പ്രണവിന്റെ അടുത്ത നായിക നസ്രിയ ? സോഷ്യൽ മീഡിയയിൽ സജീവമായി വാർത്തകൾ

പ്രണയിക്കുന്ന യുവമനസുകളെ കീഴടക്കി ‘ഹൃദയം’ സിനിമ തിയറ്ററുകളിൽ മുന്നേറുകയാണ്. പ്രണവ് മോഹൻലാലിനെ നായകനാക്കി വിനീത് ശ്രീനിവാസൻ സംവിധാനം ചെയ്ത സിനിമ നിരൂപകപ്രശംസ നേടിയാണ് നിറഞ്ഞ സദസുകളിൽ പ്രദർശനം തുടരുന്നത്. പ്രണവിലെ അഭിനേതാവിനെ വിനീത് ശ്രീനിവാസൻ ഹൃദയം എന്ന സിനിമയിലൂടെ പ്രേക്ഷകർക്ക് മുമ്പിലെത്തിച്ചെന്നാണ് നിരൂപകർ പറയുന്നത്.

ഏതായാലും ഇപ്പോൾ സോഷ്യൽ മീഡിയയിൽ നിറയുന്നത് പ്രണവിന്റെ നായികയായി നസ്രിയ ഫഹദ് എത്തുന്നു എന്ന വാർത്തകളാണ്. എന്നാൽ, ഇക്കാര്യത്തിൽ ഔദ്യോഗിക വിശദീകരണങ്ങൾ വന്നിട്ടില്ല. ഹൃദയം സിനിമ കഴിഞ്ഞതോടെ പ്രണവിനെ തേടി നിരവധി ഓഫറുകളാണ് വന്നിരിക്കുന്നത്. ഇതിനിടയിലാണ് അഞ്ജലി മേനോന്റെ അടുത്ത ചിത്രത്തിൽ പ്രണവ് നായകനാകുമെന്ന റിപ്പോർട്ടുകൾ പുറത്തുവന്നത്. ഈ സിനിമയിൽ നസ്രിയ ആയിരിക്കും പ്രണവിന്റെ നായകനായി എത്തുകയെന്നാണ് റിപ്പോർട്ടുകൾ. എന്നാൽ ഈ റിപ്പോർട്ടുകൾ സ്ഥിരീകരിക്കുന്ന വാർത്തകൾ ഒന്നും പുറത്തു വന്നിട്ടില്ല.

സംവിധാനം ചെയ്ത എല്ലാ സിനിമകളും പ്രേക്ഷകരെ തൃപ്തിപ്പെടുത്തിയ സംവിധായികയാണ് അഞ്ജലി മേനോൻ. അതുകൊണ്ട് തന്നെ അഞ്ജലി മേനോൻ – പ്രണവ് – നസ്രിയ കൂട്ടുകെട്ടിനായുള്ള കാത്തിരിപ്പിലാണ് ആരാധകരും. അഞ്ജലി മേനോനെ കൂടാതെ അനി ഐവി ശശി, അൻവർ റഷീദ്, ഏതാനും പുതുമുഖങ്ങൾ എന്നിവരും പ്രണവിനെ നായകനാക്കി സിനിമ ചെയ്യാനുള്ള പദ്ധതി തയ്യാറാക്കുകയാണെന്നാണ് റിപ്പോർട്ടുകൾ.