കാല് കണ്ട് കലിപ്പിളകിയ സദാചാര ആങ്ങളമാർക്ക് കാല് കൊണ്ട് മറുപടിയേകി നായികമാർ; ഫോട്ടോസ്

സോഷ്യൽ മീഡിയ ഏവർക്കും വിരൽത്തുമ്പിൽ എത്തിയതോടെ പൊങ്ങി വന്ന ഒരു പ്രത്യേക വിഭാഗമാണ് ഓൺലൈൻ സദാചാര ആങ്ങളമാർ. പെണ്ണിന്റെ കൈയ്യോ കാലോ വസ്ത്രത്തിന് പുറത്ത് കണ്ടാൽ അവർക്ക് കലിയിളകും. മറഞ്ഞ് നിന്ന് ആസ്വദിക്കുകയും നേരെ നിന്ന് കുറ്റം പറയുകയും അവർക്കെതിരെ ശക്തമായ ഭാഷയിൽ തന്നെ വിമർശനം നടത്തിയിരിക്കുകയാണ് മലയാള സിനിമയിലെ പ്രശസ്‌ത നായികമാർ.

യുവനടി അനശ്വര രാജൻ തന്റെ പുതിയ ചിത്രം കഴിഞ്ഞ ദിവസം സോഷ്യൽ മീഡിയയിൽ പോസ്റ്റ് ചെയ്തിരുന്നു. രഞ്ജിത്ത് ഭാസ്‌ക്കർ ആണ് ചിത്രങ്ങൾ പകർത്തിയത്. എന്നാൽ ഈ ചിത്രത്തിന് നേരെ സദാചാര വാദികളുടെ ആക്രമണം ഏറെ നടന്നിരുന്നു. അശ്ലീല കമന്റുകളും സദാചാര ആക്രണവും തുടരുമ്പോഴാണ് അനശ്വരക്ക് പിന്തുണയുമായി നിരവധി പേർ മുന്നോട്ട് എത്തിയിരിക്കുന്നത്. തന്റെ നിലപാട് അനശ്വര രാജൻ വ്യക്തമാക്കിയിരുന്നു.

റിമ കല്ലിങ്കൽ, അഹാന കൃഷ്ണ, അനാർക്കലി മരിക്കാർ, കനി കുസൃതി എന്നിവർ പിന്തുണയുമായി എത്തി. കൂളിങ് ഗ്ലാസ് ധരിച്ച് സ്വിം സ്യൂട്ടിൽ നടന്നു വരുന്ന ചിത്രമാണ് റിമ സമൂഹമാധ്യമത്തിൽ പങ്കുവച്ചത്. ‘അദ്ഭുതം അദ്ഭുതം… സ്ത്രീകൾക്ക് കാലുകണ്ടത്രേ!!’ എന്ന അടിക്കുറിപ്പ് സഹിതമാണ് സമൂഹമാധ്യമത്തിലെ സദാചാരവാദികളുടെ വായടപ്പിക്കുന്ന മറുപടി റിമ നൽകിയത്. കാൽമുട്ട് വരെ ഇറക്കമുള്ള വസ്ത്രം ധരിച്ചുകൊണ്ടുള്ള തങ്ങളുടെ ചിത്രങ്ങൾ പങ്കുവച്ചാണ് അഹാനയും അനാർക്കലിയും പ്രതിഷേധം രേഖപ്പെടുത്തിയത്. ഞങ്ങളുടെ വസ്ത്രധാരണം നിങ്ങളുടെ ബിസിനസ്സല്ല എന്നാണ് അനാർക്കലി പോസ്റ്റിൽ പറയുന്നത്. കാല് കാണിച്ചുള്ള യോഗ വിഡിയോ പങ്കുവച്ചായിരുന്നു കനിയുടെ പ്രതികരണം. ഇന്ന് കാലുകളുടെ ദിവസം എന്നായിരുന്നു ഈ വിഡിയോയ്ക്ക് റിമയുടെ കമന്റ്.