സുഹൃത്തിന്റെ കല്യാണവേദിയിൽ മലയാളസിനിമയിലെ യുവതാരപത്നിമാർ ആടിത്തിമിർത്തു, സപ്പോർട്ട് സ്റ്റെപ്പുമായി കുട്ടിപ്പട്ടാളവും

നിർമാതാവ് വിശാഖ് സുബ്രഹ്മണ്യത്തിന്റെ വിവാഹവേദിയിൽ താരപത്നിമാർ ചെയ്ത നൃത്തമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. വിനീത് ശ്രീനിവാസന്റെ ഭാര്യ ദിവ്യ, അജു വർഗീസിന്റെ ഭാര്യ അഗസ്റ്റീന, ധ്യാൻ ശ്രീനിവാസന്റെ ഭാര്യ അർപ്പിത, ആസിഫ് അലിയുടെ ഭാര്യ സമ എന്നിവരാണ് നടി നൂറിൻ ഷെരീഫിനൊപ്പം വേദിയിൽ ചുവടു വെച്ചത്. ഇവരുടെ മക്കളും വേദിയിൽ എത്തി ചുവടു വെച്ചു. വിശാഖ് സുബ്രഹ്മണ്യം തന്നെയാണ് വീഡിയോ സോഷ്യൽ മീഡിയയിൽ പങ്കുവെച്ചത്.

വിനീത് ശ്രീനിവാസൻ സംവിധാനം ചെയ്ത ഹൃദയം സിനിമയിലെ ഉണക്കമുന്തിരി പാട്ടിനാണ് താര പത്നിമാർ ആദ്യം ചുവടുവെച്ചത്. നായകൻ പോകുന്നു, മോളിവുഡ് പത്നിമാരുടെ ഗംഭീരനൃത്തം എന്ന് കുറിച്ചാണ് വിശാഖ് വീഡിയോ പങ്കുവെച്ചത്. അതെ !! ഞാൻ അവരെ അസാമാന്യ ഭാര്യമാർ എന്ന് വിളിക്കുന്നു, കാരണം, അവരാണ് കൂളസ്റ്റ് ഭാര്യമാരും മമ്മിമാരും ആത്മസുഹൃത്തക്കളും സഹോദരിമാരും. വിവാഹ യാത്രയിൽ ഉടനീളം അദ്വൈതയോടൊപ്പം ഉണ്ടായിരുന്നതിന് നിങ്ങൾ ഓരോരുത്തർക്കും നന്ദി അറിയിക്കാൻ ഞാൻ ആഗ്രഹിക്കുന്നു. – വിശാഖ് വീഡിയോയ്ക്കൊപ്പം കുറിച്ചു. നടി നൂറിൻ ഷെരീഫാണ് നൃത്തം ചിട്ടപ്പെടുത്തിയത്. താരപത്നിമാർക്ക് ഒപ്പം നൂറിൻ ഷെരീഫും ചുവടുവെച്ചു.

മോഹൻലാൽ ഉൾപ്പെടെയുള്ള മലയാളസിനിമയിലെ പ്രമുഖ താരങ്ങളുടെ സാന്നിധ്യത്തിൽ ആയിരുന്നു വിശാഖ് പുതിയ ജീവിതത്തിലേക്ക് കടന്നത്. ലവ് ആക്ഷൻ ഡ്രാമ എന്ന ചിത്രം നിർമ്മിച്ചുക്കൊണ്ടാണ് വിശാഖ് സുബ്രഹ്മണ്യം നിർമാണരംഗത്തേക്ക് കടന്ന് വന്നത്. പിന്നീട്, വിനീത് ശ്രീനിവാസൻ – പ്രണവ് മോഹൻലാൽ ചിത്രമായ ഹൃദയത്തിലൂടെ മെറിലാൻഡ് സ്റ്റുഡിയോസിന് ഒരു തിരിച്ചുവരവ് നൽകുകയും ചെയ്‌തു. തിരുവനന്തപുരം ശ്രീകുമാർ, ശ്രീവിശാഖ്, ന്യൂ തീയറ്ററുകളുടെ ഉടമയായ എസ് മുരുഗൻ – സുജ മുരുഗൻ എന്നിവരാണ് വിശാഖിന്റെ മാതാപിതാക്കൾ.