തമിഴിൽ അരങ്ങേറ്റം കൊണ്ട് തന്നെ ഭാഗ്യനായികയായി മഞ്ജു വാര്യർ; അസുരൻ 100 കോടി ക്ലബ്ബിൽ

തമിഴിൽ തന്റെ അരങ്ങേറ്റം അവിസ്മരണീയമാക്കിയ മഞ്ജു വാര്യർ അസുരൻ നൂറ് കോടി ക്ലബ്ബിൽ ഇടം പിടിച്ചതോട് കൂടി ഭാഗ്യനായികയായി തീർന്നിരിക്കുകയാണ്. ധനുഷിന്റെ നായികയായതിന് പിന്നാലെ രജനികാന്തിന്റെ നായികയായിട്ടാണ് ഇനി മഞ്ജു വാര്യരെ തമിഴിൽ കാണാൻ പോകുന്നത്. നീണ്ട നാളത്തെ കാത്തിരിപ്പിനൊടുവിലാണ് മഞ്ജു വാര്യര്‍ തമിഴ് സിനിമയുമായി എത്തിയത്. മുമ്പ് പല പ്രോജക്ടുകളും വന്നിരുന്നെങ്കിലും നടി വേണ്ടന്നുവയ്ക്കുകയായിരുന്നു. തിരുനെൽവേലിയിൽ സ്കൂൾ വിദ്യാഭ്യാസം തുടങ്ങിയ മഞ്ജുവിന് തമിഴ് അനായാസം വഴങ്ങും.

നാലു ദിവസം മാത്രമെടുത്താണ് അസുരന്റെ ഡബ്ബിങ് പൂർത്തിയാക്കിയത്. അസുരൻ കണ്ട ശേഷം ശിവ തന്നെ മഞ്ജുവിനെ അഭിനയിപ്പിക്കാനുള്ള തീരുമാനം നിർമാതാക്കളായ സൺപിക്ചേഴ്സിനെ അറിയിച്ചതായും റിപ്പോർട്ട് ഉണ്ട്. തമിഴിലെ പ്രമുഖ എഴുത്തുകാരന്‍ പൂമണിയുടെ വെക്കൈ എന്ന നോവലിനെ ആസ്പദമാക്കി വെട്രിമാരന്‍ ഒരുക്കിയ ചിത്രത്തില്‍ ശിവസ്വാമി എന്ന കര്‍ഷകനായാണ് ധനുഷ് അഭിനയിച്ചത്. ശിവസ്വാമിയുടെ ഭാര്യ പച്ചൈയമ്മാള്‍ എന്ന കഥാപാത്രത്തെയാണ് മഞ്ജു അവതരിപ്പിച്ചത്.

ചെന്നൈ ബോക്‌സോഫീസിലും ഉയർന്ന കലക്‌ഷനാണ് ലഭിച്ചത്. ചെന്നൈ, ചെങ്കൽപേട്ട് എന്നിവിടങ്ങളിൽ നിന്നും 15 കോടിയാണ് വാരിയത്. തിരുനൽവേലി, കന്യാകുമാരി, സേലം എന്നിവിടങ്ങളിലും മികച്ച ബിസിനസ്സ് ആയിരുന്നു. കേരളത്തിൽ നിന്നും 3.35 കോടിയാണ് പത്തുദിവസം കൊണ്ടു ലഭിച്ചത്.