മോഹൻലാലിന്റെ നെഞ്ചത്ത് ചവിട്ടാൻ നെപ്പോളിയന് പേടി; ധൈര്യം പകർന്ന് മോഹൻലാലും

ദേവാസുരത്തിലെ മംഗലശ്ശേരി നീലകണ്ഠൻ എന്ന കഥാപാത്രത്തെ മലയാളികൾ ഒരിക്കലും മറക്കില്ല. ദേവനായും അസുരനായും മോഹൻലാൽ നിറഞ്ഞാടിയ ചിത്രത്തിലെ രസകരമായ ഒരു സംഭവം പങ്ക് വെച്ചിരിക്കുകയാണ് തിരക്കഥാകൃത്ത്, സംവിധായകൻ എന്നീ നിലകളിൽ പ്രേക്ഷകർക്ക് സുപരിചിതനായ രഞ്ജിത്ത്.

കഥയിൽ തളർന്ന് അവശനായി കിടക്കുന്ന നീലകണ്ഠനെ ശേഖരൻ ചവിട്ടുന്ന രംഗം ചിത്രീകരിക്കുകയായിരുന്നു. ആ സമയത്ത് മോഹൻലാലിന്റ നെഞ്ചത്ത് ചവിട്ടാൻ ശേഖരനായി അഭിനയിക്കുന്ന നെപോളിയന് ചെറിയൊരു പേടി. ശേഖരൻ ദേഹത്ത് ചവിട്ടുന്നതും, തുടർന്ന് രോഷം അടക്കി കിടക്കുന്ന നീലകണ്ഠന്റെ നെറ്റിയിൽ നിന്നും മുറിവ് പൊട്ടി രക്തം ഒഴുകുന്നതുമാണ് സീൻ. തന്നെ ചവിട്ടാൻ മടിച്ച് നിന്ന നെപ്പോളിയനെ കണ്ട് മോഹൻലാൽ ഇടപെട്ടു. ലാൽ നെപ്പോളിയന് ധൈര്യം നൽകി. ഒടുവിൽ നെപ്പോളിയൻ വഴങ്ങുകയും ആ സീൻ വിജയകരമായി പൂർത്തിയാക്കി. സിനിമയിലേക്ക് നെപ്പോളിയനെ കൊണ്ടുവന്നതും മോഹൻലാലാണ് എന്ന കാര്യവും രഞ്ജിത്ത് വെളിപ്പെടുത്തി. ശേഖരന്റെ വേഷത്തിൽ പതിവ് ആൾക്കാർ പോരാ എന്ന് രഞ്ജിത്ത് ഐ.വി ശശിയോട് പറഞ്ഞിരുന്നു. ഇത് കേട്ട മോഹൻലാൽ മദ്രാസിൽ ഒരാളുണ്ട്, പൂജയുടെ സമയത്ത് വരും എന്ന് ഇവരോട് പറഞ്ഞു. ആ ആൾ നെപ്പോളിയനായിരുന്നു.