അന്ന് മമ്മൂട്ടി ചിത്രത്തിലെ നായകന്‍, ഇന്ന് ‘ദൃശ്യ’ത്തിലെ സപ്ലയര്‍

ദൃശ്യം 2 കണ്ടവരുടെ മനസ്സില്‍ തങ്ങി നില്‍ക്കുന്ന കഥാപാത്രമാണ് ഹോട്ടലില്‍ സപ്ലയറായി നില്‍ക്കുന്ന രഘു. അദ്ദേഹത്തിന്റെ യഥാര്‍ഥ പേരും രഘു എന്നു തന്നെയാണ്. രഘുവിനെക്കുറിച്ച് പലര്‍ക്കും അറിയാത്ത ഒരു കാര്യമുണ്ട്. 40 വര്‍ഷം മുമ്പ് കെ. ജി ജോര്‍ജ് സംവിധാനം ചെയ്ത ‘മേള’ എന്ന ചിത്രത്തിലെ നായകനായിരുന്നു രഘു. മമ്മൂട്ടിയുടെ ആദ്യ കാല ചിത്രങ്ങളില്‍ ഒന്നായ മേളയില്‍ നായക കഥാപാത്രമായാണ് രഘു അഭിനയിച്ചത്. തെന്നിന്ത്യയിലെ പൊക്കം കുറഞ്ഞ ആദ്യ നായകന്‍ എന്ന റെക്കോര്‍ഡും അന്ന് കരസ്ഥമാക്കിയിരുന്നു.

മമ്മൂട്ടിക്ക് ആദ്യമായി ലീഡ് റോള്‍ ലഭിച്ചത് 1980ല്‍ പുറത്തിറങ്ങിയ മേളയിലാണ്. മമ്മൂട്ടിയുടെ കരിയറിലെ ആദ്യ ചിത്രങ്ങളിലൊന്നായ മേളയിലാണ് അദ്ദേഹത്തിന് ആദ്യമായി മുഴുനീള സ്‌ക്രീന്‍സ്‌പേസ് ലഭിക്കുന്നത്. ശക്തമായ കഥാപശ്ചാത്തലവും പ്രകടനങ്ങളും ഒക്കെ ചേര്‍ന്ന് അക്കാലത്തെ ഒരു ന്യൂ വേവ് സിനിമ തന്നെ ആയിരുന്നു മേള. ആ സിനിമയില്‍ കേന്ദ്ര കഥാപാത്രത്തെ അവതരിപ്പിച്ചയാളാണ് രഘു. മമ്മൂട്ടിക്കൊപ്പം നായകനായ പൊക്കമില്ലാത്ത രഘു അക്കാലത്ത് വലിയ ശ്രദ്ധ പിടിച്ചു പറ്റി. കമല്‍ഹാസന്റെ അപൂര്‍വ്വ സഹോദരങ്ങളിലും അദ്ദേഹം അഭിനയിച്ചിട്ടുണ്ട്.