അവളുടെ പുഞ്ചിരിയ്ക്കുന്ന മുഖം മനസില്‍നിന്നും മായുന്നില്ല !!! ദേവനന്ദയെ ഓര്‍മിക്കാന്‍ ഈ അധികദിവസത്തെ മാറ്റിവയ്ക്കാം ; മമ്മൂട്ടി

മലയാളത്തിന്റെ മെഗസ്റ്റാര്‍ ദേവനന്ദയ്ക്കായി കുറിച്ച വരികള്‍ ശ്രദ്ദേയമാകുന്നു. സോഷ്യല്‍മീഡിയയിലൂടെ അദ്ദേഹം ആദരാഞ്ജലി അര്‍പ്പിച്ചെങ്കിലും 2020 ഫെബ്രുവരി 29 എന്ന സ്‌പെഷ്യല്‍ ദിനത്തില്‍ അദ്ദേഹം ഒരുവട്ടം കൂടി ആ കുഞ്ഞിനെ ഓര്‍ത്തെടുക്കുകയാണ്.

അദ്ദേഹത്തിന്റെ വരികള്‍: മനസിലാകെ നിറയുന്നത് ദേവനന്ദയാണ്. അവളുടെ പുഞ്ചിരിക്കുന്ന മുഖം മറക്കാന്‍ കഴിയില്ല. ആ അച്ഛനമ്മമാനരെ ഹൃദയത്തോട് ചേര്‍ത്തു നിര്‍ത്തുന്നു. നാലു വര്‍ഷത്തില്‍ ഒരിക്കല്‍ മാത്രം ലഭിക്കുന്ന എക്‌സ്ട്രാ ദിവസമാണ് ഫെബ്രുവരി 29. ഈ വര്‍ഷത്തിലെ ഫെബ്രുവരി 29 മറ്റുള്ളവര്‍ക്ക് സന്തോഷവും ആശംസകള്‍ നല്‍കാന്‍ നമുക്ക് ഉപകാരപ്രദമാക്കാം. ഒരു പുഞ്ചിരി ഒരു സമ്മാനം ഒരു ആലിംഗനം ഒരു കാരുണ്യ പ്രവര്‍ത്തി അങ്ങനെ എന്തും ആകാം അത്. ദേവനന്ദയ്ക്കുള്ള ഏറ്റവും ഉചിതമായ ആദരാഞ്ജലി ആയി ഈ നന്മ ദിനത്തെ കാണാമെന്ന് മമ്മൂട്ടി കുറിച്ചു. മലയാള മനോരമയിലെ ഇന്ന് 2020 ഫെബ്രുവരി 29 എക്‌സ്ട്രാ ഡേ എന്ന കോളത്തിലാണ് മമ്മൂട്ടി ദേവനന്ദയ്ക്കായി ഈ കുറിപ്പ് എഴുതിയത്.

കേരളക്കരയെ മുഴുവന്‍ കണ്ണീരിലാഴ്ത്തി ആയിരുന്നു ദേവനന്ദ മടങ്ങിയത്. കഴിഞ്ഞദിവസമാണ് കൊല്ലത്ത് വീട്ടുമുറ്റത്ത് കളിച്ചുകൊണ്ടിരുന്ന കുഞ്ഞിനെ പെട്ടെന്ന് കാണാതായത്. 24 മണിക്കൂറിനുള്ളിലെ തിരച്ചിലിനൊടുവില്‍ കുഞ്ഞിന്റെ മൃതദേഹം വീടിനടുത്തുള്ള ആറില്‍ നിന്ന് കണ്ടെടുക്കുകയും ചെയ്തു. പക്ഷേ മരണത്തിലെ ദുരൂഹത ഇപ്പോഴും മറയാത്തതിനാല്‍ അന്വേഷണങ്ങള്‍ ശക്തമാക്കുകയാണ്. മലയാള സിനിമയിലെ നിരവധി സെലിബ്രിറ്റികള്‍ ആയിരുന്നു ദേവനന്ദയ്ക്ക് ആദരാഞ്ജലിയര്‍പ്പിച്ച് സോഷ്യല്‍ മീഡിയയില്‍ എത്തിയത്.