‘ദൃശ്യം’ നേടിയ റെക്കോർഡ് തകർത്ത് ‘നേര്’; 11 ദിവസം കൊണ്ട് നേര് സ്വന്തമാക്കിയത് റെക്കോർഡ് വിജയം

സത്യവും നീതിയും നേരും തേടിയുള്ള ഒരു യാത്രയ്ക്കൊപ്പം പ്രേക്ഷകരും കട്ടയ്ക്ക് നിന്നപ്പോൾ റെക്കോർഡുകൾ തകർത്ത് മുന്നേറുകയാണ് ‘നേര്’. മോഹൻലാലിനെ നായകനാക്കി ജീത്തു ജോസഫ് സംവിധാനം ചെയ്ത നേര് ക്രിസ്മസ് റിലീസ് ആയി ഡിസംബർ 21ന് ആയിരുന്നു തിയറ്ററുകളിലേക്ക് എത്തിയത്. ചിത്രം റിലീസ് ചെയ്ത് 11 ദിവസം കഴിയുമ്പോൾ പത്തു വർഷം മുമ്പ് മോഹൻലാൽ – ജീത്തു ജോസഫ് കൂട്ടുകെട്ടിൽ പിറന്ന ദൃശ്യം സിനിമയുടെ റെക്കോർഡ് ആണ് തകർന്നിരിക്കുന്നത്.

ചിത്രം റിലീസ് ചെയ്ത് 11 ദിവസം പിന്നിടുമ്പോൾ ചിത്രത്തിന്റെ ആഗോള ബോക്സ് ഓഫീസ് കളക്ഷൻ 65 കോടിയാണ്. പത്തു വർഷം പഴക്കമുള്ള ദൃശ്യത്തിന്റെ റെക്കോർഡ് ആണ് നേര് പഴങ്കഥയാക്കിയത്. പുലിമുരുകനും ലൂസിഫറിനും ശേഷം വലിയ വിജയം നേടുന്ന മോഹൻലാലിന്റെ ചിത്രമായി മാറിയിരിക്കുകയാണ് നേര്. റിലീസ് ചെയ്ത് ആദ്യത്തെ 11 ദിവസം കൊണ്ട് കേരളത്തിൽ നിന്ന് മാത്രം നേര് ഇതുവരെ നേടിയത് 34.16 കോടി രൂപയാണ്. റിലീസ് ചെയ്തതിനു ശേഷമുള്ള രണ്ടാമത്തെ ‌ഞായറാഴ്ച മാത്രം നേര് കേരളത്തിൽ നിന്ന് 3.31 കോടി രൂപയാണ് നേടിയത്. ആഗോള ബോക്സ് ഓഫീസിൽ 65 കോടി കളക്റ് ചെയ്ത നേര് ഉടൻ തന്നെ 70 കോടിയിലേക്ക് എത്തുമെന്നാണ് കണക്കുകൾ. ചിത്രം ഈ പോക്ക് തന്നെ പോകുകയാണെങ്കിൽ 100 കോടി ക്ലബിലേക്ക് താമസിയാതെ എത്തിയേക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

ദൃശ്യം പിറന്ന് പത്തു വർഷത്തിന് ശേഷമാണ് ജീത്തു ജോസഫ് – മോഹൻലാൽ കൂട്ടുകെട്ടിൽ നേര് തിയറ്ററുകളിൽ വൻ വിജയമാകുന്നു എന്നതും ശ്രദ്ധേയമാണ്. ഒരു കോർട്ട് റൂം ഡ്രാമയായാണ് നേര് ഒരുക്കിയിരിക്കുന്നത്. ചിത്രത്തിൽ വിജയമോഹൻ എന്ന അഭിഭാഷക കഥാപാത്രമായാണ് മോഹൻലാൽ എത്തിയത്. അഭിഭാഷകയും നടിയുമായ ശാന്തി മായാദേവിയും ജീത്തു ജോസഫും ചേർന്നാണ് ചിത്രത്തിന്റെ തിരക്കഥ ഒരുക്കിയത്. പതിമൂന്ന് വര്‍ഷങ്ങള്‍ക്ക് ശേഷം മോഹന്‍ലാല്‍ വക്കീല്‍ വേഷത്തില്‍ എത്തിയ ചിത്രമായിരുന്നു നേര്. സിദ്ദിഖ്, പ്രിയാമണി, ജഗദീഷ്, അനശ്വര രാജൻ, ശാന്തി മായാദേവി, ഗണേഷ് കുമാർ എന്നിവരാണ് ചിത്രത്തിൽ മറ്റ് പ്രധാനപ്പെട്ട കഥാപാത്രങ്ങളെ അവതരിപ്പിക്കുന്നത്. സതീഷ് കുറുപ്പ് ആണ് ചിത്രത്തിന്റെ ഛായാഗ്രഹണം. ‘നീതി തേടുന്നു’ എന്നാണ് ഈ മോഹന്‍ലാല്‍ ചിത്രത്തിന്‍റെ ടാഗ് ലൈന്‍. വിഷ്ണു ശ്യാം ആണ് ചിത്രത്തിന്റെ സംഗീതസംവിധാനം നിർവഹിച്ചത്.