“ഞങ്ങൾക്കിടയിൽ മത്സരബുദ്ധിയില്ല” മമ്മൂക്കയെ കുറിച്ച് ലാലേട്ടൻ

മലയാളികളുടെ സ്വകാര്യ അഹങ്കാരമാണ് ലാലേട്ടനും മമ്മൂക്കയും. പൂർണമായും മികച്ചൊരു സൗഹൃദം വർഷങ്ങളായി കാത്തുസൂക്ഷിക്കുന്ന ഇരുവരും മലയാളസിനിമയുടെ പകരം വെക്കാനില്ലാത്ത അഭിനേതാക്കളാണ്. ഇരുവരും തമ്മിലുള്ള താരതമ്യ ചർച്ചകൾക്ക് വേദിയാണ് സോഷ്യൽ മീഡിയ എന്നും. ഇപ്പോഴിതാ മമ്മൂക്കയെ കുറിച്ച് തുറന്ന് പറഞ്ഞിരിക്കുകയാണ് ലാലേട്ടൻ.
“ആരു പറഞ്ഞു ഞങ്ങൾക്കിടയിൽ മത്സരബുദ്ധിയുണ്ടെന്ന്. അങ്ങനൊന്നും ഇല്ല. കുറച്ചു പേരല്ലേ മലയാളസിനിമയിൽ ഉള്ളൂ. എല്ലാവരും തമ്മിൽ നല്ല സൗഹൃദത്തിലാണ്. നോക്കൂ, ഒടിയനിൽ മമ്മൂട്ടിക്കയുടെ ശബ്ദം ഇല്ലേ? ലൂസിഫറിന്റെ ടീസർ അദ്ദേഹത്തിന്റെ ഒഫീഷ്യൽ പേജിലൂടെയല്ലേ പുറത്തിറങ്ങിയത്. അപ്പുവിന്റെ സിനിമയുടെ ടീസർ ദുൽഖറിന്റെ പേജിൽ അല്ലെ ആദ്യം വന്നത്. മമ്മൂട്ടിക്കയ്ക്ക് ചെയ്യാൻ പറ്റുന്ന സിനിമകൾ അദ്ദേഹം ചെയ്യുന്നു, എനിക്ക് ചെയ്യാവുന്നത് ഞാനും. റോളുകൾ തട്ടിയെടുക്കാനൊക്കെ പറ്റുമോ? അല്ലാതെ സോഷ്യൽ മീഡിയയിൽ പറയുന്ന പോലെയൊന്നും സംഭവിക്കുകയേയില്ല. കുഞ്ഞാലി മരക്കാർ പോലും അങ്ങനെയാണ്. അവർ പ്ലാൻ ചെയ്‌ത സിനിമ നടക്കില്ല എന്നുറപ്പായപ്പോഴാണ് നമ്മൾ തുടങ്ങിയത്.” ലാലേട്ടൻ പറഞ്ഞു.