അഭ്യൂഹങ്ങൾ അവസാനിച്ചു; ബിഗ് ബോസ് ഫോറിൽ മോഹൻലാൽ തന്നെ, മത്സരാർത്ഥിയായി സന്തോഷ് പണ്ഡിറ്റും ?

ആരാധകരുടെ കാത്തിരിപ്പിന് അവസാനം ആയി. ബിഗ് ബോസ് 4 ൽ നടൻ മോഹൻലാൽ തന്നെ അവതാരകനായി എത്തും. ഷോയുടെ ലോഗോ പുറത്തു വിട്ടതു മുതൽ ബിഗ് ബോസ് സീസൺ 4ൽ ആരാകും അവതാരകൻ എന്നുള്ളതായിരുന്നു ചർച്ച. കഴിഞ്ഞ സീസണുകളിലെല്ലാം മോഹൻലാൽ ആയിരുന്നു അവതാരകൻ. പക്ഷേ, ഇത്തവണ സുരേഷ് ഗോപി അവതാരകനായി എത്തുമെന്ന് ആയിരുന്നു അഭ്യൂഹങ്ങൾ. എന്നാൽ, ഈ ഊഹാപോഹങ്ങൾക്കും അഭ്യൂഹങ്ങൾക്കും ആണ് അവസാനം ആയിരിക്കുന്നത്. മോഹൻലാൽ തന്നെ ബിഗ് ബോസ് നാലിൽ അവതാരകനായി എത്തും. ഇ ടൈംസ് ആണ് ബിഗ് ബോസിന്റെ അവതാരകൻ മോഹൻലാൽ തന്നെ ആയിരിക്കുമെന്ന് റിപ്പോർട്ട് ചെയ്യുന്നത്. ഷോയുടെ പ്രമോയും ഉടൻ തന്നെ റിലീസ് ചെയ്യുമെന്നാണ് റിപ്പോർട്ടുകൾ.

ഫെബ്രുവരി 27ന് ആയിരുന്നു ഷോയുടെ ലോഗോ പുറത്തുവിട്ടത്. ഇതിനു പിന്നാലെയാണ് മോഹൻലാലിന് പകരം ഇത്തവണ സുരേഷ് ഗോപി ആയിരിക്കും അവതാരകൻ എന്ന രീതിയിലുള്ള അഭ്യൂഹങ്ങൾ പ്രചരിച്ചത്. ഏതായാലും ഇതെല്ലാം മാറി മോഹൻലാൽ തന്നെ അവതാരകനായി എത്തുമെന്ന റിപ്പോർട്ടുകളാണ് ഇപ്പോൾ എത്തുന്നത്. ഏതായാലും താമസിയാതെ തന്നെ ഈ സീസണിലെ മത്സരാർത്ഥികളുടെ പട്ടികയും പുറത്തു വന്നേക്കും. സീസൺ നാലിൽ സന്തോഷ് പണ്ഡിറ്റ് ഒരു മത്സരാർത്ഥി ആയിരിക്കുമെന്ന് സ്ഥിരീകരിക്കാത്ത റിപ്പോർട്ടുകളുണ്ട്.

മോഹൻലാൽ ഷൂട്ടിംഗ് തിരക്കുകളിൽ ആയതിനാൽ ഇത്തവണ അവതാരകൻ ആകാൻ എത്തില്ല എന്നായിരുന്നു റിപ്പോർട്ടുകൾ. താരം ആദ്യമായി സംവിധാനം ചെയ്യുന്ന ചിത്രമായ ബറോസിന്റെയും മറ്റ് ചിത്രങ്ങളുടെയും തിരക്കിൽ ആയതിനാൽ എന്നായിരുന്നു റിപ്പോർട്ടുകൾ. എന്നാൽ, ഇത് സംബന്ധിച്ച് ഏഷ്യാനെറ്റോ മോഹൻലാലോ ഒരു സ്ഥിരീകരണവും നൽകിയിരുന്നില്ല. അതേസമയം, മത്സരാർത്ഥികളുടെ പട്ടികയിൽ സന്തോഷ് പണ്ഡിറ്റ്, പാലാ സജി, വാവ സുരേഷ് എന്നിവരുടെ പേരുകളും ഉയർന്നു കേൾക്കുന്നുണ്ട്.