്തിത്വത്തിന് ഉടമയാണ് മമ്മൂക്കയെന്ന മലയാളികളുടെ സൂപ്പർസ്റ്റാർ. അദ്ദേഹം കൈപിടിച്ചുയർത്തിയ പലരും ഇന്ന് മലയാളസിനിമയുടെ ഒഴിവാക്കാനാവാത്ത സംവിധായകരാണ്. അതിൽ ഒരാളാണ് ലാൽ ജോസ്. ഒരു മറവത്തൂർ കനവ് എന്ന മമ്മൂട്ടി ചിത്രത്തിലൂടെയാണ് ലാൽ ജോസിന്റെ തുടക്കം. ഇപ്പോഴിതാ തന്റെ പുതിയ ചിത്രമായ ദി പ്രീസ്റ്റിലൂടെ മമ്മൂട്ടി മറ്റൊരു യുവസംവിധായകനെ കൂടി സിനിമാലോകത്തേക്ക് കൈ പിടിച്ചുയർത്തുകയാണ്. ജോഫിൻ ടി ചാക്കോയെന്ന ആ യുവസംവിധായകന് എല്ലാ വിധ ആശംസകളും നേർന്നിരിക്കുകയാണ് ലാൽ ജോസ്.

മുപ്പത്തിയൊന്ന് വയസ്സുളള ചെറുപ്പക്കാരന്റെ സിനിമാ സ്വപ്നത്തിനൊപ്പം നിൽക്കാൻ മമ്മൂട്ടിയെന്ന മഹാനടൻ തീരുമാനിച്ചയിടത്താണ് എന്റെ ജീവിതത്തിന്റെ റൂട്ട് മാറുന്നത്. എന്നെപോലെ സിനിമയുടെ വലിയ കോട്ടവാതിലുകൾക്കപ്പുറത്ത് പകച്ച് നിന്നിരുന്ന എത്രയോ നവാഗത സംവിധായകർ ആ ബലിഷ്ഠമായ കൈപിടിച്ച് ഇപ്പുറം കടന്നിരിക്കുന്നു. ഇരുപത്തിനാല് കൊല്ലം മുമ്പ് ഒരു ഡിസംബർ മാസത്തിൽ മറവത്തൂർ കനവിലെ ചാണ്ടിയോട് മൈക്കിലൂടെ ആക്ഷൻ പറഞ്ഞപ്പോൾ കൺമുമ്പിൽ മഹാനടൻ ഞങ്ങളുടെ കഥാപാത്രമായി മാറുമ്പോൾ ഉളളിൽ മുഴങ്ങിയ പ്രാർത്ഥനകൾ. അതേ ഗുരുത്വ ചിന്തയോടെ ഇക്കുറി മമ്മൂക്ക അവതരിപ്പിക്കുന്ന നവാഗത സംവിധായകൻ ജോഫിൻ ടി. ചാക്കോക്ക് എല്ലാ വിജയാശംസകളും നേരുന്നു. 🙏
പ്രിയ ജോഫിൻ, ഏറെ കൈപ്പുണ്യമുളള കയ്യാണ് നിനക്ക് കൈ തന്നിരിക്കുന്നത്. തുടക്കം പൊന്നാകട്ടെ!!!
ഇതാ “ദി പ്രീസ്റ്റിന്റെ” പോസ്റ്റർ ❤️