കാത്തിരുന്ന ആരാധകരെ ആവേശകൊടുമുടിയിൽ എത്തിച്ച് റോക്കിഭായി; കെജിഎഫ് 2ന് ഗംഭീരസ്വീകരണം

ആരാധകർ ആവേശത്തോടെ കാത്തിരുന്ന ചിത്രം കെ ജി എഫ് ചാപ്റ്റർ 2 റിലീസ് ആയിരിക്കുകയാണ്. തിയറ്ററുകളിൽ റിലീസ് ആയ ചിത്രത്തിന് വൻ വരവേൽപ്പ് ആണ് ലഭിച്ചിരിക്കുന്നത്. സ്ക്രീനിൽ തീയായി പടർന്നു കയറിയ റോക്കി ഭായി ആരാധകരെ ആനന്ദനിർവൃതിയിലാഴ്ത്തി. സംവിധായകൻ പ്രശാന്ത് നീൽ ആരാധകരുടെ പ്രതീക്ഷയ്ക്ക് ഒരു തരി പോലും പോറലേൽക്കാതെ കെജിഎഫ് ചാപ്റ്റർ ടുവും സമ്മാനിച്ചിരിക്കുകയാണ്. ആദ്യഭാഗത്തിന്റെ അതേ പാതയിലൂടെ തന്നെയാണ് രണ്ടാം ഭാഗവും സഞ്ചരിക്കുന്നത്. വീര നായകന്റെ മാസ് പരിവേഷങ്ങൾ ഓരോ രംഗങ്ങളിലും ആവർത്തിച്ച് ഉറപ്പിക്കുന്നുണ്ട്.

കെ ജി എഫ് ചാപ്റ്റർ ഒന്നിൽ വീരപരിവേഷത്തിലേക്ക് എത്തിയ നായകൻ ആയിരുന്നു റോക്കിഭായി. അതുകൊണ്ടു തന്നെ രണ്ടാം ഭാഗത്തിൽ റോക്കിയെന്ന നായകനെ മാസ് പരിവേഷം നൽകി ആവേശം സൃഷ്ടിക്കുന്നതിൽ പ്രശാന്ത് നീൽ വിജയിച്ചു. ഒന്നാം ഭാഗത്തിൽ കണ്ട ആഖ്യാനത്തിലെ ചടുലത രണ്ടാം ഭാഗത്തിലും കാണാവുന്നതാണ്. ഒന്നാം ഭാഗത്തിൽ ഗരുഡ ആയിരുന്നു വില്ലനെങ്കിൽ ഇത്തവണ അധീരയാണ് വില്ലൻ. എന്നാൽ, രണ്ടാം ഭാഗത്തിൽ റോക്കിക്ക് അധീരയെ മാത്രമല്ല നേരിടേണ്ടി വരുന്നത്. രാഷ്ട്രീയവും റോക്കിയുടെ വഴിയിൽ തടസങ്ങളായി എത്തുകയാണ്. അതിനെ കൂടി റോക്കി എങ്ങനെ മറി കടക്കുന്നു എന്നതാണ് ചിത്രം പറയുന്നത്.

റോക്കിയായി യഷ് തർക്കുമ്പോൾ പ്രതിനായകനായ അധീരയായി എത്തുന്നത് സഞ്ജയ് ദത്ത് ആണ്. വില്ലന്റെ എല്ലാ ഭീകതരയും ആവാഹിച്ചാണ് സഞ്ജയ് ദത്ത് എത്തുന്നത്. അഞ്ചു ഭാഷകളിലാണ് കെ ജി എഫ് ചാപ്റ്റർ ടു എത്തുന്നത്. കേരളത്തിൽ ചിത്രം വിതരണം ചെയ്തിരിക്കുന്നത് പൃഥ്വിരാജ് പ്രൊഡക്ഷൻസ് ആണ്. പ്രശാന്ത് നീൽ സംവിധാനം ചെയ്ത ഈ ചിത്രം നിർമിച്ചിരിക്കുന്നത് ഹൊംബാല ഫിലിംസ് ആണ്. രവീണ ടണ്ഠൻ, പ്രകാശ് രാജ്, അച്യുത് കുമാർ, റാവു രമേശ്, ഈശ്വരി റാവു, മാളവിക അവിനാശ്, അയ്യപ്പ പി ശർമ്മ തുടങ്ങി ഒരു വലിയ താരനിര തന്നെയാണ് അഭിനേതാക്കളായി എത്തുന്നത്. സംഗീതം – രവി ബസ്‌റൂർ, എഡിറ്റിംഗ് – ഉജ്ജ്വൽ കുൽക്കർണി, കാമറ – ഭുവൻ ഗൗഡ എന്നിവരാണ്.