മരക്കാറിന് 200 തീയറ്റർ ചോദിച്ച ആന്റണി പെരുമ്പാവൂരിന് മറുപടി കൊടുത്തത് വെറും 86 തീയറ്ററുകൾ..! ഒടിടി റിലീസ് നിർമ്മാതാവിന്റെ തീരുമാനമെങ്കിൽ സ്വാഗതം ചെയ്യുമെന്ന് കേരള ഫിലിം ഡിസ്ട്രിബ്യൂട്ടേഴ്സ് അസോസിയേഷൻ

മോഹൻലാൽ – പ്രിയദർശൻ ചിത്രം മരക്കാർ അറബിക്കടലിന്റെ സിംഹം ഒടിടി റിലീസിനായി ചർച്ചകൾ നടത്തുന്നുവെന്ന നിർമ്മാതാവ് ആന്റണി പെരുമ്പാവൂർ വെളിപ്പെടുത്തിയതോടെ തീയറ്റർ ഉടമകൾ അതിനെതിരെ ഇപ്പോൾ പ്രതികരിച്ചിരിക്കുകയാണ്. ലാലേട്ടനെയും പൃഥ്വിരാജിനെയുമെല്ലാം വിലക്കണമെന്ന ആവശ്യവുമായിട്ടാണ് അവർ ഇപ്പോൾ മുന്നോട്ട് വന്നിരിക്കുന്നത്. അതിനിടയിൽ ചിത്രം ഒടിടി റിലീസിന് നൽകിയ തീരുമാനത്തിൽ പിന്തുണയുമായി കേരള ഫിലിം ഡിസ്ട്രിബ്യൂട്ടേഴ്സ് അസോസിയേഷൻ സംസ്ഥാന പ്രസിഡന്റ് സിയാദ് കോക്കർ എത്തിയിരിക്കുകയാണ്. അദ്ദേഹത്തിന്റെ വാക്കുകളിലൂടെ..

മരക്കാർ വിഷയത്തിൽ ഒരു തരത്തിലുമുള്ള പ്രതിഷേധങ്ങളുമില്ല. ആന്റണി പെരുമ്പാവൂർ തിയേറ്റർ സംഘടനയുടെ അംഗമായിരുന്നു. കൊവിഡ് തുടങ്ങിയ സമയത്ത് അദ്ദേഹം സിനിമ തിയേറ്ററിൽ പ്രദർശിപ്പിക്കാൻ തയ്യാറാണ് എന്ന് അറിയിച്ചിരുന്നു. ഒരു 200 തിയേറ്റർ മൂന്ന് ആഴ്ചത്തേക്ക് എനിക്ക് കിട്ടണം എന്ന് അദ്ദേഹം ആവശ്യപ്പെട്ടു. അത് ഫിയോക്ക് അംഗീകരിക്കുകയും തിയേറ്റർ ഉടമകൾക്ക് എഗ്രിമെന്റ് അയക്കുകയും ചെയ്തിരുന്നു. എന്നാൽ 86 തിയേറ്ററുകളിൽ നിന്നും മാത്രമാണ് മറുപടി വന്നത്. ഇത്രയേറെ റിസ്ക് എടുത്ത് മരക്കാർ റിലീസ് ചെയ്യുമ്പോൾ 86 തിയേറ്ററിൽ പ്രദർശിപ്പിച്ചാൽ മതിയോ? വൈകാരികമായി വായിൽ തോന്നുന്നത് വിളിച്ചു പറയുന്നതിൽ അർത്ഥമില്ല.

സത്യാവസ്ഥ ഇതിന്റെ പുറകിലുണ്ട്. അഡ്വാൻസ് കൊടുക്കുക എന്ന് പറഞ്ഞാൽ വലിയ കാര്യമൊന്നുമല്ല. തമിഴ് സിനിമകൾക്ക് തിയേറ്റർ ഉടമകൾ എത്ര അഡ്വാൻസ് കൊടുത്തു? കഴിഞ്ഞ രജനികാന്ത് പടത്തിന് കൊടുത്തത് എത്രയാണ്? അത് ചൂണ്ടിക്കാണിച്ച് ഞങ്ങൾക്ക് ഇത്ര കിട്ടാനുണ്ട് എന്ന് പറയുന്നതിൽ കാര്യമില്ല. ഇവർ അഡ്വാൻസ് കൊടുക്കുന്നത് എന്തിനാ? ഇതൊന്നും നല്ല പ്രവണതയല്ല. ഒടിടി റിലീസ് ചെയ്യുക എന്നത് നിർമ്മാതാവിന്റെ തീരുമാനം ആണെങ്കിൽ അതിനെ സ്വാഗതം ചെയ്യും. ഇപ്പോൾ 50 ശതമാനം മാത്രമാണ് പ്രേക്ഷകർ. ഈ അവസ്ഥയിൽ എല്ലാ നഷ്ടവും സഹിച്ച് പടം റിലീസ് ചെയ്യട്ടെ എന്ന് തീരുമാനിക്കുന്നത് ആണോ മര്യാദ?

രണ്ടുകൂട്ടരും സഹകരിച്ചാൽ മാത്രമേ കാര്യമില്ല. നല്ല ഇനിഷ്യൽ ലഭിക്കുമെന്ന് പ്രതീക്ഷിക്കുനന് സിനിമകൾക്ക് അഡ്വാൻസ് കൊടുക്കുന്ന പ്രവണത പണ്ട് മുതലേയുണ്ട്. അതൊന്നും ഒറ്റ് കാരണമേയല്ല. ഈ സാഹചര്യത്തിൽ നിർമ്മാതാവുമായ സംസാരിച്ച് പ്രദർശിപ്പിക്കുകയാണ് വേണ്ടത്. അല്ലാതെ മോഹൻലാലിനെയും പൃഥ്വിരാജിനെയും ബാൻ ചെയ്യും എന്ന് പറയുന്നത് ശരിയല്ല. ഇവരെയെല്ലാം സംയുക്തമായി കൊണ്ടുവരികയാണ് സംഘടനകൾ ചെയ്യേണ്ടിയിരുന്നത്.