കാത്തിരിപ്പിന് വിരാമമിട്ട് മാമാങ്കം ടീസർ നാളെ പുറത്തിറങ്ങുന്നു !

ആരാധകർ ഒന്നടങ്കം കാത്തിരിക്കുന്ന മമ്മൂട്ടിയുടെ ബിഗ് ബജറ്റ് ചിത്രം മാമാങ്കത്തിന്റെ ടീസർ നാളെ രാവിലെ പത്ത് മണിക്ക് ചിത്രത്തിന്റെ നിർമാതാക്കളായ കാവ്യ ഫിലിംസ് റിലീസ് ചെയ്യും. ചിത്രം അണിയിച്ചൊരുക്കുന്നത് കേരളത്തിലെ യുദ്ധവീരന്മാരുടെ ഈ പോരാട്ട വീര്യം ലോക സമക്ഷം എത്തിക്കുക എന്ന ലക്ഷ്യത്തോടെയാണ്. മലയാളത്തിൽ ഇന്നേവരെ നിർമ്മിച്ചിട്ടുള്ള ഏറ്റവും ചിലവ് കൂടിയ ചിത്രമായിരിക്കും മമ്മൂട്ടിയുടെ മാമാങ്കം. എം പത്മകുമാർ സംവിധാനം ചെയ്യുന്ന ഈ ചിത്രത്തിന്റെ തിരക്കഥ രചിച്ചിരിക്കുന്നത് ശങ്കർ രാമകൃഷ്ണനാണ്.

മലയാളത്തിനു പുറമേ തമിഴ് ഹിന്ദി തെലുങ്ക് എന്നീ ഭാഷകളിലും ചിത്രം റിലീസ് ചെയ്യുന്നുണ്ട്. ഉണ്ണി മുകുന്ദന്‍, കനിഹ, അനു സിത്താര, സിദ്ദീഖ്, തരുണ്‍ അറോറ, സുദേവ് നായര്‍, സുരേഷ് കൃഷ്ണ, രതീഷ് കൃഷ്ണ, പ്രാചി തെഹ്ലാൻ, മാസ്റ്റര്‍ അച്യുതന്‍ എന്നിവരാണ് ചിത്രത്തിൽ മറ്റ് കഥാപാത്രങ്ങളായി എത്തുന്നത്. കാവ്യാ ഫിലിംസിന്റെ ബാനറിൽ വേണു കുന്നപ്പള്ളി ആണ് ചിത്രം നിർമ്മിക്കുന്നത്. കണ്ണൂര്‍,ഒറ്റപ്പാലം,കൊച്ചി, എറണാകുളം,വാഗമണ്‍ എന്നീ സ്ഥലങ്ങളിൽ ചിത്രീകരിച്ച മാമാങ്കത്തിന്റെ സംഗീതമൊരുക്കിയിരിക്കുന്നത് എം ജയചന്ദ്രനാണ്. നെട്ടൂരിലെ 20 ഏക്കർ ഭൂമിയിലാണ് മാമാങ്കത്തിന്റെ യുദ്ധരംഗങ്ങൾ അടക്കം ചിത്രീകരിച്ചിട്ടുള്ളത്.10 കോടിയിലേറെ രൂപ ചിലവാക്കി ആണ് ആ പടുകൂറ്റൻ സെറ്റ് ഒരുക്കിയത്. ചിത്രത്തിനായുള്ള കാത്തിരിപ്പിലാണ് ആരാധകർ.