‘അമ്മ ഒരു സംഘടനയാണ്, അവിടെ പെൻഷൻ കൊടുക്കുന്നുണ്ട്, ഒരു ക്ലബിൽ നിന്നും അത് കിട്ടില്ല’; അമ്മ സംഘടന ക്ലബ് അല്ലെന്ന് മേജർ രവി

മലയാള സിനിമയിലെ അഭിനേതാക്കളുടെ സംഘടനയായ ‘അമ്മ’ ഒരു ക്ലബ് ആണെന്ന തരത്തിലുള്ള പരാമർശങ്ങളോട് പ്രതികരിച്ച് സംവിധായകനും അഭിനേതാവുമായ മേജർ രവി. അമ്മ ജനറൽ സെക്രട്ടറി ഇടവേള ബാബു ആയിരുന്നു സംഘടന ഒരു ക്ലബ് ആണെന്ന തരത്തിലുള്ള പരാമർശങ്ങൾ നടത്തിയത്. എത്രയോ പാവപ്പെട്ടവര്‍ക്ക് അവിടെ നിന്നും പെന്‍ഷന്‍ കൊടുക്കുന്നുണ്ടെന്നും ഒരു ക്ലബ്ബില്‍ നിന്നും ഒരിക്കലും പെന്‍ഷന്‍ കിട്ടില്ലെന്നും മേജർ രവി പറഞ്ഞു. ആ വാക്ക് എന്ത് അടിസ്ഥാനത്തിലാണ് ഉപയോഗിച്ചതെന്ന് ബാബുവിനോട് തന്നെ ചോദിക്കണം. ഇങ്ങനെയൊരു സംഘടനയെ ക്ലബ്ബ് എന്ന് പറയുന്നത് ശരിയല്ലെന്നും എത്രയോ വലിയ ആര്‍ടിസ്റ്റുകള്‍ അതിനകത്ത് അംഗങ്ങളായുണ്ടെന്നും മേജർ രവി പറഞ്ഞു. അവര് പലരെയും സഹായിക്കുന്നുണ്ട്, സമൂഹത്തിനെ സഹായിക്കുന്നുണ്ട്. അങ്ങനെ ഒരു സ്ഥലത്തിന് കൊടുക്കേണ്ട പേരല്ല ക്ലബ് എന്നുള്ളത്. അമ്മ എന്നത് ഒരു സംഘടനയാണെന്നും അതിനെ ക്ലബ്ബ് എന്ന് പറയുന്നത് തെറ്റ് തന്നെയാണെന്നും അങ്ങനെ പറയരുതെന്നും മേജർ രവി പറഞ്ഞു.

താനൊരു ആന്റി സോഷ്യൽ എലമെന്റ് ആണെന്നും മേജർ രവി വ്യക്തമാക്കി. വൈകുന്നേരമായാൽ രണ്ടെണ്ണം അടിക്കുന്ന പട്ടാളക്കാരിൽപ്പെട്ട ആളല്ല താനെന്നും തനിക്ക് മദ്യപാനവും സിഗരറ്റ് വലിയും ഇല്ലെന്നും അദ്ദേഹം പറഞ്ഞു. നേവി ക്ലബ്, ഗോൾഫ് ക്ലബ്, കൊച്ചിൻ ക്ലബ് തുടങ്ങിയ ക്ലബുകളിൽ തനിക്ക് മെമ്പർഷിപ്പ് ഉണ്ടെന്നും വർഷം പണമടച്ച് പോരുമെന്നും ക്ലബ് ആസ്വാദനത്തിന് വേണ്ടി ഉപയോഗിക്കുന്ന ആളല്ല താനെന്നും അദ്ദേഹം വ്യക്തമാക്കി. അമ്മ ഒരു ക്ലബ്ബ് ആണെന്ന് ബാബു പറഞ്ഞത് എന്തുകൊണ്ടാണ് എന്ന് ഇതുവരെ തനിക്ക് മനസിലായിട്ടില്ലെന്നും അദ്ദേഹം വ്യക്തമാക്കി.

‘അമ്മ’യുടെ ഉള്ളിലേക്ക് താനിതുവരെ പോയിട്ടില്ലെന്നും ഒരുവട്ടം ഉദ്ഘാടനത്തിന് വിളിച്ചപ്പോൾ മാത്രമാണ് പോയതെന്നും മേജർ രവി പറഞ്ഞു. അതിനകത്ത് ചെന്നതിന് ശേഷം ആണെങ്കിൽ ഇത് ക്ലബ് ആണോ അല്ലയോ എന്ന് ആധികാരികമായി പറയാൻ കഴിയും. താന്‍ അതിനകത്ത് മെമ്പര്‍ ആയിരുന്നെങ്കില്‍ ആധികാരികമായി ഉത്തരം പറഞ്ഞേനെ. ഗണേഷ് എന്ത് പറഞ്ഞോ അതുപോലെ താനും ചിലപ്പോള്‍ പറയുമായിരിക്കും. പക്ഷെ, ഇപ്പോള്‍ അത് അറിയാത്തത് കൊണ്ട് താന്‍ അതില്‍ കമന്റ് ചെയ്യുന്നില്ലെന്നും അദ്ദേഹം പറഞ്ഞു. സാന്താക്രൂസ് സിനിമയുടെ പ്രമോഷന് എത്തിയപ്പോൾ ആയിരുന്നു മേജർ രവി ഇങ്ങനെ പറഞ്ഞത്. പീഡനപരാതിയിൽ വിജയ് ബാബുവിന് എതിരെ നടപടി എടുക്കാത്തത് എന്താണെന്ന് ചോദിച്ചപ്പോൾ ആയിരുന്നു ഇടവേള ബാബു ക്ലബ് പരാമർശം നടത്തിയത്. ‘വിജയ് ബാബു നിരവധി ക്ലബ്ബുകളില്‍ അംഗമാണ്. അമ്മ അതില്‍ ഒരു ക്ലബ്ബ് മാത്രമാണ്. മറ്റു ക്ലബ്ബുകള്‍ ഒന്നും തന്നെ വിജയ് ബാബുവിനെ പുറത്താക്കിയിട്ടില്ല’ – എന്നായിരുന്നു ഇടവേള ബാബു പറഞ്ഞത്.