ആരാധകരെ ആശയക്കുഴപ്പത്തിലാക്കി മിന്നൽ മുരളി പോസ്റ്ററിലെ ‘നെറ്റ്ഫ്ലിക്‌സ്’..! ആശ്വാസമേകി സംവിധായകൻ ബേസിൽ ജോസഫ്

ബാംഗ്ലൂർ ഡേയ്സ്, മുന്തിരിവള്ളികൾ തളിർക്കുമ്പോൾ, പടയോട്ടം എന്നീ സൂപ്പർഹിറ്റ് ചിത്രങ്ങൾക്ക് ശേഷം വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ നിർമിക്കുന്ന മിന്നൽ മുരളിയുടെ ഒഫീഷ്യൽ പോസ്റ്റർ ലാലേട്ടൻ അദ്ദേഹത്തിന്റെ ഒഫീഷ്യൽ ഫേസ്ബുക്ക് പേജിലൂടെ ഇന്ന് പുറത്തിറക്കി. ഗോദക്ക് ശേഷം ടോവിനോ തോമസ് – ബേസിൽ ജോസഫ് കൂട്ടുകെട്ട് വീണ്ടും ഒന്നിക്കുന്ന ചിത്രം കൂടിയാണിത്. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് ചിത്രം ഒരുങ്ങുന്നത്. മറ്റ് ഭാഷകളിലും ചിത്രം പുറത്തിറക്കാനുള്ള ശ്രമത്തിലാണ് അണിയറപ്രവർത്തകർ. ജിഗർത്തണ്ട, ജോക്കർ തുടങ്ങിയ ചിത്രങ്ങളിലൂടെ മലയാളിക്കും പരിചിതനായ തമിഴ് താരം ഗുരു സോമസുന്ദരവും ചിത്രത്തിലെ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. അജു വർഗീസ്, ബൈജു, ഹരിശ്രീ അശോകൻ, ഫെമിന ജോർജ് എന്നിവരാണ് മറ്റ് അഭിനേതാക്കൾ. ടോവിനോയുടെ കരിയറിലെ തന്നെ ഏറ്റവും വലിയ ബഡ്ജറ്റിൽ ഒരുക്കിയിരിക്കുന്ന ചിത്രം കൂടിയാണിത്. ചിത്രത്തിലെ മർമപ്രധാനമായ ക്ലൈമാക്സ് സംഘട്ടനരംഗങ്ങളുടെ ചിത്രീകരണം കഴിഞ്ഞ ദിവസം പൂർത്തിയായിരുന്നു. ഏപ്രിൽ പത്തോട് കൂടി ബാക്കിയുള്ള ഭാഗങ്ങളും ചിത്രീകരണം പൂർത്തിയാകും.

മോഷൻ പോസ്റ്റർ പുറത്തിറങ്ങിയപ്പോൾ അതിൽ കണ്ട നെറ്റ്ഫ്ലിക്സിന്റെ പേര് ആരാധകരെ ചെറുതായിട്ടൊന്നുമല്ല ആശയക്കുഴപ്പത്തിലാക്കിയത്. ഇത്തരം നല്ലൊരു ചിത്രത്തിന്റെ തീയറ്റർ അനുഭവം നഷ്ടമാകുമോ എന്ന ആശങ്കയിലായിരുന്നു ഏവരും. ഓണം റിലീസായി തീയറ്ററുകളിൽ തന്നെ ചിത്രം എത്തുമെന്ന് ഫേസ്ബുക്ക് പേജിലൂടെ സംവിധായകൻ ബേസിൽ ജോസഫ് അറിയിച്ചിരിക്കുകയാണ്. ഇതോട് കൂടി പ്രേക്ഷകരുടെ ആശങ്കകളും വിട്ടകന്നിരിക്കുകയാണ്. മിന്നൽ മുരളിയുടെ സ്ട്രീമിങ് പാർട്ണറാണ് നെറ്റ്ഫ്ലിക്സ്. തീയറ്റർ റിലീസിന് ശേഷം മാത്രമേ ഓൺലൈൻ സ്ട്രീമിങ് ഉണ്ടാകൂ.