മേജർ രവിയുടെ ഗ്രാമീണ പശ്ചാത്തലത്തിലുള്ള പ്രണയ കഥയിലൂടെ സുരേഷ് ഗോപിയും ആശ ശരത്തും ഒന്നിക്കുന്നു

പുതിയൊരു ജോണർ ചിത്രമൊരുക്കുവാനുള്ള തയ്യാറെടുപ്പിലാണ് സംവിധായകൻ മേജർ രവി. ആർമി ചിത്രങ്ങളിലൂടെ പ്രേക്ഷകർക്ക് സുപരിചിതനായ അദ്ദേഹം ഇനി ഗ്രാമീണ പശ്ചാത്തലത്തിലുള്ള ഒരു പ്രണയ ചിത്രമാണ് ഒരുക്കുന്നത്. സുരേഷ് ഗോപിയും ആശ ശരത്തും പ്രധാന കഥാപാത്രങ്ങളെ അവതരിപ്പിക്കുന്നുവെന്നാണ് അറിയുവാൻ കഴിയുന്നത്. കർമ്മയോദ്ധ, 1971 ബിയോൻഡ് ബോർഡേഴ്‌സ് എന്നീ ചിത്രങ്ങളിൽ മേജർ രവിയുടെ സംവിധാനത്തിന് കീഴിൽ ആശ ശരത് അഭിനയിച്ചിട്ടുണ്ട്. സുരേഷ് ഗോപിയെ വെച്ച് മേജർ രവി ഒരുക്കുന്ന ആദ്യ ചിത്രം കൂടിയാണിത്.

മേജർ രവി തന്നെ കഥ ഒരുക്കിയ ചിത്രത്തിന്റെ തിരക്കഥ ഒരുക്കുന്നത് ഉബേഷ് പി ഉണ്ണിയും സനൽ ശിവറാമുമാണ്. 34 വർഷങ്ങൾക്ക് ശേഷം കണ്ടുമുട്ടുന്ന ഹൈസ്ക്കൂൾ കമിതാക്കളുടെ കഥയാണ് ചിത്രം പറയുന്നത്. ബിജോയ്, ബിനോജ്, ബിനോയ് എന്നിവർ ചേർന്ന് ബി3 വിഷ്വൽ ആർട്സിന്റെ ബാനറിൽ നിർമിക്കുന്ന ചിത്രത്തിന്റെ ഛായാഗ്രഹണം ദി കുങ്‌ഫു മാസ്റ്റർ എന്ന ചിത്രത്തിലൂടെ അരങ്ങേറ്റം കുറിച്ച മേജർ രവിയുടെ മകൻ അർജുൻ രവിയാണ്.