നന്മ നിറഞ്ഞ ‘നേര്’ എഫക്ട്; ‘നേര് നിറഞ്ഞ മോര്, മില്‍മയുടെ മോര്’ എന്ന് പരസ്യവാചകം, ‘സീകിങ്ങ് ജസ്റ്റ് ഐസ്’ എന്ന് ടാഗ് ലൈൻ

സംവിധായകൻ ജീത്തു ജോസഫും മോഹൻലാലും വീണ്ടും ഒന്നിച്ചപ്പോൾ മലയാളസിനിമാലോകത്തിന് കിട്ടിയത് ഒരു സൂപ്പർ ഹിറ്റ്. ക്രിസ്മസ് റിലീസ് ആയി ഡിസംബർ 21നാണ് നേര് തിയറ്ററുകളിലേക്ക് എത്തിയത്. പത്തുവർഷം മുമ്പ് ഒരു ക്രിസ്മസ് കാലത്ത് ദൃശ്യം എന്ന സൂപ്പർഹിറ്റ് ചിത്രവുമായി എത്തിയ മോഹൻലാൽ – ജീത്തു ജോസഫ് ടീം വീണ്ടുമൊരു ക്രിസ്മസ് കാലത്ത് തിയറ്ററുകളിൽ ആളെ നിറയ്ക്കുകയാണ്. സിനിമ റിലീസ് ചെയ്ത് ഒരാഴ്ച പിന്നിടുമ്പോൾ അമ്പതു കോടി ക്ലബിലേക്കുള്ള അവസാന ഓട്ടത്തിലാണ് ‘നേര്’.

ഏതായാലും നേര് എന്ന സിനിമ സമൂഹത്തിൽ വലിയ സ്വാധീനമാണ് വരുത്തിയിരിക്കുന്നത്. മിൽമ മോര് അവരുടെ പരസ്യവാചകത്തിലും ‘നേര്’ കണ്ടെത്തി. ‘നേര് നിറഞ്ഞ മോര്, മില്‍മയുടെ മോര്’ എന്നാണ് പുതിയ പരസ്യവാചകം. പോസ്റ്ററിലെ മോര് എന്ന എഴുതിയത് ‘നേര്’ സ്റ്റൈലിലാണ്. ഏതായാലും നേര് മോരിനെ ആരാധകരും ഏറ്റെടുത്തത്. നേര് സിനിമയുടെ ടാഗ് ലൈൻ സീകിങ്ങ് ജസ്റ്റിസ് എന്നാണ്. മിൽമയുടെ നേര് പരസ്യത്തിന് ഒരു ടാഗ് ലൈനും ഉണ്ട്. ‘സീകിങ്ങ് ജസ്റ്റ് ഐസ്’ എന്നായിരുന്നു അത്. തിയറ്ററുകളിൽ നേര് സിനിമ അതിന്റെ കുതിപ്പ് തുടരുകയാണ്.

പതിമൂന്ന് വര്‍ഷങ്ങള്‍ക്ക് ശേഷം മോഹന്‍ലാല്‍ വക്കീല്‍ വേഷത്തില്‍ എത്തിയ ചിത്രമായിരുന്നു നേര്. സിദ്ദിഖ്, പ്രിയാമണി, ജഗദീഷ്, അനശ്വര രാജൻ, ശാന്തി മായാദേവി, ഗണേഷ് കുമാർ എന്നിവരാണ് ചിത്രത്തിൽ മറ്റ് പ്രധാനപ്പെട്ട കഥാപാത്രങ്ങളെ അവതരിപ്പിക്കുന്നത്. ശാന്തി മായാദേവിയാണ് നേരിന്‍റെ തിരക്കഥ രചിച്ചിരിക്കുന്നത്. ജീത്തു ജോസഫ് ആവശ്യപ്പെട്ടത് അനുസരിച്ചാണ് ശാന്തി തിരക്കഥ ഒരുക്കിയത്. സതീഷ് കുറുപ്പ് ആണ് ചിത്രത്തിന്റെ ഛായാഗ്രഹണം. ‘നീതി തേടുന്നു’ എന്നാണ് ഈ മോഹന്‍ലാല്‍ ചിത്രത്തിന്‍റെ ടാഗ് ലൈന്‍. വിഷ്ണു ശ്യാം ആണ് ചിത്രത്തിന്റെ സംഗീതസംവിധാനം നിർവഹിച്ചത്.