ആക്ഷൻ കോമഡി ചിത്രവുമായി മോഹൻലാൽ – സിദ്ധിഖ് കൂട്ടുകെട്ട് വീണ്ടുമെത്തുന്നു

വിയറ്റ്നാം കോളനി, ലേഡീസ് ആൻഡ് ജന്റിൽമാൻ എന്നീ ചിത്രങ്ങൾക്ക് ശേഷം മോഹൻലാൽ – സിദ്ധിഖ് കൂട്ടുകെട്ട് വീണ്ടുമൊന്നിക്കുന്നു. ഈ വർഷം അവസാനത്തോടെ ഷൂട്ടിംഗ് തുടങ്ങുവാൻ ഉദ്ദേശിക്കുന്ന ചിത്രം ആക്ഷനും കോമഡിയും ഒന്നിക്കുന്ന പക്കാ എന്റർടൈനർ ആയിരിക്കുമെന്ന് സംവിധായകൻ സിദ്ധിഖ് തന്നെ വ്യക്തമാക്കി. “ആക്ഷനും ഹ്യൂമറും നിറഞ്ഞ ഒരു ബിഗ് ബഡ്‌ജറ്റ്‌ ചിത്രമായിരിക്കും ഇത്. നയൻതാരയും ഇന്നസെന്റും ചിത്രത്തിൽ അഭിനയിക്കുന്നുവെന്ന രീതിയിൽ പല വാർത്തകളും കണ്ടു. കാസ്റ്റ് ഇതുവരെ നിശ്ചയിച്ചിട്ടില്ല. ഒരു ത്രെഡ് എന്റെ മനസ്സിൽ ഉണ്ട്. ഇനിയും എഴുതി തുടങ്ങിയിട്ടില്ല.” മലയാളചിത്രം ഭാസ്‌കർ ദി റാസ്‌ക്കലിന്റെ തമിഴ് റീമേക്ക് ഭാസ്‌കർ ഒരു റാസ്ക്കൽ എന്ന ചിത്രമാണ് സിദ്ധിഖിന്റേതായി അവസാനം തീയറ്ററുകളിൽ എത്തിയ ചിത്രം. ഹിന്ദിയിൽ സഞ്ജയ് ദത്തിനെ നായകനാക്കി ഈ ചിത്രം പ്ലാൻ ചെയ്‌തിട്ടുണ്ടെങ്കിലും നിർമാതാക്കളെ ഇനിയും ലഭിച്ചിട്ടില്ലാത്തതിനാൽ അടുത്തത് മോഹൻലാൽ ചിത്രമായിരിക്കുമെന്നാണ് സംവിധായകൻ പറഞ്ഞത്. ദിലീപിനെ നായകനാക്കി അടുത്ത കൊല്ലത്തെ വിഷു റിലീസായി ഒരു ചിത്രവും ലിസ്റ്റിലുണ്ട്.