ഫഹദ് ചിത്രം മാലിക് തിയേറ്ററുകളിലേക്ക്, റിലീസ് തീയതി പുറത്ത് വിട്ടു!

മഹേഷ് നാരായണന്‍ ഫഹദ് ഫാസിലിനെ നായകനാക്കി ഒരുക്കിയ മാലിക് റിലീസ് തീയതി പ്രഖ്യാപിച്ചു. നീണ്ട നാളത്തെ ഇടവേളയ്‌ക്കു ശേഷം ആണ് ഒരു മലയാള ചിത്രത്തിന്റെ തിയേറ്റർ റിലീസ് തീയതി പ്രഖ്യാപിക്കുന്നത്. 2021 മേയ് 13ന് തിയറ്ററുകളിലെത്തും. പെരുന്നാൾ റിലീസ് ആയി ചിത്രം പ്രേക്ഷകർക്ക് മുന്നിൽ എത്തും. ചിത്രത്തിന്റെ സെൻസറിങ് പൂർത്തിയായി ചിത്രത്തിന് ക്ലീൻ യു സെർട്ടിഫിക്കറ്റും ലഭിച്ചുവെന്നാണ് അണിയറ പ്രവർത്തകർ അറിയിച്ചിരിക്കുന്നത്.

ഇരുപത് വയസ് മുതല്‍ 57 വയസ് വരെയുള്ള സുലൈമാന്റെയും അയാളുടെ തുറയുടെയും ജീവിതമാണ് മാലിക് ചിത്രം പറയുന്നത്.പൊളിറ്റിക്കല്‍ ത്രില്ലര്‍ എന്നാണ് സംവിധായകന്‍ മഹേഷ് നാരായണന്‍ ചിത്രത്തെക്കുറിച്ച് പറഞ്ഞിരിക്കുന്നത്. സിനിമയ്ക്ക് വേണ്ടി ഫഹദ് ഫാസില്‍ 20 കിലോയോളം ഭാരം കുറച്ചിരുന്നു. ചിത്രത്തിനായി ഫഹദ് നടത്തിയ മേക്കോവർ വലിയ വാർത്ത ആയിരുന്നു. ലൊക്കേഷനിൽ നിന്നുള്ള താരത്തിന്റെ ചിത്രങ്ങളും വലിയ പ്രേക്ഷക ശ്രദ്ധ നേടിയിരുന്നു.27 കോടിയോളം മുതല്‍മുടക്കിൽ ഒരുക്കുന്ന ബിഗ് ബഡ്ജറ്റ് ചിത്രമായ  മാലിക് ആന്റോ ജോസഫ് ഫിലിം കമ്പനിയുടെ ബാനറില്‍ ആന്റോ ജോസഫ് ആണ് നിര്‍മ്മിക്കുന്നത്.

ചിത്രത്തിൽ ഫഹദിനെ കൂടാതെ ജോജു ജോര്‍ജ്, ദിലീഷ് പോത്തന്‍, വിനയ് ഫോര്‍ട്ട്, നിമിഷ സജയന്‍, ചന്ദുനാഥ് എന്നിവരും പ്രധാന വേഷത്തിൽ യെത്തുന്നുണ്ട്. ടേക്ക് ഓഫിന് ശേഷം സാനു ജോണ്‍ വര്‍ഗീസ് മഹേഷ് നാരായണന് വേണ്ടി ഫ്രെയിമുകള്‍ ഒരുക്കുന്നു. സംഗീതം ഒരുക്കിയിരിക്കുന്നത് സുഷിന്‍ ശ്യാമാണ്. ബാഹുബലി സ്റ്റണ്ട് ഡയറക്ടര്‍ ആയിരുന്ന ലീ വിറ്റേക്കറാണ് ആക്ഷന്‍ കൊറിയോഗ്രഫി ചെയ്തിരിക്കുന്നത്.