പ്രേക്ഷക മനസ് കീഴടക്കി ട്വൽത് മാൻ; ഹാട്രിക് വിജയവുമായി മോഹൻലാലും ജീത്തു ജോസഫും

മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്ത ചിത്രം ട്വൽത് മാൻ മികച്ച പ്രേക്ഷക പ്രതികരണം നേടി പ്രദർശനം തുടരുകയാണ്. ഒടിടി പ്ലാറ്റ്ഫോമായ ഡിസ്നി പ്ലസ് ഹോട്ട് സ്റ്റാറിൽ മെയ് 20നാണ് ചിത്രം സ്ട്രീമിംഗ് ആരംഭിച്ചത്. മോഹൻലാൽ – ജീത്തു ജോസഫ് കൂട്ടുകെട്ട് ഹാട്രിക് വിജയവുമായി മുന്നേറുകയാണ്. മികച്ച അഭിപ്രായമാണ് 12ത് മാൻ സിനിമയെക്കുറിച്ച് സോഷ്യൽ മീഡിയയിൽ നിറയുന്നത്. ഡീസന്റ് ത്രില്ലർ എന്നാണ് സിനിമ കണ്ടവർ ഒറ്റ സ്വരത്തിൽ അഭിപ്രായപ്പെടുന്നത്. പടം തുടങ്ങിയ സമയം മുതൽ രണ്ടേമുക്കാൽ മണിക്കൂറും എൻഗേജിംഗ് ആയി പിടിച്ചിരുത്തുന്ന സിനിമയാണ് 12ത് മാൻ എന്നാണ് നിരൂപകർ പറയുന്നത്. ജീത്തു ജോസഫ് വീണ്ടും ഒരു ത്രില്ലർ സിനിമയ്ക്ക് തൂലിക ചലിപ്പിച്ചപ്പോൾ പിറന്നത് അഭിനേതാക്കളുടെ മികച്ച പ്രകടനങ്ങളോടു കൂടിയ ഒരു ക്രാഫ്റ്റഡ് ത്രില്ലർ. ഹാട്രിക് വിജയം സ്വന്തമാക്കിയ ജീത്തു ജോസഫ് – മോഹൻലാൽ ടീമിനെ അഭിനന്ദിക്കാനും പ്രേക്ഷകർ മറന്നില്ല.

ഒരു റിസോർട്ടിൽ ഒത്തുകൂടുന്ന പതിനൊന്നു പേർ. അവർക്കിടയിലേക്ക് എത്തുന്ന പന്ത്രണ്ടാമൻ. ആ രാത്രിയിൽ അവിടെ ഒരാൾ കൊല്ലപ്പെടുന്നു. കൊലപാതകിയെ കണ്ടെത്താനുള്ള ശ്രമങ്ങളും അന്വേഷണങ്ങളുമാണ് 12ത് മാൻ പറയുന്നത്. സസ്പെൻസും ട്വിസ്റ്റും പ്രേക്ഷകർക്ക് ചിത്രം എൻഗേജിംഗ് ആക്കുന്ന രീതിയിലാണ്. വളരെ കുറച്ച് അഭിനേതാക്കൾ മാത്രമാണ് 12ത് മാനിൽ ഉള്ളത്. ഒരു ദിവസത്തെ സംഭവം സിനിമയാകുമ്പോൾ അതിന് പശ്ചാത്തലമാകുന്നത് മിസ്റ്ററിയാണ്. കെ ആർ കൃഷ്ണകുമാറിന്റേതാണ് സ്ക്രിപ്റ്റ്. റിസോർട്ടിലാണ് കഥ നടക്കുന്നത്. ഇടയ്ക്ക് കൊച്ചിയും കടന്നു വരുന്നുണ്ട്. അതിഥി രവി, അനുശ്രീ, അനു സിത്താര, ശിവദ, പ്രിയങ്ക മോഹൻ, ലിയോണ ലിഷോയ് എന്നിവരാണ് നായികമാരായി എത്തുന്നത്. സൈജു കുറുപ്പ്, ഉണ്ണി മുകുന്ദൻ, അനു മോഹൻ, ചന്തുനാഥ്, രാഹുൽ മാധവ് എന്നിവരാണ് മറ്റ് കഥാപാത്രങ്ങൾ.

എഡിറ്റിങ് – വി.എസ്. വിനായക്, ഛായാഗ്രഹണം – സതീഷ് കുറുപ്പ്, പശ്ചാത്തല സംഗീതം – അനില്‍ ജോണ്‍സണ്‍, പ്രൊഡക്ഷന്‍ കണ്‍ട്രോളര്‍ – സിദ്ധു പനയ്ക്കല്‍, കോസ്റ്റ്യൂംസ് – ലിന്റാ ജീത്തു. കോവിഡ് പ്രോട്ടോക്കോള്‍ പ്രകാരം സിനിമാ ചിത്രീകരണത്തിന് സര്‍ക്കാര്‍ അനുമതി നൽകിയതിന് ശേഷമാണ് സിനിമയുടെ ചിത്രീകരണം ആരംഭിച്ചത്. ഇടുക്കി ജില്ലയിലെ കുളമാവിലുള്ള ഒരു റിസോര്‍ട്ടായിരുന്നു ലൊക്കേഷന്‍.