‘ഒപ്പമുണ്ട്’; ആക്രമിക്കപ്പെട്ട നടിക്ക് പരസ്യപിന്തുണ പ്രഖ്യാപിച്ച് മമ്മൂട്ടിയും മോഹൻലാലും

നടി ആക്രമിക്കപ്പെട്ട കേസിൽ പുതിയ വെളിപ്പെടുത്തലിന് പിന്നാലെ ആക്രമിക്കപ്പെട്ട നടിക്ക് പിന്തുണ പ്രഖ്യാപിച്ച് മലയാളസിനിമയിലെ സൂപ്പർതാരങ്ങളായ മമ്മൂട്ടിയും മോഹൻലാലും. നടി സോഷ്യൽ മീഡിയയിൽ പങ്കുവെച്ച പോസ്റ്റർ രണ്ടുപേരും അവരുടെ സോഷ്യൽ മീഡിയ അക്കൗണ്ടുകളിൽ പങ്കുവെച്ചു. ‘നിനക്കൊപ്പം’ എന്ന് കുറിച്ചാണ് മമ്മൂട്ടി നടിയുടെ കുറിപ്പ് പങ്കുവെച്ചത്. ‘ബഹുമാനം’ എന്ന് കുറിച്ചാണ് മോഹൻലാൽ കുറിപ്പ് പങ്കുവെച്ചത്. നടിക്ക് പിന്തുണയുമായി നേരത്തെ യുവതാരങ്ങൾ രംഗത്തെത്തിയിരുന്നു. ‘ധൈര്യം’ എന്ന അടിക്കുറിപ്പോടെയാണ് പൃഥ്വിരാജ് പോസ്റ്റർ പങ്കുവെച്ചത്. ഇരയാക്കപ്പെടലിൽ നിന്നും അതിജീവനത്തിലേക്കുള്ള ഈ യാത്ര ഒരിക്കലും എളുപ്പമായിരുന്നില്ലെന്ന് പറഞ്ഞുകൊണ്ടാണ് നടിയുടെ കുറിപ്പ് പുറത്തു വരുന്നത്.

‘ഈ യാത്ര ഒരിക്കലും എളുപ്പമായിരുന്നില്ല. ഇരയാക്കപ്പെടലിൽ നിന്നും അതിജീവനത്തിലേക്കുള്ള യാത്ര. 5 വർഷമായി എന്റെ പേരും വ്യക്തിത്വവും എനിക്ക് സംഭവിച്ച അതിക്രമത്തിനടിയിൽ അടിച്ചമർത്തപ്പെട്ടിരിക്കുകയാണ്. കുറ്റം ചെയ്തത് ഞാൻ അല്ലെങ്കിലും എന്നെ അവഹേളിക്കാനും നിശ്ശബ്ദയാക്കാനും ഒറ്റപ്പെടുത്താനും ഒരുപാട് ശ്രമങ്ങൾ ഉണ്ടായിട്ടുണ്ട്. എന്നാൽ അപ്പോളൊക്കെയും ചിലരൊക്കെ നിശ്ശബ്ദത ഭേദിച്ച് മുന്നോട്ട് വന്നു; എനിക്ക് വേണ്ടി സംസാരിക്കാൻ. എന്റെ ശബ്ദം നിലയ്ക്കാതിരിക്കാൻ. ഇന്ന് എനിക്ക് വേണ്ടി നിലകൊള്ളുന്ന ഇത്രയും ശബ്ദങ്ങൾ കേൾക്കുമ്പോൾ ഞാൻ തനിച്ചല്ലെന്ന് തിരിച്ചറിയുന്നു. നീതി പുലരാനും തെറ്റു ചെയ്തവർ ശിക്ഷിക്കപ്പെടാനും, ഇങ്ങനെയൊരനുഭവം മറ്റാർക്കും ഉണ്ടാവാതെയിരിക്കാനും ഞാൻ ഈ യാത്ര തുടർന്ന് കൊണ്ടേയിരിക്കും. കൂടെ നിൽക്കുന്ന എല്ലാവരുടെയും സ്നേഹത്തിനു ഹൃദയം നിറഞ്ഞ നന്ദി’ – നടിയുടെ കുറിപ്പ് ഇങ്ങനെ.

മഞ്ജു വാര്യർ ഉൾപ്പെടെ നിരവധി പേരാണ് നടിയുടെ ഇൻസ്റ്റഗ്രാം പോസ്റ്റ് ഷെയർ ചെയ്തിരിക്കുന്നത്. ‘ധൈര്യം’ എന്ന അടിക്കുറിപ്പ് നൽകിയാണ് പൃഥ്വിരാജ് പോസ്‌റ്റ് ഷെയർ ചെയ്തിരിക്കുന്നത്. ലവ് ഇമോജി നൽകിയാണ് ടോവിനോ തോമസ് കുറിപ്പ് പങ്കുവെച്ചത്. ‘നിന്നോടൊപ്പം’ എന്ന് കുറിച്ചാണ് പാർവതി കുറിപ്പ് പങ്കുവെച്ചത്. ‘അതിജീവിച്ചവരോട് ഐക്യദാർഢ്യത്തോടെ’ എന്ന് കുറിച്ചാണ് നടൻ ഇന്ദ്രജിത്ത് കുറിപ്പ് പങ്കുവെച്ചത്.