എന്നേക്കും സുഹൃത്തുക്കള്‍, വീണ്ടും ഒത്തുകൂടി മഞ്ജുവും ഗീതുവും സംയുക്തയും

സിനിമയിലും പുറത്തും ഒരുപോലെ സൗഹൃദം കാത്തു സൂക്ഷിക്കുന്നവരാണ് മഞ്ജു വാര്യരും സംയുക്ത മേനോനും ഗീതു മോഹന്‍ദാസും. സിനിമാ മേഖലയില്‍ നിന്നും വിട്ടു നിന്നെങ്കിലും തന്റെ സൗഹൃദവലയം മഞ്ജു നഷ്ടപ്പെടുത്തിയിരുന്നില്ല. ഗീതു മോഹന്‍ദാസ്, പൂര്‍ണിമ ഇന്ദ്രജിത്, സംയുക്ത മേനോന്‍, ഭാവന തുടങ്ങിയവര്‍ മഞ്ജുവിന്റെ അടുത്ത സുഹൃത്തുക്കളാണ്. സിനിമയ്ക്ക് അപ്പുറം ജീവിതത്തിലും നല്ല സൗഹൃദം ഇവര്‍ കാത്തു സൂക്ഷിക്കുന്നുണ്ട്. കൂട്ടുകാരുടെ ജന്മദിനം ആഘോഷമാക്കാനും യാത്രകള്‍ സംഘടിപ്പിക്കാനും ഇവര്‍ ഇപ്പോഴും ഒരുമിച്ചാണ്.

ഇപ്പോഴിതാ മൂവരും ഒത്തു കൂടിയതിന്റെ ചിത്രങ്ങളാണ് സോഷ്യല്‍ മീഡിയയില്‍ വൈറലാവുന്നത്. ഗീതുവും മഞ്ജുവും ഇതിന്റെ ഫൊട്ടോ സോഷ്യല്‍ മീഡിയയില്‍ പങ്കുവച്ചിട്ടുണ്ട്. ‘എന്നേക്കും സുഹൃത്തുക്കള്‍, എന്തും നേരിടാനായി’ എന്നാണ് ചിത്രങ്ങളോടൊപ്പം കുറിച്ചിരിക്കുന്നത്. എന്നാല്‍ എപ്പോഴും കൂടെ ഉണ്ടാകാറുള്ള ഒരാള്‍ മാത്രം മിസ്സിങ്ങാണ്, പൂര്‍ണിമയാണത്. മഞ്ഞയില്‍ സുന്ദരികളായാണ് മഞ്ജുവും സംയുക്തയും ചിത്രങ്ങളിലുള്ളത്. ബ്ലാക്കണിഞ്ഞിരിക്കുകയാണ് ഗീതു മോഹന്‍ദാസ്. ചിത്രങ്ങള്‍ പങ്കുവെച്ചതിന് പിന്നാലെ ശ്രിന്ദ, ലക്ഷ്മി നക്ഷത്ര, സൂരജ് തേലക്കാട്, രജന നാരായണന്‍ കുട്ടി, ബിനീഷ് ബാസ്റ്റിന്‍ തുടങ്ങി നിരവധി താരങ്ങളും ആരാധകരും കമന്റുകളുമായി എത്തിയിട്ടുണ്ട്. ചേച്ചിയെ എല്ലായ്‌പ്പോഴും ഇങ്ങനെ ചേര്‍ത്തു പിടിക്കുന്നതിനായി ഇവര്‍ക്കും ഞങ്ങളുടെ ഒരുപാട് സ്‌നേഹം എന്നാണ് ഒരു ആരാധികയുടെ കമന്റ്.

പ്രജേഷ് സെന്‍ സംവിധാനം ചെയ്ത ‘മേരി ആവാസ് സുനോ’ ആണ് മഞ്ജുവിന്റെ അടുത്ത ചിത്രം. ജയസൂര്യയും മഞ്ജു വാര്യരുമാണ് നായികാനായകന്മാര്‍. ക്യാപ്റ്റന്‍, വെള്ളം എന്നീ ഹിറ്റ് സിനിമകള്‍ക്ക് ശേഷം പ്രജേഷ് സെന്നും ജയസൂര്യയും ഒന്നിക്കുന്ന മൂന്നാമത്തെ ചിത്രമാണ് മേരി ആവാസ് സുനോ. മരക്കാര്‍, ജാക്ക് ആന്‍ഡ് ജില്‍, കയറ്റം, ലളിതം സുന്ദരം എന്നു തുടങ്ങി ഒരുപിടി ചിത്രങ്ങളാണ് മഞ്ജുവിന്റേതായി അണിയറയില്‍ ഒരുങ്ങുന്ന മറ്റു ചിത്രങ്ങള്‍.