വെള്ളപ്പൊക്കത്തിൽ വീണ്ടും കുടുങ്ങി മല്ലികാ സുകുമാരൻ; രക്ഷിച്ചത് ഫയർഫോഴ്സെത്തി

ഇന്നലെ അർദ്ധരാത്രി തോരാതെ മഴ പെയ്തതിനെ തുടർന്ന് തിരുവനന്തപുരത്ത് നിരവധി പ്രദേശങ്ങളിൽ വെള്ളം കയറി. താഴ്ന്ന പ്രദേശങ്ങളിൽ ഉള്ള നാനൂറിലേറെ വീടുകളിലാണ് വെള്ളം കയറിയത്. മഴയ്ക്കൊപ്പം മുന്നറിയിപ്പില്ലാതെ അരുവിക്കര ഡാമിന്റെ ഷട്ടറുകൾ കൂടി തുറന്നതോടെയാണ് ജനങ്ങൾ ദുരിതക്കയത്തിലായത്. ഇന്നലെ ഉച്ചവരെ ഗതാഗത തടസ്സവും ഉണ്ടായിരുന്നു. കരമനയാറും കിള്ളിയാറും കരകവിഞ്ഞതോടെ തീരം മുങ്ങി. കുണ്ടമൺ കടവ് മുതൽ ഗൗരീശ പട്ടം വരെയുള്ള വീടുകളിൽ വെള്ളം കയറി. പിന്നീട് ഫയർഫോഴ്സ് എത്തിയാണ് 13 പേരെ രക്ഷിച്ചത്.

കരമനയാർ കരകവിഞ്ഞതോടെ മല്ലിക സുകുമാരന്റെ വീട്ടിലും വെള്ളം കയറി. കഴിഞ്ഞവർഷവും താരത്തിന്റെ വീട്ടിൽ വെള്ളം കയറിയിരുന്നു. ഇത്തവണയും ഫയർഫോഴ്സ് എത്തിയാണ് മള്ളിക സുകുമാരനെ സുരക്ഷിതമായ സ്ഥാനത്തേക്ക് മാറ്റിയത്. റവന്യൂമന്ത്രിയുടെ വീട്ടിലുൾപ്പടെ നഗരത്തിൽ വെള്ളം കയറി. ദുരിതം തീവ്രമാകാൻ കാരണം ജില്ലാ ഭരണകൂടത്തിന്റെ അനാസ്ഥയാണെന്ന ആരോപണം ശക്തമായിട്ടുണ്ട്.

ഇതിനിടെ മാസങ്ങളുടെ കാത്തിരിപ്പിനൊടുവിൽ ഇന്നലെ രാവിലെ പൃഥ്വിരാജ് കൊച്ചിയിൽ വിമാനം ഇറങ്ങി. 58 അംഗ സംഘം ഡൽഹി വഴിയുള്ള പ്രത്യേക എയർ ഇന്ത്യയുടെ വിമാനത്തിൽ ആണ് കൊച്ചി നെടുമ്പാശ്ശേരിയിൽ വിമനമിറങ്ങിയത്. ഇന്നലെ മുതൽ 14 ദിവസം അണിയറ പ്രവർത്തകർ ക്വറന്റൈനിൽ ആയിരിക്കും.
ഫോർട്ട് കൊച്ചിയിൽ ആണ് പ്രിത്വിരാജിനായി ക്വറന്റൈൻ കേന്ദ്രം ഒരുക്കിയിരിക്കുന്നത്. വിമാനത്താവളത്തിൽ നിന്ന് സ്വയം കാറോടിച്ചാണ് പൃഥ്വിരാജ് ക്വറന്റൈനിലേക്ക് പോയത്.