ഗോപി സുന്ദറിന്റെ നെഞ്ചിൽ ചാരി അമൃത സുരേഷ്; വൈറലായി ചിത്രം, പ്രണയമാണോ എന്ന ചർച്ച സജീവമാക്കി സോഷ്യൽ മീഡിയ

കൊച്ചി: സോഷ്യൽ മീഡിയയെ അമ്പരപ്പിച്ച് ഒരു ചിത്രം വൈറലായി മാറിയിരിക്കുകയാണ്. സംഗീത സംവിധായകൻ ഗോപി സുന്ദറും ഗായിക അമൃത സുരേഷും ഒരുമിച്ചുള്ള ചിത്രമാണ് വൈറലായിരിക്കുന്നത്. പ്രണയാർദ്രമെന്ന് തോന്നിപ്പിക്കുന്ന വിധത്തിലുള്ള ചിത്രമാണ് താരങ്ങൾ പങ്കുവെച്ചിരിക്കുന്നത്. മുണ്ടും ഷർട്ടും ധരിച്ച് നെറ്റിയിൽ കുറി തൊട്ട് നിൽക്കുന്ന ഗോപി സുന്ദറിനെ കെട്ടിപ്പിടിച്ച് നിൽക്കുന്ന അമൃത സുരേഷ് ആണ് ചിത്രത്തിൽ. ‘പിന്നിട്ട കാതങ്ങൾ മനസ്സിൽ കുറിച്ച് അനുഭവങ്ങളുടെ കനൽവരമ്പു കടന്ന് കാലവും കാറ്റും പുതിയ വഴികളിലേക്ക്’ എന്ന അടുക്കുറിപ്പോടെയാണ് ചിത്രങ്ങൾ പങ്കുവെച്ചിരിക്കുന്നത്. ഇരുവരും തമ്മിൽ പ്രണയത്തിലാണെന്ന സൂചനകൾ നൽകുന്നതാണ് ചിത്രം. നിരവധി പേരാണ് ചിത്രത്തിന് കമന്റുകളുമായി എത്തിയിരിക്കുന്നത്. ഇൻസ്റ്റഗ്രാമിൽ ഗോപി സുന്ദറാണ് അമൃതയെയും ടാഗ് ചെയ്ത് ചിത്രം പങ്കുവെച്ചത്.

‘നിങ്ങളെ രണ്ടു പേരെയും ഓർത്ത് വളരെ സന്തോഷം. മനോഹരവും ആഴമേറിയതും പവിത്രവുമായ ഒന്നിന്റെ തുടക്കമാകട്ടെ ഇത്. ഈ പ്രത്യേക ദിവസം നിങ്ങൾക്ക് ഒപ്പം ഉണ്ടായതിൽ വളരെ അധികം സന്തോഷം.’ – ബിഗ് ബോസ് മത്സരാർത്ഥിയും സോഷ്യൽ മീഡിയ ഇൻഫ്ലുവൻസറുമായ അപർണ മൾബറി ചിത്രത്തിന് താഴെ കുറിച്ചത് ഇങ്ങനെ. ‘മൈൻ’ എന്നാണ് ചിത്രത്തിന് താഴെ അമൃതയുടെ സഹോദരി അഭിരാമി കുറിച്ചത്. നിരവധി പേരാണ് ഇരുവർക്കും ആശംസകളുമായി കമന്റ് ബോക്സിൽ എത്തിയിരിക്കുന്നത്.

‘അഭിനന്ദനങ്ങൾ’ എന്ന് ചിത്രത്തിന് താഴെ ചിലർ ആശംസിച്ചപ്പോൾ മറ്റ് ചിലർ ‘ഹാപ്പി മാരീഡ് ലൈഫ്’ എന്നാണ് കുറിച്ചത്. ഗോപി സുന്ദറിന്റെ സുഹൃത്ത് അഭയ ഹിരൺമയിയെക്കുറിച്ച് ചിലർ അന്വേഷിക്കുകയും ചെയ്തു. ഇത് പുതിയ ആൽബത്തിന്റെ പ്രമോയാണോയെന്ന് സംശയിക്കുന്നവരും ഉണ്ട്. നേരത്തെയും അമൃതയ്ക്ക് ഒപ്പമുള്ള ചിത്രങ്ങൾ ഗോപി സുന്ദർ പങ്കുവെച്ചിരുന്നു. അമൃത റെക്കോർഡിങ്ങിന് എത്തിയ സമയത്ത് പകർത്തിയ ചിത്രങ്ങൾ ആയിരുന്നു പങ്കുവെച്ചത്.