യു എ ഇയിലും ഓസ്‌ട്രേലിയയിലും ആദ്യദിന കളക്ഷൻ റെക്കോർഡ് സ്ഥാപിച്ച് മരക്കാർ; കുറുപ്പിനെ പിന്നിലാക്കി ഒന്നാമത്

കേരളം കഴിഞ്ഞാൽ മലയാള സിനിമക്ക് ഏറ്റവും കൂടുതൽ പ്രേക്ഷകരുള്ള ഒരു മാർക്കറ്റാണ് ഗൾഫ് രാജ്യങ്ങൾ. ബോളിവുഡ് ചിത്രങ്ങളെ പോലും പിന്നിലാക്കുന്ന റെക്കോർഡ് കളക്ഷനുകളാണ് മലയാള ചലച്ചിത്രങ്ങൾ നേടിയിട്ടുള്ളത്. മോഹൻലാൽ ചിത്രങ്ങൾക്കാണ് കൂടുതലും കളക്ഷൻ റെക്കോർഡുകൾ. ഇപ്പോഴിതാ മലയാളത്തിലെ ഏറ്റവും വലിയ റിലീസുകളിൽ ഒന്നായി എത്തിയ മോഹൻലാൽ ചിത്രം മരക്കാറും പുതിയ റെക്കോർഡ് സ്ഥാപിച്ചിരിക്കുകയാണ്.

യു എ ഇയിൽ ആദ്യദിനം 2.98 കോടി രൂപയാണ് ചിത്രം നേടിയിരിക്കുന്നത്. 2.40 കോടിയെന്ന ദുൽഖർ സൽമാൻ ചിത്രം കുറുപ്പിന്റെ റെക്കോർഡാണ് ചിത്രം തകർത്തത്. 368 ഷോകളിലായി 35879 അഡ്‌മിറ്റുകളാണ് മരക്കാറിന് ലഭിച്ചത്. ഓസ്‌ട്രേലിയയിലും ആദ്യദിനത്തിൽ പുത്തൻ റെക്കോർഡാണ് ചിത്രം നേടിയിരിക്കുന്നത്. ഓസ്‌ട്രേലിയൻ സമയം രാത്രി 8 മണി വരെയുള്ള കണക്കനുസരിച്ച് 47,262 ഓസ്‌ട്രേലിയൻ ഡോളറാണ് ചിത്രം നേടിയിരിക്കുന്നത്. ഇന്ത്യൻ രൂപ 25 ലക്ഷത്തിന് മുകളിലാണിത്. 23,228 ഓസ്‌ട്രേലിയൻ ഡോളർ (12 ലക്ഷത്തിലേറെ ഇന്ത്യൻ രൂപ) നേടിയ കുറുപ്പിനെയാണ് മരക്കാർ പിന്നിലാക്കിയത്.

അതിനിടയിൽ സമ്മിശ്ര പ്രതികരണങ്ങൾക്കിടയിലും മരക്കാർ ഹൗസ്‌ഫുൾ ഷോകളുമായി പ്രദർശനം തുടരുകയാണ്. പ്രിയദർശൻ രചിച്ച് സംവിധാനം ചെയ്യുന്ന ചിത്രം ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂർ ആണ് നിർമിച്ചിരിക്കുന്നത്. അഞ്ചു ഭാഷകളിൽ ആയി ഒരുക്കിയ ഈ ചിത്രം ഇന്ത്യയിലെ മികച്ച ചിത്രത്തിനുള്ള ദേശീയ പുരസ്‍കാരം ഉൾപ്പെടെ, മൂന്നു ദേശീയ അവാർഡുകളും മൂന്നു സംസ്ഥാന അവാർഡുകളും നേടിയിട്ടുണ്ട്. മോഹന്‍ലാലിനൊപ്പം അര്‍ജുന്‍, സുനില്‍ ഷെട്ടി, മഞ്ജു വാര്യര്‍, കല്യാണി പ്രിയദര്‍ശന്‍, കീര്‍ത്തി സുരേഷ്, പ്രണവ് മോഹൻലാൽ, സുഹാസിനി, പ്രഭു എന്നിവരും മരക്കാറിലുണ്ട്. മൂണ്‍ ഷോട്ട് എന്റര്‍ടെയിന്‍മെന്റിന്റെ ബാനറില്‍ സന്തോഷ് ടി കുരുവിള, കോണ്‍ഫിഡന്റ് ഗ്രൂപ്പിന്റെ ബാനറില്‍ റോയ് സി ജെ എന്നിവരാണ് മരക്കാറിന്റെ സഹനിർമാതാക്കൾ. തിരുനാവുക്കരശ് ആണ് ക്യാമറ.