‘ബറോസ്’ ഷൂട്ടിംഗ് ജൂൺ അവസാനം ആരംഭിക്കുമെന്ന് വെളിപ്പെടുത്തി മോഹൻലാൽ

മോഹൻലാൽ സംവിധായകനായി അരങ്ങേറ്റം കുറിക്കുന്ന ബറോസ് എന്ന ചിത്രം പ്രഖ്യാപിച്ചിട്ട് ഏകദേശം ഒരു വർഷത്തോളം ആകാറായി. ത്രീഡിയിൽ ഒരുങ്ങുന്ന ചിത്രത്തിന്റെ ഷൂട്ടിംഗ് ജൂൺ അവസാനം ആരംഭിക്കുമെന്ന് വെളിപ്പെടുത്തിയിരിക്കുകയാണ് മോഹൻലാൽ. ഇന്ത്യൻ സിനിമയിലെ ആദ്യത്തെ 70 എം എം സിനിമയും ആദ്യത്തെ ത്രീഡി ചിത്രവും ഒരുക്കിയ ജിജോ ആണ് ചിത്രത്തിനായി തിരക്കഥ ഒരുക്കുന്നത്. ആദ്യ 70mm ചിത്രം പടയോട്ടം, ആദ്യ 3D ചിത്രം മൈ ഡിയർ കുട്ടിച്ചാത്തൻ എന്നിവയിലൂടെ മലയാള സിനിമയ്ക്ക് അഭിമാനമായി മാറിയ ജിജോ ലാലേട്ടനൊപ്പം ഒന്നിക്കുമ്പോൾ മലയാള സിനിമാ പ്രേക്ഷകരും ഏറെ ആവേശത്തിലാണ്.

ടൈംസ് ഓഫ് ഇന്ത്യക്ക് നൽകിയ പ്രത്യേക അഭിമുഖത്തിലാണ് ചിത്രത്തെ കുറിച്ച് ലാലേട്ടൻ മനസ്സ് തുറന്നത്.

ഷൂട്ടിംഗ് ജൂൺ അവസാനത്തോടെ ആരംഭിക്കും. ഗോവയിലും കേരളത്തിലുമായിട്ടാണ് പ്രധാനമായും ഷൂട്ടിംഗ് നടത്തുക. ഒരു 3D ചിത്രമായതിനാൽ തന്നെ കുറെ ഭാഗങ്ങൾ സ്റ്റുഡിയോക്ക് അകത്തും ചിത്രീകരിക്കേണ്ടി വരും.

റിലീസിന് ഒരുങ്ങുന്ന മരക്കാർ അടക്കം നിരവധി പ്രിയദർശൻ ചിത്രങ്ങളിൽ അഭിനയിച്ചിട്ടുള്ള മോഹൻലാലിന് ആ സുഹൃത്തിന്റെ സംവിധാനശൈലി പ്രചോദിപ്പിച്ചിട്ടുണ്ടോ എന്ന ചോദ്യത്തിന് ലാലേട്ടന്റെ മറുപടി ഇങ്ങനെ ആയിരുന്നു.

പ്രിയന്റെ ചിത്രങ്ങളുമായി ബറോസിനെ താരതമ്യം ചെയ്യേണ്ടി വരില്ല. ചിത്രത്തിന്റെ തിരക്കഥ ചർച്ച ചെയ്‌തപ്പോഴെല്ലാം പ്രിയൻ കൂടെയുണ്ടായിരുന്നു. പക്ഷേ അദ്ദേഹത്തിന്റെ സംവിധാനത്തിലുള്ള ആ ഒരു മാജിക് എന്റെ സംവിധാനത്തിൽ കാണുവാൻ സാധിക്കില്ല. ബറോസ് ഒരു കുട്ടിയും ഭൂതവും തമ്മിലുള്ള കഥയാണ്. അറിയാതെ കയറി വരുന്ന ചില കാര്യങ്ങൾ ഉണ്ടാകാം. പ്രിയന്റെ ഏറ്റവും വലിയ സവിശേഷത അദ്ദേഹം സിനിമക്ക് ആവശ്യമുള്ള ഷോട്ടുകൾ മാത്രമേ എടുക്കൂ. അതിനാൽ തന്നെ സമയലാഭവുമുണ്ട്. അത്തരത്തിൽ ഒരു സമീപനമാണ് ഞാനും ആഗ്രഹിക്കുന്നത്. ഞങ്ങൾ ഒരുക്കുന്ന ചിത്രത്തെ കുറിച്ച് ഞങ്ങൾക്ക് തന്നെ വ്യക്തമായൊരു കാഴ്ച്ചപ്പാടുണ്ട്.