ഇന്ത്യയിലെത്തും മുന്‍പേ സാംസങ് ഗ്യാലക്‌സി ഫോള്‍ഡ് 3 സ്വന്തമാക്കി നടന്‍ മോഹന്‍ലാല്‍

സാംസങ്ങിന്റെ ഏറ്റവും പുതിയ ഹാന്‍ഡ്‌സെറ്റ് ഗ്യാലക്‌സി ഫോള്‍ഡ് 3 നടന്‍ മോഹന്‍ലാല്‍ സ്വന്തമാക്കി. ഈ മാസം പത്തിന് ഇന്ത്യയില്‍ ഔദ്യോഗിക അവതരണം നടത്താനിരിക്കെയാണ് താരം ഫോള്‍ഡ് 3 സ്വന്തമാക്കിയത്. ഇന്ത്യയില്‍ നേരത്തെ തന്നെ പ്രീബുക്കിങ് തുടങ്ങിയിട്ടുണ്ട്.

സ്നാപ്ഡ്രാഗണ്‍ 888 പ്രോസസര്‍, 12 ജിബി റാം, 512 ജിബി വരെ സ്റ്റോറേജ്, 4400 എംഎഎച്ച് ഡ്യൂവല്‍ ബാറ്ററി തുടങ്ങിയ പ്രധാന സവിശേഷതകളോടെയാണ് ഫോള്‍ഡ് 3യുടെ വരവ്. ഫോണിന് മടങ്ങിയിരിക്കുമ്പോള്‍ 6.2-ഇഞ്ച് ഡിസ്പ്ലെയും തുറക്കുമ്പോള്‍ 7.6-ഇഞ്ച് വലുപ്പത്തിലുള്ള ഡൈനാമിക് അമോലെഡ് ഇന്‍ഫിനിറ്റി ഫ്ളെക്സ് ഡിസ്പ്ലെയുമാണ്. പിന്നില്‍ മൂന്ന് 12 എംപി സെന്‍സറുകള്‍ ഉള്ള ട്രിപ്പിള്‍ ക്യാമറാ സിസ്റ്റമാണ് ഒരുക്കിയിരിക്കുന്നത്. എച്ഡിആര്‍ 10 പ്ലസ് വിഡിയോ റെക്കോഡിങ് ഒരു പ്രധാന ഫീച്ചറാണ്.

മടക്കാവുന്ന ഫോണുകള്‍ ഇറക്കുന്ന കാര്യത്തില്‍ സാംസങ് എന്നും മുന്നിലാണ്. സെഡ് ഫോള്‍ഡ് 3 5ജി, സെഡ് ഫ്ളിപ് 3 5ജി എന്നീ രണ്ടു മോഡലുകളാണ് രാജ്യാന്തര വിപണിയില്‍ സാംസങ് പുറത്തിറക്കിയത്. ഫോള്‍ഡ് 3 സീരീസിന്റെ വില തുടങ്ങുന്നത് 1800 ഡോളറിലാണെങ്കില്‍ (ഏകദേശം 1.3 ലക്ഷം രൂപ) ഫ്ളിപ് സീരീസിന്റെ തുടക്ക വേരിയന്റ് 1000 ഡോളറിനാണ് വില്‍ക്കുന്നത്.

ആന്‍ഡ്രോയിഡ് ഫോണുകളിലെ ഏറ്റവും കരുത്തുറ്റ മോഡലുകള്‍ക്കൊപ്പമോ മുന്നിലോ ആണ് ഫോള്‍ഡ് 3യുടെ സ്ഥാനമെന്ന് ടെക് വിദഗ്ധര്‍ പറയുന്നു. ഫാന്റം ബ്ലാക്ക്, ഫാന്റം ഗ്രീന്‍, ഫാന്റം സില്‍വര്‍ എന്നിങ്ങനെ മൂന്നു വേരിയന്റുകളിലാണ് ഫോണ്‍ അവതരിപ്പിച്ചിരിക്കുന്നത്. ഇതില്‍ മോഹന്‍ലാല്‍ സ്വന്തമാക്കിയ ഫാന്റം സില്‍വര്‍ വേരിയന്റ് ഇന്ത്യയില്‍ പ്രീബുക്കിങ്ങില്‍ ലഭ്യമല്ല.