‘നവ്യയെ ലേഡി സൂപ്പർസ്റ്റാർ എന്ന് ശരിക്കും വിളിക്കാൻ തോന്നുന്നു’; ഒരുത്തീ കണ്ടതിനു ശേഷം രതീഷ് വേഗ പറഞ്ഞത്

പത്തുവർഷത്തെ ഇടവേളയ്ക്ക് ശേഷം നടി നവ്യ നായർ വീണ്ടും നായികയായി തിരിച്ചെത്തിയ സിനിമ ആയിരുന്നു വി കെ പ്രകാശ് സംവിധാനം ചെയ്ത ഒരുത്തി. ചിത്രത്തിൽ രാധാമണി എന്ന കഥാപാത്രമായി എത്തിയ നവ്യ മികച്ച പ്രകടനമാണ് കാഴ്ച വെച്ചത്. നിരവധി പേരാണ് ചിത്രത്തിലെ നവ്യയുടെ അഭിനയത്തെ അഭിനന്ദിച്ച് രംഗത്തെത്തി. ഇപ്പോൾ സിനിമ കണ്ടതിനു ശേഷം നവ്യയെയും സംവിധായകനെയും അഭിനനന്ദിച്ച് രംഗത്തെത്തിയിരിക്കുകയാണ് സംഗീതസംവിധായകൻ രതീഷ് വേഗ. നവ്യ നായരെ ലേഡി സൂപ്പർസ്റ്റാർ എന്ന് വിളിക്കാൻ തോന്നുന്നെന്നും രതീഷ് വേഗ കുറിച്ചു.

സോഷ്യൽ മീഡിയയിൽ രതീഷ് വേഗ കുറിച്ചത് ഇങ്ങനെ, ‘ഒരുത്തി എന്ന ചിത്രം കണ്ടു. എനിക്ക് ഏറ്റവും പ്രിയപ്പെട്ട ഡയറക്ടർ എന്റെ പ്രിയ ഗുരുനാഥൻ കൂടിയായ VKP സാറിന്റെ ചിത്രം എന്നത് തന്നെയാണ് ഈ ചിത്രം കാണാൻ പ്രേരിപ്പിച്ച ആദ്യഘടകം. സാധാരണകാരുടെ ജീവിതത്തിലെ നേർക്കാഴ്ചയാണ് ഒരുത്തി. നന്ദനത്തിലെ ബാലാമണിയിൽ നിന്നും ഒരുത്തിയിലെ രാധാമണിയിലേക്ക് എത്തുന്ന നവ്യ. ഒരിക്കലും നവ്യയെ ചിത്രത്തിൽ കണ്ടില്ല; നമ്മുടെ ഇടയിൽ കാണുന്ന ജീവിതപ്രാരാബ്ധങ്ങളാൽ നെട്ടോട്ടമോടുന്ന രാധാമണിയായി നവ്യ ജീവിക്കുന്ന അനുഭവം. രാധാമണിയുടെ ആത്മസംഘർഷങ്ങളിലൂടെ നമ്മളും യാത്രചെയ്യുന്നു. ലേഡി സൂപ്പർസ്റ്റാർ എന്ന് ശരിക്കും വിളിക്കാൻ തോന്നുന്ന അഭിനയ മുഹൂർത്തം കോറിയിടുന്നു നവ്യ. പറയുന്ന കഥയുടെ ആഴം ആത്മാവുള്ളതെങ്കിൽ VKP സർ അത് കൺസീവ് ചെയ്യുന്നതിൽ അൾട്ടിമേറ്റ് ആണ് എന്ന് ഞാൻ എപ്പോഴും പറയുന്നതാണ്. ഇവിടെ ഒരുത്തിയുടെ കൂടെ നമ്മുടെ മനസ്സിനെയും യാത്ര ചെയ്യിക്കുന്നുണ്ട് VKP. എടുത്തു പറയേണ്ട മറ്റൊരു കാര്യം വിനായകന്റെ പോലീസ് വേഷം. ഇപ്പോഴും വേണ്ടപോലെ ഉപയോഗിക്കപ്പെടാത്ത ചട്ടക്കൂടുകൾക്ക് ഉള്ളിൽ മാത്രം നിർത്തിപോന്ന കലാകാരൻ ആണ് വിനായകൻ എന്ന് ഒരുത്തി കണ്ടപ്പോൾ തോന്നി. പക്വതയുള്ള സത്യസന്ധനായ പോലീസ് കഥാപാത്രം എത്രമാത്രം അച്ചടക്കത്തോടെ ആണ് വിനായകൻ ചെയ്തിരിക്കുന്നത്. അങ്ങനെ ഒരു Challenge എടുത്തതിന് VKP സാറിന് ആണ് ആദ്യ കൈയ്യടി. വിനായകൻ ഇനിയും വ്യത്യസ്തമായ കഥാപാത്രങ്ങളിൽ തിളങ്ങട്ടെ. അദ്ദേഹത്തിന്റെ ഭാഷയിൽ പറഞ്ഞാൽ കള്ളിമുണ്ട് കഥാപാത്രങ്ങൾക്ക് അപ്പുറം ഇനിയും എത്രയോ കഥാപാത്രങ്ങൾ ചെയ്യാൻ അദ്ദേത്തിന് കഴിയും. ശിക്കാറിനു ശേഷം സുരേഷ് ബാബു ചേട്ടന്റെ ഹൃദയം തൊടുന്ന തിരക്കഥയും സംഭാഷണവും. ഒരുത്തി സമീപകാലചിത്രങ്ങളിലെ മികച്ച അനുഭവം തന്നെയാണ്. Navya Nair. Vk Prakash #Oruthee’ – എന്നാണ് രതീഷ് വേഗ സോഷ്യൽ മീഡിയയിൽ കുറിച്ചത്.

സൈജു കുറുപ്പ്, സന്തോഷ് കീഴാറ്റൂര്‍, മാളവിക മേനോന്‍, ചാലി പാല, മുകുന്ദൻ, കെ പി എ സി ലളിത, അരുൺ നാരായണൻ എന്നിവരും നവ്യയുടെ മകനായി അഭിനയിച്ച ആദിത്യനും മികച്ച പ്രകടനമായിരുന്നു കാഴ്ച വെച്ചത്. ഛായാഗ്രഹണം – ജിംഷി ഖാലിദ്, സംഗീതം – ഗോപി സുന്ദർ, എഡിറ്റിംഗ് – ലിജോ പോൾ, സൗണ്ട് ഡിസൈൻ – രംഗനാഥ് രവി. കുടുംബ പ്രേക്ഷകർക്ക് പൂർണ സംതൃപ്തി നൽകുന്ന ഒരു ഡ്രാമ ത്രില്ലർ ആണ് ഒരുത്തീ.