ട്രെൻഡിങിൽ നമ്പർ വൺ; ട്രയിലർ മണിക്കൂറുകൾക്കുള്ളിൽ കണ്ടത് അഞ്ച് മില്യൺ; യുട്യൂബിൽ ഏറ്റവും കൂടുതൽ ലൈക്ക് വാരി മിന്നൽ മുരളി ട്രയിലർ

ലോകസിനിമയ്ക്ക് മുന്നിൽ മലയാളികൾക്ക് ചങ്കൂറ്റത്തോടെ പറയാം ‘ഞങ്ങൾക്കുമുണ്ടൊരു സൂപ്പർ ഹീറോ’ എന്ന്. മിന്നൽ മുരളി. ഇന്ന് രാവിലെ ആയിരുന്നു മിന്നൽ മുരളിയുടെ ട്രയിലർ റിലീസ് ചെയ്തത്. റിലീസ് ചെയ്ത് ഒമ്പതു മണിക്കൂർ കഴിയുമ്പോൾ യു ട്യൂബിൽ ട്രെൻഡിങ്ങിൽ ഒന്നാമതാണ് മിന്നൽ മുരളിയുടെ ട്രയിലർ. ഏറ്റവും അധികം ലൈക്ക് ലഭിച്ച ട്രയിലർ എന്ന റെക്കോർഡും ഇനി മിന്നൽ മുരളിക്കാണ്. ഈ വാർത്ത ഡ്രാഫ്റ്റ് ചെയ്യുമ്പോൾ 478K ആണ് മിന്നൽ മുരളിക്ക് ലഭിച്ച ലൈക്ക്. ഇതുവരെ അഞ്ച് മില്യണിലധികം ആളുകളാണ് യു ട്യൂബിൽ മിന്നൽ മുരളിയുടെ ട്രയിലർ കണ്ടത്. നെറ്റ്ഫ്ലിക്സിലൂടെ ഡിസംബർ 24ന് മിന്നൽ മുരളി പ്രേക്ഷകരിലേക്ക് എത്തും. മലയാളികൾ തീയറ്ററിൽ തന്നെ കാണുവാൻ ഏറെ കൊതിച്ചിരുന്ന ഒരു ചിത്രം കൂടിയായിരുന്നു മിന്നൽ മുരളി. ഗോദക്ക് ശേഷം ടോവിനോ തോമസ് – ബേസിൽ ജോസഫ് കൂട്ടുകെട്ട് വീണ്ടും ഒന്നിക്കുന്ന ചിത്രം കൂടിയാണിത്.

ബാംഗ്ലൂർ ഡേയ്സ്, മുന്തിരിവള്ളികൾ തളിർക്കുമ്പോൾ, പടയോട്ടം എന്നീ സൂപ്പർഹിറ്റ് ചിത്രങ്ങൾക്ക് ശേഷം വീക്കെൻഡ് ബ്ലോക്ക്ബസ്റ്റേഴ്സിന്റെ ബാനറിൽ സോഫിയ പോൾ ആണ് ടോവിനോ തോമസ് ചിത്രം മിന്നൽ മുരളി നിർമിക്കുന്നത്. 90കളിലെ ഒരു സാധാരണ മനുഷ്യൻ ഇടിമിന്നലേറ്റ് അമാനുഷികനായി തീരുന്നതാണ് ചിത്രത്തിന്റെ കഥ. മലയാളം, തമിഴ്, തെലുങ്ക്, കന്നഡ, ഹിന്ദി എന്നിങ്ങനെ അഞ്ച് ഭാഷകളിലാണ് ചിത്രം എത്തുന്നത്. ജിഗർത്തണ്ട, ജോക്കർ തുടങ്ങിയ ചിത്രങ്ങളിലൂടെ മലയാളിക്കും പരിചിതനായ തമിഴ് താരം ഗുരു സോമസുന്ദരവും ചിത്രത്തിലെ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. അജു വർഗീസ്, ബൈജു, ഹരിശ്രീ അശോകൻ, ഫെമിന ജോർജ് എന്നിവരാണ് മറ്റ് അഭിനേതാക്കൾ.

മിന്നൽ മുരളിക്കായി ക്യാമറ ചലിപ്പിക്കുന്നത് സമീർ താഹിറും സംഗീതം ഷാൻ റഹ്മാനുമാണ്. ചിത്രത്തിലെ രണ്ടു വമ്പൻ സംഘട്ടനങ്ങൾ സംവിധാനം ചെയ്യുന്നത് ബാറ്റ്മാൻ, ബാഹുബലി, സുൽത്താൻ തുടങ്ങിയ ചിത്രങ്ങൾക്ക് പിന്നിൽ പ്രവർത്തിച്ച വ്ലാഡ് റിംബർഗാണ്. മനു ജഗത് കഥയും അരുൺ അനിരുദ്ധൻ, ജസ്റ്റിൻ മാത്യു എന്നിവർ രചനയും നിർവഹിക്കുന്നു. വി എഫ് എക്സിന് ഏറെ പ്രാധാന്യമുള്ള ചിത്രത്തിന്റെ വി എഫ് എക്‌സ് സൂപ്പർവൈസ് ചെയ്യുന്നത് ആൻഡ്രൂ ഡിക്രൂസാണ്.