സിനിമയിലേക്ക് വരാൻ എനിക്ക് താൽപര്യമുണ്ടായിരുന്നു.. പക്ഷേ..! കാരണം വെളിപ്പെടുത്തി മമ്മൂക്കയുടെ മകൾ സുറുമി

താരപുത്രന്മാരും പുത്രിമാരും അവരുടെ മാതാപിതാക്കളുടെ പാത പിന്തുടർന്ന് സിനിമ ലോകത്തേക്ക് കടന്ന് വന്നിട്ടുണ്ട്. പൃഥ്വിരാജ്, ഇന്ദ്രജിത്ത്, ദുൽഖർ, പ്രണവ്, കാളിദാസ്, ഗോകുൽ സുരേഷ്, കീർത്തി സുരേഷ്, കല്യാണി പ്രിയദർശൻ എന്നിങ്ങനെ നിരവധി പേരാണ് ആ നിരയിലുള്ളത്. ലാലേട്ടന്റെയും ജയറാമിന്റെയുമെല്ലാം പുത്രിമാർ സിനിമയിലേക്ക് വരുമോ എന്ന ആകാംക്ഷയിലാണ് പ്രേക്ഷകർ. ഇപ്പോഴിതാ തന്റെ സിനിമ മോഹത്തെക്കുറിച്ച് മമ്മൂക്കയുടെ മകൾ സുറുമി മനസ്സ് തുറന്നിരിക്കുകയാണ്. ഏഷ്യാവില്‍ മലയാളത്തിന് നല്‍കിയ അഭിമുഖത്തിലാണ് സിനിമയിലേക്ക് വരാന്‍ തനിക്ക് താല്‍പര്യമുണ്ടായിരുന്നുവെന്നും എന്നാല്‍ തനിക്ക് പേടിയായിരുന്നുവെന്നുമാണ് സുറുമി പറയുന്നത്. താനൊരു നാണം കുണുങ്ങിയായിരുന്നുവെന്നും ക്യാമറയ്ക്ക് മുന്നില്‍ നില്‍ക്കുന്നത് തന്നെ പേടിയും ചമ്മലുമായിരുന്നുവെന്നുമാണ് സുറുമി പറയുന്നത്. താരത്തിന്റെ വാക്കുകളിലേക്ക്.

എന്റെ ചുറ്റിലും സിനിമ ഉണ്ടായിരുന്നു. വാപ്പച്ചിയായും ദുല്‍ഖറായും സിനിമ എന്റെ ചുറ്റും ഉണ്ട്. അതുകൊണ്ട് തന്നെ സിനിമ എന്നെ സ്വാധീനിച്ചിരുന്നു. അപ്പോള്‍ ഇടയ്ക്ക് തോന്നാറുണ്ട് ആ വേഷം ചെയ്താല്‍ എങ്ങനെ ഉണ്ടാവും, ഈ റോള്‍ ചെയ്യാന്‍ പറ്റുമോ എന്നൊക്കെ. ചിലപ്പേള്‍ സിനിമാഭിനയം എനിക്ക് പറ്റിയ പണിയല്ല എന്ന് തോന്നും. എന്റെ ലോകം ചിത്രരചനയായിരുന്നു. എന്നോട് അത് ചെയ്യരുത് ഇത് ചെയ്യരുത് എന്നൊന്നും വാപ്പച്ചി പറഞ്ഞിരുന്നില്ല. എനിക്ക് ചിത്രം വര ഇഷ്ടമാണെന്ന് പറഞ്ഞപ്പോള്‍ നല്ല പ്രോത്സാഹനമാണ് വീട്ടില്‍ നിന്ന് കിട്ടിയത്” സുറുമി പറയുന്നു.

വരയ്ക്കാന്‍ എന്തെങ്കിലും വേണമെന്ന് പറയുമ്പോള്‍ വാപ്പച്ചി തന്നെയാണ് അതൊക്കെ വാങ്ങി തരാറുള്ളതെന്നും സുറുമി പറയുന്നു. പിന്നീട് താന്‍ ചിത്രരചനയില്‍ തന്നെ ഉപരിപഠനം നടത്തണമെന്ന് പറഞ്ഞപ്പോള്‍ അതിനും വീട്ടില്‍ നിന്നും നല്ല പിന്തുണയും പ്രോത്സാഹനവുമാണ് ലഭിച്ചതെന്നും സുറുമി പറഞ്ഞു. അതേസമയം എന്നെങ്കിലും സിനിമയില്‍ വരുമോ എന്ന് അവതാരക ചോദിക്കുമ്പോള്‍ അങ്ങനെ ഉണ്ടാവില്ല എന്നാണ് സുറുമി പറയുന്നത്.

ഈയ്യടുത്തായിരുന്നു മമ്മൂട്ടി തന്റെ സിനിമാജീവിതത്തില്‍ അമ്പത് വര്‍ഷം പൂര്‍ത്തിയാക്കിയത്. സെപ്തംബര്‍ ഏഴിനായിരുന്നു മമ്മൂട്ടിയുടെ ജന്മദിനം. വാപ്പച്ചിയുടെ പിറന്നാളിന് താന്‍ വരച്ച വാപ്പച്ചിയുടെ ചിത്രമായിരുന്നു സുറുമി പങ്കുവച്ചത്. മമ്മൂട്ടിയ്ക്ക് ഒരു സര്‍പ്രൈസായിരുന്നു സുറുമി വരച്ച ചിത്രം. ഈ ചിത്രം സോഷ്യല്‍ മീഡിയയില്‍ ഏറെ വൈറലായി മാറിയിരുന്നു. വാപ്പച്ചി അഭിനയത്തിലെങ്കില്‍ മകള്‍ വരയില്‍ പുലിയാണെന്നാണ് സോഷ്യല്‍ മീഡിയ പറയുന്നത്.