കണ്ണൂർ സ്ക്വാഡ് പുതിയ ഷെ‍‍ഡ്യൂൾ ആരംഭിക്കുന്നു, ഷൂട്ടിംഗിനായി സ്വയം വാഹനമോടിച്ച് മമ്മൂട്ടി പുനെയിലേക്ക്

മമ്മൂട്ടി കമ്പനിയുടെ ബാനറിൽ നിർമിക്കുന്ന നാലാമത്തെ ചിത്രത്തിന്റെ ഷൂട്ടിംഗിന്റെ അടുത്ത ഷെഡ്യൂൾ പുനെയിൽ ആരംഭിക്കും. ചിത്രത്തിന്റെ ഷൂട്ടിംഗ് നേരത്തെ ആരംഭിച്ചിരുന്നു. പാലായിൽ വെച്ച് ഡിസംബർ അവസാനം പൂജയും സ്വിച്ചോണും നടന്നിരുന്നു. ചിത്രത്തിന്റെ പുതിയ ഷെഡ്യൂൾ പുനെയിൽ വെച്ചാണ്. ഇതിനായി മമ്മൂട്ടി മുംബൈയിൽ നിന്ന് പുനെയിലേക്ക് സ്വയം വാഹനമോടിച്ചാണ് പോയത്.

മമ്മൂട്ടി സ്വയം കാ‍ർ ഡ്രൈവ് ചെയ്തു പോകുന്നതിന്റെ ചിത്രം സോഷ്യൽ മീഡിയയിൽ ഇതിനകം വൈറലായി കഴിഞ്ഞു. ഫെബ്രുവരി 14 മുതൽ പുനെ ഷെഡ്യൂൾ ആരംഭിക്കും. പൂനെ കൂടാതെ പാലാ, കൊച്ചി, കണ്ണൂർ, വയനാട്, അതിരപ്പിള്ളി, മുംബൈ എന്നിവിടങ്ങളാണ് ചിത്രത്തിന്‍റെ ലൊക്കേഷനുകള്‍.

റോബി വര്‍ഗീസ് രാജ് ആണ് ചിത്രം സംവിധാനം ചെയ്യുന്നത്. ചിത്രത്തിന്‍റെ പേര് ഔദ്യോഗികമായി പ്രഖ്യാപിച്ചിട്ടില്ല. പക്ഷേ, മമ്മൂട്ടി തന്നെ തന്‍റെ വരാനിരിക്കുന്ന ചിത്രത്തിന്‍റെ പേര് കണ്ണൂര്‍ സ്ക്വാഡ് എന്ന് വെളിപ്പെടുത്തിയിരുന്നു. നന്‍പകല്‍ നേരത്ത് മയക്കം തമിഴ്നാട് റിലീസിന്‍റെ ഭാഗമായി ഒരു തമിഴ് മാധ്യമത്തിന് നല്‍കിയ അഭിമുഖത്തിലായിരുന്നു അദ്ദേഹം ഇക്കാര്യം പറഞ്ഞത്. നൻപകൽ നേരത്ത് മയക്കം, റോഷാക്ക്, കാതൽ എന്നിവയാണ് മമ്മൂട്ടി കമ്പനിയുടെ ബാനറില്‍ നിര്‍മ്മിക്കപ്പെട്ട ആദ്യ മൂന്ന് ചിത്രങ്ങള്‍. മുഹമ്മദ് ഷാഫിയുടേതാണ് ചിത്രത്തിന്റെ കഥ. അദ്ദേഹത്തോടൊപ്പം ചേർന്ന് തിരക്കഥ ഒരുക്കിയിരിക്കുന്നത് നടന്‍ റോണി ഡേവിഡ് രാജ് ആണ്.