കണ്ണിൽ കുത്തുന്ന തേനീച്ച; പുതിയ ചിത്രവുമായി ലാൽജോസ്, ‘സോളമന്റെ തേനീച്ചകൾ’ ടൈറ്റിൽ പോസ്റ്റർ

മഴവിൽ മനോരമ ചാനലിലെ നായിക – നായകൻ പരിപാടിയിലെ വിജയികളെ കഥാപാത്രങ്ങളാക്കി സംവിധായകൻ ലാൽ ജോസ് ഒരുക്കുന്ന ചിത്രത്തിന്റെ ടൈറ്റിൽ പോസ്റ്റർ പുറത്ത്. ‘സോളമന്റ് തേനീച്ചകൾ’ എന്നാണ് ചിത്രത്തിന് പേരിട്ടിരിക്കുന്നത്. കണ്ണിലെ കൃഷ്ണമണിയിൽ തേനീച്ച കുത്തുന്നതാണ് ടൈറ്റിൽ പോസ്റ്റർ. തന്റെ ഏറ്റവും വലിയ ചിത്രവുമായാണ് സംവിധായകൻ എത്തുന്നത്. സിനിമയുടെ ചിത്രീകരണം പൂർത്തിയായി.

ചിത്രത്തിൽ സോളമൻ എന്ന കേന്ദ്ര കഥാപാത്രമായി എത്തുന്നത് ജോജു ജോർജ് ആണ്. ജോജുവിന് ഒപ്പം ജോണി ആന്റണിയും ഒരു പ്രധാനവേഷം ചെയ്യുന്നുണ്ട്. ഇവരെ കൂടാതെ മഴവിൽ മനോരമയിലെ നായിക – നായകൻ ഷോയിലെ വിജയികളും കഥാപാത്രങ്ങളായി എത്തുന്നു. എൽ ജെ ഫിലിംസിന്റെ ബാനറിൽ ലാൽജോസ് തന്നെ നിർമിക്കുന്ന ചിത്രം വിതരണം ചെയ്യുന്നതും എൽ ജെ ഫിലിംസ് ആണ്. പി ജി പ്രഗീഷ് ആണ് ചിത്രത്തിന്റെ രചന. മൂന്നു വർഷം മുൻപ് ലാൽ ജോസ് ഒരുക്കിയ ബിജു മേനോൻ ചിത്രമായ നാല്പത്തിയൊന്നിന് തിരക്കഥ രചിച്ചത് പി ജി പ്രഗീഷ് ആയിരുന്നു.

ചിത്രത്തിലെ ഗാനങ്ങളും പശ്ചാത്തലസംഗീതവും ഒരുക്കുന്നത് വിദ്യാസാഗർ ആണ്. അജ്മൽ സാബു ആണ് ചിത്രത്തിന് ക്യാമറ ചലിപ്പിക്കുന്നത്. എഡിറ്റർ – രഞ്ജൻ എബ്രഹാം. ലാൽ ജോസിന്റെ ചിത്രമായി അവസാനം എത്തിയത് മ്യാവു ആയിരുന്നു. ഇഖ്ബാൽ കുറ്റിപ്പുറം രചിച്ച് സൗബിൻ ഷാഹിർ നായകനായി എത്തിയ ചിത്രത്തിൽ മംമ്ത മോഹൻദാസ് ആയിരുന്നു നായിക. ഒരു മറവത്തൂർ കനവ്, ചന്ദ്രനുദിക്കുന്ന ദിക്കിൽ, രണ്ടാം ഭാവം, മീശ മാധവൻ, പട്ടാളം, രസികൻ, ചാന്തുപൊട്ട്, മുല്ല, നീലത്താമര, സ്പാനിഷ് മസാല, ഡയമണ്ട് നെക്ലേസ്, പുള്ളിപ്പുലികളും ആട്ടിൻകുട്ടിയും എന്നീ ചിത്രങ്ങളിലെ സൂപ്പർ ഹിറ്റ് ഗാനങ്ങൾ ലാൽ ജോസിന് വേണ്ടി ഒരുക്കിയ വിദ്യാസാഗർ ഒൻപതു വർഷത്തെ ഇടവേളയ്ക്കു ശേഷമാണ് ലാൽ ജോസുമായി വീണ്ടും ഒന്നിക്കുന്നത്.